ބޭރު މީހުންނަށް ތިލަފުށިން ބިން ވިއްކުމާއި ދެކޮޅަށް "ތިޔަހެން ނުވިއްކޭނެ" ޝިއާރު ދަށުން އަންނަ ހުކުރު ދުވަހު މާލޭގައި ބޮޑު ހިނގާލުމެއް ބާއްވާނެކަމަށް ޕްރޮގްރެސިވް ކޮންގްރެސް ކޯލިޝަނުން އިއުލާނުކޮށްފި އެވެ.
އެ ހިނގާލުން އިއުލާނުކޮށްފައި ވަނީ އެ ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމުގައެވެ. އެ ހަރަކާތް އޮންނާނީ އަންނަ ހުކުރުދުވަހުގެ ހަވީރު ފުރަމާލޭގައިކަމަށް އިދިކޮޅު ކޯލިޝަނުން ވަނީ ބުނެފައެވެ.
ބިން ވިއްކުމާއި ދެކޮޅަށް އިދިކޮޅުން ބާއްވާ ހިނގާލުމާއި ގުޅޭގޮތުން އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވީ، އެ ހިނގާލުމަކީ އިދިކޮޅުން ބާއްވާ އެހެން ހަރަކާތްތަކެކޭ އެއްގޮތަށް ސުލްހަވެރިކަމާއެކު ކުރިއަށް ގެންދާ ހިނގާލުމެއް ކަމަށެވެ. އަދި މިހާރު އެހަރަކާތް ކުރިއަށް ގެންދިއުމުގެ ހުއްދައަށް އެދި ފުލުހުންނަށް ސިޓީ ފޮނުވާފައިވާނެކަމަށް މުހައްމަދު އިސްމާއިލް ވިދާޅުވިއެވެ.
އޭނާ ވިދާޅުވީ އިދިކޮޅުންގެ މި ހަރަކާތަށް ފުލުހުންގެ އެއްބާރުލުން ލިބޭނެކަމަށް ގަބޫލު ކުރައްވާކަމަށެވެ. އެހެން ނަމަވެސް، ފުލުހުންގެ އެއްބާރުލުން ނުލިބުނަސް އިދިކޮޅުގެ އެ ހަރަކާތް ކުރިއަށް ގެންދާނެކަމަށް މުހައްމަދު އިސްމާއިލް ވަނީ ވިދާޅުވެފައެވެ.
އެއާއެކު އޭނާ ވަނީ އެ ހަރަކާތުގައި ވީހާވެސް ގިނަ ބަޔަކު ބައިވެރިވުމަށް ގޮވާލައްވާފަ އެވެ.
މުހައްމަދު އިސްމާއިލް ނޫސްވެރިންގެ ބައްދަލުވުމުގައި ވާހަކަދައްކަވަނީ
"އަޅުގަނޑުމެން އެދެނީ ވީހާވެސް ގިނަ ދިވެހި ރައްޔިތުން، ޚާއްސަކޮށް ވިލިމާލެ، މާލެ އަދި ހުޅުމާލޭގައި ދިރިއުޅެއްވާ އެންމެހާ ރައްޔިތުން މި ސުލްހަވެރި އިހުތިޖާޖުގައި ބައިވެރިވެދިނުން. އަޅުގަނޑުމެންގެ މިނިވަންކަމާއި ގުޅުންހުރި ވަރަށް ބޮޑު ވާހަކަތަކެއް ދެކެވެނީ، ވަރަށް ބޮޑު ކަންތައްތަކެއް މި ކުރެވެނީ. އެހެންވީމަ ވީހާވެސް ގިނަ ރައްޔިތުން ހުކުރު ދުވަހުގެ 3:45 އަށް މި ޕާޓީ (ޕީޕީއެމް) އޮފީސް ދޮރުމައްޗަށް ވަޑައިގެންދެއްވުމަށް އެދި ދައުވަތުއަރުވަން"
އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ މުހައްމަދު އިސްމާއިލް
އިދިކޮޅުން ބުނީ ބޭރު މީހުންނަށް ތިލަފުށިން ބިން ވިއްކަން ސަރުކާރުން ނިންމީ ގާނޫނާއި ޚިލާފަށް ކަމަށެވެ. އަދި އެ ބިންތައް ނުއަގުގައި ވިއްކާލުމަށް ނިންމާފައިވަނީ އިންޑިއާގެ ކުންފުނިތަކަށްކަމަށް ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީޕީއެމްގެ ނައިބުރައީސް އަހުމަދު ޝިޔާމު ތުހުމަތު ކުރެއްވި އެވެ.
އޭގެ އިތުރުން އިދިކޮޅުން ބުނީ ނުއަގުގައި ތިލަފުށިން ބިން ވިއްކުމުގެ ސަބަބުން ދިވެހި ވިޔަފާރިތަކަށް ބޮޑެތި ގެއްލުންތަކެއް ލިބިގެންދާނެ ކަމަށެވެ. އަދި އެއީ ހުއްޓުވަން ޖެހޭ ކަމެއްކަމަށެވެ.
ބިން ވިއްކުމާއި ދެކޮޅަށް އަންނަ ހުކުރު ދުވަހު އިދިކޮޅު ކޯލިޝަނުން ބޮޑު މުޒާހަރާއެއް އިއުލާނުކޮށްފައިވާއިރު، އެ ކޯލިޝަނުން ބުނީ އެކަމާއި ދެކޮޅަށް ސިލްސިލާގޮތެއްގައި މަސައްކަތް ކުރަމުންދާނެ ކަމަށެވެ. އިދިކޮޅުގެ ގާބިލުކަން ހުރި ވަރަކުން، މަޖިލީސްތެރެއިން ވެސް ބިން ވިއްކުން ހުއްޓުވުމަށް ކުރެވެން އޮތް ހުރިހާކަމެއް ކުރާނެކަމުގެ ޔަގީންކަން އިދިކޮޅުން ވަނީ ދީފައެވެ.
Advertisement
This content is created and paid for by advertisers and does not involve Voice Journalists
