ދިވެހި ސިފައިންގެ ތެރޭގައި އަގުހުރި ޚިދްމަތްތަކެއް ކޮށްދެއްވި އަލީ އިހްސާން ޑިފެންސް މިނިސްޓަރ އަލްއުސްތާޒާ މާރިޔާ އަލީ އަށް ވަރުގަދަ ރައްދެއް ދެއްވައިފިއިވެ.

އިހުސާން މާރިޔާއަށް ވިދާޅުވެފައިވަނީ "ޑިފެންސް މިނިސްޓަރަށް ހަނދުމަފުޅުކޮށް އަރުވަން، ތިޔައީ "ދިވެހިރާއްޖޭ"ގެ ޑިފެންސް މިނިސްޓަރު، އިންޑިޔާގެ ޑިފެންސް މިނިސްޓަރެއް ނޫން" މިހެނެވެ.،

އިހުސާން މިމޭރުމުން މާރިޔާއަށް ރައްދުދެއްވާފައި މިވަނީ ރޭ ރައީސް އިބްރާހިމް މުޙައްމަދް ޞާލިޙަށް އެމްޑީޕީގެ ޓީކެޓް ހަވާލު ކުރުމަސް ބޭއްވި ޖަލްސާގައި، ދާދި ފަހަކުން އިންޑިޔާ އަށް ބޭސް ފަރުވާ އަށް ގޮސް ހުއްޓައި ހައްޔަރު ކޮށް ޑިޕޯޓު ކޮށްލި އަބްދުއްޞަމަދުގެ މައްސަލައިގައި ޞަމަދުއަށް ރައްދުވާ ގޮތަށް ވާހަކަ ދެއްކެވެމުގައި ހަޖޫޖެއްސެވުމާއި ގުޅިގެންނެވެ.

 މިނިސްޓަރ މާރިޔާގެ ވާހަކަގައި ވިދާޅުވީ  ތިޔަބޭފުޅުންނަށް މިދޭތެރެއިން މީޑިއާތަކުގައި އުޅުނު ވަރަށް ބާރަށް ކޮންމެ ރެޔަކު އަޅުގަނޑުމެންގެ އަވައްޓެރި ޤައުމުގެ މިލިޓަރީއާ ދިމާލަށް ގޮންޖައްސަވައި އެކި ގޮތްގޮތަށް ވާހަކަދެއްކެވި ބޭފުޅުންގެ ތެރޭގައިވެސް އެ ފައުޖުގެ ކުރީގައި ދިދަ ހުންނަވާ ބޭފުޅެއް، ތުނބުޅި ބާލައްވައިގެން އާއިލާއާއެކު ވަޑައިގަތީ އިންޑިއާއަށް ކަމަށެވެ. ދެން އެނބުރި ވަޑައިގެންނެވިއިރު ކެމެރާތައް ހުރީ އޭނާއަށް އަމާޒުވެފައި ކަމަށާއި، މޫނުގައި އަތް އަޅުއްވައި ކީރިތިކުރެއްވިހެން ހީވިކަމަށްވެސް މާރިޔާ ވިދާޅުވިއެވެ.

 "ކެމެރާތައް ހުރީ އަޅުވާފައި. [ސަމަދުބެ] ވަޑައިގެން ވާހަކަދައްކަވަމުން އަޅުގަނޑުމެންނަށް ފެނުނީ މިހެން މޫނުގައި އަތް އަޅުއްވައި، އަޅުގަނޑަށް ހީވީ ކުޑަކޮށް ކީރިތިކުރެއްވިހެން،" ސަމަދުއަށް ހަޖޫޖައްސަވަމުން މާރިޔާ ވިދާޅުވިއެވެ.

މާރިޔާގެ މިބަސްފުޅާއި ގުޅިގެން އިހުސާން އިތުރަށް ވިދާޅުވީ ދިވެހި ރާއްޖޭގެ ސަލާމަތީ ޚިދުމަތުގައި އުޅުއްވި ބޭފުޅަކަށް ހަޖޫ ޖައްސަވައި، ބޭރުގެ އަސްކަރިއްޔަތަކަށް ސަނާ ދެންނެވުން ބަލައެއް ނުގަނެވޭ ކަމަށެވެ.