ދިވެހި ދައުލަތަށް ޚިދުމަތްކުރުމުގެ އިމާނު ހާސިލްކުރެއްވި ރ. އިނގުރައިދޫ ކައުންސިލް އިދާރާގެ ސީނިއާ ކައުންސިލް އޮފިސަރ އަލްފާޟިލާ ސަމީޙާ އިސްމާޢީލްއަށް ކައުންސިލުން ހޫނު މަރުހަބާއެއް ދަންނަވައިފި އެވެ. 

ގައުމީ އިނާމާއެކު ސަމީޙާ އަނބުރާ ރަށަށް ވަޑައިގަތުމުން ކައުންސިލުން ވަނީ ރަތް ދޫލައިގައި މަރުހަބާ ދަންނަވާފައެވެ. 

ދިވެހި ދައުލަތަށް މެދުކެނޑުމެއްނެތި 35 އަހަރަށްވުރެ ގިނަދުވަހު ޚިދުމަތް ކޮށްދެއްވާފައިވާ ސަމީހާ އިސްމާއިލްގެ ޝަރަފުގައި ކައުންސިލުން ވަނީ ޚާއްސަ ހަފްލާއެއްވެސް ބާއްވާފަ އެވެ. 

ސަމީޙާ އިސްމާޢީލް، ދިވެހި ދައުލަތަށް ޚިދުމަތް ކުރައްވަން ފެށްޓެވީ، 11 މޭ 1985 ގައެވެ. ފުރަތަމަ އަދާކުރެއްވީ، އިނގުރައިދޫ އޮފީހުގެ ކާތިބާއެއްގެ ވަޒީފާއެވެ. މިވޭތުވެދިޔަ ދިގު މުއްދަތުގައި، އިނގުރައިދޫ އޮފީހުގެ ވޯކީޓޯކީ އޮޕަރޭޓަރު ކަމާއި، އެސިސްޓެންޓް ސެކްރެޓަރީކަން ކުރައްވައިފައި ވެއެވެ.

އަދި އިނގުރައިދޫ ކުޑަކަތީބު ކަމާއި، އިނގުރައިދޫ ކައުންސިލް އިދާރާގެ ޒިންމާދާރު ވެރިޔާގެ މަސްއޫލިއްޔަތާއި، ސީނިއަރ އެޑްމިނިސްޓްރޭޓިވް އޮފިސަރުގެ މަގާމުވެސް ފުރުއްވައިފައި ވެއެވެ. މިހާރު ހުންނެވީ، އިނގުރައިދޫ ކައުންސިލް އިދާރާގެ ސީނިއަރ ކައުންސިލް އޮފިސަރު ކަމުގެ މަގާމުގައެވެ.

ސަމީޙާ އިސްމާޢީލް އަދާކުރައްވައިފައިވާ މަސައްކަތްތަކުގެ ތެރޭގައި، އިނގުރައިދޫ ކައުންސިލްގެ ތިޖޫރީ ބެލެހެއްޓެވުމާއި، ކައުންސިލަރުންނާއި މުވައްޒަފުންގެ ހާޒިރީ ރިޕޯޓް ބެލެހެއްޓެވުމާއި، އިންވެންޓްރީ ބެލެހެއްޓެވުމާއި، މުވައްޒަފުންގެ އެޕްރައިޒަލް ފޯމުތައް ފޮނުއްވުމާއި، ދުވަހު ޔައުމިއްޔާއާއި، ކައުންސިލްގެ ބައްދަލުވުންތަކުގެ ޔައުމިއްޔާ ލިޔުއްވުން ހިމެނެއެވެ.

މީގެއިތުރުން، ރަށަށް ޒިޔާރަތް ކުރައްވާ ޝަރުޢީ ވަފްދުތަކާއި، އަތޮޅުވެރިޔާ ރަށްރަށަށް ވަޑައިގަތުމުން، ރަށުގައި ހުރި މައްސަލަތަކާއި، ގޯތި ދިނުމުގެ މައްސަލަތަކާ ގުޅިގެން ކުރައްވަންޖެހޭ ކަންކަންވެސް ސަމީޙާ ވަނީ ކުރައްވައިފައެވެ.

