ދުބާއީން ފުރައިގެން އިސްތިއުމާރީ އިސްރާއީލަށް ދަތުރުކުރަމުން ދިޔަ ފްލައިޑުބާއީގެ ފްލައިޓެއް ދެ ޕައިލެޓުންގެ މެދުގައި މާރާމާރީ ހިނގައިގެން އެމެޖެންސީ ސިގްނަލް ފޮނުވުމަށްފަހު ސައޫދީ ޢަރަބިއްޔާގެ ތަބޫކް އެއާޕޯޓަށް ޖައްސައިފިއެވެ.

މި ހާދިސާ ހިނގީ ފްލައިޓް ނަންބަރު އެފްޒެޑް 1073 ގައެވެ. ފްލައިޓް ޓްރެކިން ވެބްސައިޓް ފްލައިޓް ރެޑާ 24 އިން ހާމަކޮށްފައިވާ ގޮތުގައި ބޮއިން 737 މަރުކާގެ އެ ބޯޓު ޢުރުދުންގެ ވައިގެ ސަރަޙައްދު ހުރަސްކުރަމުން ދަނިކޮށް ފުރަތަމަ ޢާންމު އެމެޖެންސީ ސިގްނަލެއް ފޮނުވި ކަމަށެވެ.

އޭގެ ދެތިން މިނެޓު ފަހުން ޤާނޫނާ ޚިލާފު ހަރަކާތެއް ހިނގާފާނެ ކަން ދޭހަވާ ދެވަނަ އެމެޖެންސީ ސިގްނަލެއް ވެސް ފޮނުވި ކަމަށް އެ ވެބްސައިޓުން ބުނެފައިވެއެވެ. ބޯޓު ސައޫދީ ޢަރަބިއްޔާގެ ހުޅަނގު އުތުރުގައި އޮންނަ ތަބޫކް އެއާޕޯޓުގައި ޖެއްސީ އެ ސިގްނަލް ޢާންމު އެމެޖެންސީ ސިގްނަލަކަށް ބަދަލުކުރުމަށް ފަހު ކަމަށް ފްލައިޓް ރެޑާ 24 އިން ބުނެފައިވެއެވެ.

އިސްރާއީލުގެ ބޮޑުވަޒީރުގެ އޮފީހުން ބުނީ މި ހާދިސާއަކީ ބޯޓު ހައިޖެކް ކުރުމެއް ކަމުގައި ކުރިން ބުނި ނަމަވެސް އެއީ އެފަދަ ކަމެއް ކަމުގައި ނުބެލެވޭ ކަމަށެވެ. ނަން ހާމަނުކުރުމަށް ޝަރުޠުކޮށް ރޮއިޓާސް އަށް މަޢުލޫމާތު ދިން އިސްރާއީލުގެ ރަސްމީ ފަރާތަކުން ބުނީ ދެ ޕައިލެޓުންގެ މެދުގައި މާރާމާރީ ހަމަނުޖެހުމެއް ހިންގުމާ ގުޅިގެން އެމެޖެންސީ ސިގްނަލް ފޮނުވީ ކަމަށެވެ. ފްލައިޑުބާއީގެ ބަހެއް ވަގުތުން ލިބިފައެއް ނުވެއެވެ.

ރޮއިޓާސް އާ ވާހަކަ ދެއްކި އިސްރާއީލުގެ ތިން ސެކިއުރިޓީ އޮފިޝަލަކު ބުނި ގޮތުގައި ބޮޑުވަޒީރު ބެންޖަމިން ނަތަންޔާހޫ މި މައްސަލައާ ގުޅޭ ގޮތުން މަޝްވަރާތައް ބާއްވައިފައިވެއެވެ. އިސްރާއީލު ސިފައިން ނެރުނު ބަޔާނެއްގައި ބުނެފައިވާ ގޮތުން އެ ޖަމާއަތުގެ އަސްކަރިއްޔާގެ ޗީފް އީޔާލް ޒަމީރު ވައިގެ ސިފައިންގެ ކޮމާންޑަރާއި އެހެން އަސްކަރީ ވެރީންނާ އެކު ހާލަތު ވަޒަންކުރުމުގެ ބައްދަލުވުމެއް ވެސް ބާއްވައިފައިވެއެވެ.

ފްލައިޑުބާއީ އަކީ ދުބާއީ އާއި ތެލް އަވީވާ ދެމެދު ކޮންމެ ދުވަހަކު ދަތުރުކުރާ އެއާލައިނެކެވެ. މި ރޫޓަކީ އިސްރާއީލު ރައްޔިތުންގެ މެދުގައި މަޤުބޫލު ރޫޓެކެވެ.