މުހައްމަދު މަމްދުހް (މަންޑޭ) އަކީ މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގައި ވާދަކުރަމުންދާ ރ.އިނގުރައިދޫ ޓީމުގައި ހުނަރުވެރި މޮޅު ކުޅުމެއް ދައްކަމުން އަންނަ ޒުވާން ކުޅުންތެރިއެކެވެ. އުމުރުން 26 އަހަރުގެ މަންޑޭ ވަނީ މި މުބާރާތުގައި އަތޮޅު ބުރުގެ ފަސް މެޗުގައި ވެސް އިނގުރައިދޫ ޓީމަށް ލަނޑުޖަހަދިނުމުގެ އިތުރުން މޮޅު ކުޅުމެއް ދައްކައިދީފައެވެ.

ފުރަތަމަ މެޗުގައި އިންނަމާދޫ އަތުން 8-0 ގެ ނަތީއްޖާއަކުން އިނގުރައިދޫ މޮޅުވި މެޗުގައި މަންޑޭ ދެ ލަނޑު ކާމިޔާބުކޮށްދިން އިރު ދެވަނަ މެޗުގައި މީދޫ ކޮޅަށް އެއް ލަނޑު ކާމިޔާބުކުރިއެވެ. އަދި ތިންވަނަ މެޗުގައި އަލިފުއްޓާއި ވާދަކޮށް 3-0 ގެ ނަތީއްޖާއަކުން އިގުރައިދޫ މޮޅުވި މެޗުގައި ދެ ލަނޑު ކާމިޔާބުކުރި އިރު އެމެޗުގެ މޮޅު ކުޅުންތެރިއާގެ މާގާމު ލިބުނީ ވެސް މަންޑޭ އަށެވެ. އަދި އަތޮޅު ބުރުގެ ފަހު މެޗު އަދި ފައިނަލްގައި ދުވާފާރާއި ދެކޮޅަށް ކުޅުނު މެޗުގައި ވެސް މަންޑޭ އެއް ލަނޑު ކާމިޔާބުކުރުއެވެ.

ސްކޫލްގައި އުޅުނު އިރުން ފެށިގެން ފުޓްބޯޅަ ކުޅެން ޝައުގުވެރިކަން ހުންނަ މަންޑޭ އަކީ ރަށު ފެންވަރުގެ އިތުރުން އަތޮޅު ފެންވަރުގައި ބޭއްވޭ މުބާރާތްތަކުގައި ވާދަކުރަމުން އަންނަ ހުނަރުވެރި ކުޅުންތެރިއެކެވެ. މިގޮތުން ރަށުން ބޭރުގައި ބޭއްވުނު މުބާރާތެއްގައި މަންޑޭ އެންމެ ފުރަތަމަ ކުޅުނީ ރ.އަތޮޅު މަޑުއްވަރީގައި ބޭއްވުނު ފުޓްސަލް މުބާރާތެއްގައި އެފްސީ ޔުނައިޓެޑަށެވެ.

މީގެ އިތުރުން ރ.އަތޮޅުގެ ރިސޯޓްތަކަށް ޙައްސަކޮށްގެން 2022 ވަނަ އަހަރު ބޭއްވުނ ރާބަނދި ޗެލެންޖްގައި ދިގަލި މޯލްޑިވްސް ޓީމަށް ކުޅެދީފައިވާއިރު އެޓީމުގެ ކެޕްޓަނަކީ ވެސް މަންޑޭއެވެ.

ފުޓްސަލްގައި މަންޑޭ ހޯދާފައިވާ ކާމިޔާބީ ތަކުގެ ތެރޭގައި 2019 ވަނަ އަހަރު ރ.މަޑުއްވަރީގައި ބޭއްވުނު މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނު އިރު 2022 ވަނަ އަހަރު އިނގުރައިދޫ ކައުންސިލްގެ ފުޓްސަލް ފިއެސްޓާގެ އެންމެ މޮޅު ފަސް ކުޅުންތެރިންގެ ތެރޭގައި މަންޑޭ ހިމެނިފައިވެއެވެ.

ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022 އަކީ މަންޑޭ މާލެގައި ކުޅޭ ފުރަތަމަ މުބާރާތެވެ. މުބާރާތުގެ އަތޮޅު ބުރުގެ ޗެމްޕިއަންކަން ހޯދުމުގެ އިތުރުން ޒޯން ދޭއްގެ ޗެމްޕިއަންކަން އިނގުރައިދޫ ހޯދި އިރު ޒޯން ފައިނަލްގައި އޭދަފުއްޓާއި ދެކޮޅަށް ކުޅުނު ދެ ލެގުގައި ވެސް ލަނޑު ޖެހުމުގެ އިތުރުން ދެވަނަ ލެގުގެ މޮޅު ކުޅުންތެރިޔާގެ މަގާމު ލިބުނީ ވެސް މަންޑޭ އަށެވެ.

ގޯލްޑަން ފުޓްސަލް މުބާރާތުގެ ދެވަނަ ބުރުގައި މި މަހު 8 ވަނަ ދުވަހު ފޭދޫ އާއި ދެކޮޅަށް އިނގުރައިދޫ ނިކުންނައިރު މަންޑޭގެ އުންމީދަކާ ކުރިއަށް ހުރި މެޗުތައް ކާމިޔާބުކޮށް ރަށުު ޓީމާއި އެކު މުބާރާތުގެ އެންމެ ޝަރަފުވެރި މަގާމް ރާއްޖޭގެ ޗެންޕިއަންކަން ހޯދުމެވެ.