މިއަހަރު ބާއްވާ ރިޔާސީ އިންތިހާބާއި ގުޅޭ ސިޓީއެއް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހު، ކޯލިޝަން ބައިވެރިންނަށް ފޮނުވައިފި އެވެ.
އެމްޑީޕީއާ އެކު މި ސަރުކާރު ހިންގާ ކޯލިޝަންގައި ހިމެނޭ ތިން ޕާޓީގެ އިސް ބޭފުޅުންނަށް ފޮނުވާފައިވާ މި ސިޓީގައި ރިޔާސީ އިންތިހާބަށް އެކުގައި ނުކުތުމަށް ރައީސް ވަނީ ދައުވަތު ދެއްވާފައެވެ.
ސަރުކާރު ހިންގާ ކޯލިޝަންގެ ޕާޓީތަކަށް ރައީސް ޞާލިހު ސިޓީފުޅެއް ފޮނުވާފައިވާއިރު، ކުރިއަށް އޮތް ރިޔާސީ އިންތިޚާބުގައި ކޯލިޝަން ހެދުމާއި ގުޅޭގޮތުން މަޝްވަރާކުރުމުގެ ބާރު އެމްޑީޕީން އެންމެ ފަހުން ބޭއްވި ޖަލްސާގައި ވަނީ ރައީސް ޞާލިހަަށް ދެއްވާފަ އެވެ.
2018 ގައި ބޭއްވި ރިޔާސީ އިންތިޚާބުގައިވެސް ކޯލިޝަން ހެދުމަށް އެމްޑީޕީ ޤައުމީ މަޖިލީހުން ރައީސް އިބްރާހީމް މުޙައްމަދު ޞާލިޙަށް އެ ބާރު ދެއްވިއެވެ. އަދި އެފަހަރުގެ އިންތިޚާބު އެމަނިކުފާނު ކާމިޔާބުކުރެއްވީވެސް ޖުމްހޫރީ ޕާޓީއާއި، އަދާލަތު ޕާޓީއާއި، އެމްއާރުއެމްއެކު ހެދި ކޯލިޝަނަކާއި އެކުގައެވެ.
އައު ޤާނޫނު އަސާސީއަށް ޢަމަލުކުރަން ފެށިފަހުން އެއްވެސް ސިޔާސީ ޕާޓީއަކަށް އެކަނި ވާދަކޮށްގެން %50 އަށްވުރެ ގިނަ ވޯޓް ހޯދައިގެން ރިޔާސީ އިންތިހާބު ކާމިޔާބުކުރެވިފައެއް ނުވާއިރު، ރައީސް ޞާލިޙްގެ ވިސްނުންފުޅަކީވެސް ކުރިއަށް އޮތް ރިޔާސީ އިންތިޚާބުގައިވެސް ކޯލިޝަނަކާއެކު ވާދަކޮށް ވެރިކަމަށް ވަޑައިގަތުންކަމަށް މީގެކުރިން ދެއްކެވި ވާހަކަފުޅުތަކުގައި ވަނީ ހާމަކުރައްވާފައެވެ.
އަދި ސަރުކާރުގެ ކޯލިޝަންގައި ހިމެނޭ އެއްވެސް ޕާޓީއަކުން މިހާތަނަށް ރިޔާސީ އިންތިހާބާ ގުޅޭ ގޮތުން އަމަލު ކުރާނެ ގޮތެއް ނިންމާފައެއް ނުވާއިރު، ދާދި ފަހުން ރައީސް ޞާލިހު ގެ އަރިސް ބޭފުޅުން ވަނީ ޖުމްހޫރީ ޕާޓީގެ ލީޑަރު ގާސިމް އިބްރާހިމާއި ބައްދަލު ކުރައްވާފައެވެ.
އަދި އެ ބައްދަލުވުމަކީ އުއްމީދީ ބައްދަލުވުމެއް ކަމަށާ، އެމްޑީޕީގެ މިސްރާބު ހުރީ ކޯލިޝަން އާއިއެކު އެމް.ޑީ.ޕީއަށް އެއްބުރުން އިންތިޚާބް ކާމިޔާބު ކުރުމަށް ކަމަށް ބައްދަލުމުގައި ބައިވެރިވެވަޑައިގެންނެވި ހުޅުމާލޭ ދާއިރާގެ މެންބަރު އަލީ ނިޔާޒް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
