ޖުމްހޫރީ ޕާޓީ (ޖޭޕީ) ގެ 4 ވަނަ ޤައުމީ ކޮންފަރެންސްގެ އިންތިޙާބުގައި ޑެޕިޔުޓީ ލީޑަރުގެ މަޤާމަށް 12 ބޭފުޅެއް ކުރިމަތި ލައްވައިފި އެވެ.

އެގޮތުން މިއަދު ޖޭޕީއިން މި މަޤާމަށް ކުރިމަތިލާފައިވާ ކެނޑިޑޭޓުންގެ ނަން ތަރުތީބުކޮށް، ކެންޑިޑޭޓު ނަންބަރާއި އެކު ލިސްޓް އާންމު ކޮށްފައެވެ.

މި ކެނޑިޑޭޓުންގެ ތެރޭގައި ހިމެނެނީ:

1. ޓްރާންސްޕޯޓް މިނިސްޓަރ އާއިޝަތު ނަހުލާ

2. ޖޭޕީގެ ލީޑަރުގެ ނައިބު ޙުސައިން ރަޝީދު ޙަސަން

3. ކުރީގެ ކެޔޮދޫ ދާއިރާގެ މެމްބަރު މޫސާ ނިޒާރު އިބްރާހިމް

4. ޖޭޕީގެ ލީޑާރުގެ ނައިބު އަމީން އިބްރާހިމް

5. ޖޭޕީގެ މިހާރު ނައިބު ރައީސް އަޙްމަދު ސަޢުދު

6. އިމިގްރޭޝަން ކޮޓްރޯލާ މުޙައްމަދު އަޙްމަދު ޙުސައިން (ހަނަފީ)

7. ޖޭޕީގެ އިސްދޫ ދާއިރާގެ ޢަލީ ޙަމީދު

8. ޖޭޕީގެ މެމްބަރު ޔަޝްފާ އަބްދުލްޣަނީ

9. ޤާސިމްގެ އެގްޒެކެޓިވް ސެކްރެޓާރީ އިޤްބާލު އާދަމް

10. ސްޓޭޓް މިނިސްޓަރ ޙަސަން މުޣުނީ

11. ތިނަދޫ ދެކުނު ދާއިރާގެ ކުރީގެ މެންބަރު ޢަބްދުﷲ އަޙްމަދު

12. ޖޭޕީގެ މެމްބަރު ޢަލީ ޝާޙް

ޑެޕިއުޓީ މަޤާމް ގެ އިތުރުން ޖޭޕީގެ ލީޑަރުގެ މަގާމަށް ކުރިމަތިލުމަށްވެސް ހުޅުވާ ލެވުނެވެ. ނަމަވެސް މިކަމަށް ސުންގަޑި އިއްޔެ ހަމަވެފައިވާއިރު، މި މަގާމަށް ޖޭޕީގެ މިހާރުގެވެސް ލީޑާރު ގާސިމް ފިޔަވައި އެހެން ބޭފުޅަކު ކުރިމަތި ނުލައްވާތީ ޖޭޕީގެ ލީޑަރު ކަމަށް ގާސިމް ވަނީ ހޮވިފައެވެ.

ޖުމްހޫރީ ޕާޓީއިން ވަނީ ކުރިއަށް އޮތް ރިޔާސީ އިންތިޚާބުގައި އެ ޕާޓީއިން ވާދަކުރާނެކަން އިއުލާނުކޮށްފަ އެވެ. އެހެން ނަމަވެސް އިންތިޚާބުގައި ވާދަކުރާނީ ޕާޓީއިން ވަކި ކެންޑިޑޭޓެއް ނެރެގެން ކަމެއް ނުވަތަ އެހެން ސިޔާސީ ޕާޓީއަކާއި އެކު ކޯލިޝަން ހަދައިގެން ކަމާމެދު އަދި ވަކި ގޮތެއް ކަނޑައަޅާފައެއް ނުވެއެވެ.

އަސާސީ ގަވާއިދު ބުނާ ގޮތުން އެ ޕާޓީގެ ކެންޑިޑޭޓް އަކަށް ވާނީ ޕާޓީގެ ލީޑަރެވެ. އެގޮތުން، 2008 ވަނަ އަހަރު އާއި 2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި ޖޭޕީގެ ކެންޑިޑޭޓެއްގެ ގޮތުގައި ޕާޓީގެ ލީޑަރު ގާސިމް ވާދަކުރެއްވިއެވެ.