އަދާލަތު ޕާޓީން މިއަހަރުގެ ރިޔާސީ އިންތިހާބަށް ތައްޔާރުވުމުގެ މަސައްކަތްތައް ދަނީ އެހެން އަހަރު ތަކަށްވުރެ ތަރުތީބުން ކަމަށް އެ ޕާޓީގެ ރައީސް އަދި ހޯމް މިނިސްޓަރު ޢިމްރާން އަބްދުالله ވިދާޅުވެއްޖެ އެވެ. 

ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ މަސައްކަތްތައް ސިޔާސީ ޕާޓީތަކުން ފަށާފައިވާއިރު ސަރުކާރުގެ ކޯލިޝަންގައި ހިމެނޭ އަދާލަތު ޕާޓީން ވެސް އަންނަނީ އިންތިޚާބާއި ގުޅިގެން ގިނަ މަޝްވަރާ ތަކަކާއި ތައްޔާރީތަކެއް ވަމުންނެވެ. 

އެގޮތުން ވަމުންދާ ތައްޔާރީތަކާއި ގުޅޭ ގޮތުން މައުލޫމާތު ހިއްސާކުރައްވަމުން އިމްރާން ކުރެއްވި ޓްވީޓެއްގައި ވިދާޅުވީ، 2008, 2013 އަދި 2018 ވަނަ އަހަރުގެ އިންތިޚާބުގެ ތެރެއަށް އަދާލަތު ޕާޓީން ވަދެފައިވަނީ ވަރަށް ގިނަ ދިރާސާތަކާއި، މަޝްވަރާތަކާއި އަދި ހިސާބުތައް ޖެހުމަށް ފަހުގައި ކަމަށެވެ. 

"މި އަހަރު މިކަންކަން ކުރިއަށްވުރެވެސް ތަރުތީބުން ކުރެވޭ ކަމީ އުފާ ކުރާ ކަމެއް. މާތް الله އިރާދަކުރެއްވިޔާ ހެޔޮ ނަތީޖާ ފެންނާނެ." ޢިމްރާން ވިދާޅުވިއެވެ. 

ޢިމްރާން މިފަދައިން ވިދާޅުވެފައި ވާއިރު، ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި އެކު ކޯލިޝަން ހެއްދެވުމަށް އެމަނިކުފާނުގެ ސިޓީ އެއް އަދާލަތަށް ވަނީ ފޮނުއްވާފައެވެ. 

އަދި އެ ސިޓީއާއި ގުޅިގެން އަދާލަތު ޕާޓީން މަޝްވަރާތައް ކުރުމަށްފަހު، ރައީސް ޞާލިޙަށް ތާއީދު ކުރުމުގެ ކުރިން އެމްޑީޕީ އާއި ޢަދާލަތު ޕާޓީ އާއި ދެޕާޓީއިން މަޝްވަރާ ކުރުމަށް އެ ޕާޓީން ވަނީ ނިންމާފައެވެ. އަދި މިހިނގާ ރިޔާސީ ދައުރުގައި ވޭތުވެދިޔަ ދައުރުތަކާއި އަޅާބަލާއިރު ސަރުކާރުގައި ކުރެވުނީ ފަހި ތަޖުރިބާއެއް ކަމަށްވެސް ބުނެފައިވެއެވެ.