ސަމީޙާ އިސްމާޢީލަށް ލިބިވަޑައިގެންފައިވާ ހުނަރާއި ތަޖުރިބާގެ އަލީގައި، އަލަށް އޮފީހާ ގުޅޭ މުވައްޒަފުންނަށާއި، އަލަށް އިންތިޚާބުވެގެން ވަޑައިގަންނަވާ ކައުންސިލަރުންނަށް އެހީތެރިވެދެއްވައި، ހަމަޖެހިފައިވާ ގަވާއިދުތަކާއި އުޞޫލުތައް އޮޅުންފިލުއްވައި ދެއްވަމުންވެސް ގެންދަވައެވެ.

ސަމީޙާ އިސްމާއިލްގެ މަސައްކަތާއި ގުޅޭގޮތުން އިނގުރައިދޫ ކައުންސިލްގެ ރައީސް މުހައްމަދު ޖަލީލު "ވޮއިސް" އަށް ވިދާޅުވީ އޭނާއަކީ ދުވަހުން ދުވަހަށް މަސައްކަތްތައް ނިންމާ ކަމަށް ކަމޭހިތައިގެން މަސައްކަތްކުރައްވާ ބޭފުޅެއްކަމަށެވެ. 

ޝަމީހާގެ އެންމެ ފާހަގަކޮށްލެވޭކަމަކީ މީހުންނާއި ގުޅިގެން މަސައްކަތްކުރުމުގެ ރީތި ސިފަކަމަށް ޖަލީލު ވިދާޅުވިއެވެ. އެގޮތުން އޭނާ އަކީ ވަރަށް ސަކަ މިޒާޖެއްގެ ބޭކަނބަލެއްކަމަށާއި، އެކުގައި މަސައްކަތްކުރަން ވަރަށް ފަސޭހަ ބޭފުޅެއްކަމަށް ޖަލީލު ވިދާޅުވިއެވެ. 

ސަމީޙާ އިސްމާޢީލް، ސަރުކާރަށް ޚިދުމަތް ކުރައްވަމުން ގެންދަވާތާ 36 އަހަރަށްވުރެ ގިނަދުވަސް ވެއްޖެއެވެ.

ކައުންސިލްގެ ރައީސް ވިދާޅުވީ ދިވެހި ދައުލަތަށް ޚިދުމަތްކުރުމުގެ އިނާމަށް ސަމީޙާގެ ނަން ހުށައަޅާފައިވަނީ ކައުންސިލްގެ އިސްނެގުމުގެ މަތިން ކަމަށެވެ. އެގޮތުން އެކަމަށްޓަކައި ބޭނުންވާ ހުރިހާ ލިޔެކިޔުންތަކެއްވެސް ތައްޔާރުކޮށް ހުށައެޅީ ކައުންސިލްގެ ފަރާތުންކަމަށް އޭނާ ވިދާޅުވިއެވެ. 

ޖަލީލު ވިދާޅުވީ ދިގު މުއްދަތެއް ވަންދެން ސަމީޙާ ކައުންސިލާއި އިނގުރައިދޫއަށް، އަދި ދިވެހި ދައުލަތަށް ކޮށްދެއްވި ޚިދުމަތަކީ ތައުރީފު ހައްގު މަސައްކަތެއްކަމަށެވެ. އަދި އެކަމަށްޓަކައި ކައުންސިލް އިދާރާގެ ހުރިހާ މުވައްޒަފުންގެ ނަމުގައި ފަށްފަށުން ޝުކުރުއަދާކުރާކަމަށާއި، ސަމީޙާއަށް އަދަށްވުރެ ފަހި މާދަމާއެއް ދެއްކުން އެދޭކަމަށް އޭނާ ވިދާޅުވި އެވެ.