ވ. އާރަށުގެ މައްސަލައިގައި ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ދައުލަތުން އުފުލި ދައުވާތައް ސާބިތުވާކަމަށް ކަނޑައަޅާ 11 އަހަރުގެ ޖަލު ހުކުމެއް އިއްވާފައިވާއިރު، އެ މައްސަލައިގެ ޝަރީއަތް ނިންމި ގޮތުގެ ރިޕޯޓުގައި ޝަރީއަތް ހިންގައިިދިޔަގޮތް އޮޅުވާލުމަށް ގިނަ ކަންތައްތަކެއް ހިމަނާފައިވާކަމަށް ރައީސް ޔާމިންގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ އަބްދުالله ޝިޔާޒު ވިދާޅުވެއްޖެ އެވެ. 

ވ އާރަށުގެ މައްސަލަ އިސްތިއުނާފު ކުރުމުގެ މަސައްކަތް ކުރެވެމުން ދިޔައިރުވެސް ރައީސް ޔާމީންގެ ގާނޫނީ ޓީމުން އެކަން ފާހަގަކުރައްވާފައި ވެއެވެ.

އެކަމާއި ގުޅޭ އިތުރު ތަފްސީލުތައް މިއަދު ރައީސް ޔާމީންގެ ގާނޫނީ ޓީމުން ބޭއްވި ނޫސްވެރިންގެ ބައްދަލުވުމުގައި ޝިޔާޒު ވަނީ ހިއްސާކުރައްވާފަ އެވެ. 

ދެ ރިޕޯޓުގައި ހުރި ތަފާތުތަކަށް އަލިއަޅުވާލައްވާ ޝިޔާޒު ވިދާޅުވީ ދެ ރިޕޯޓުގައި ހެކިންގެ އަދަދުތައްވެސް ދިމާނުވާ ކަމަށެވެ. އެކީގައި ތައްޔާރުކުރި ދެ ރިޕޯޓުކަމަށް ވާނަމަ އެވަރުގެ ބޮޑެތި ތަފާތުތަކެއް ހުރެގެން ނުވާނެކަމަށް ޝިޔާޒު ވިދާޅުވިއެވެ. 

ދެ ރިޕޯޓުގައި ނަންބަރުތައް ތަރުތީބުކޮށްފައި ހުރި ގޮތާއި ބްލެޓިން ޕޮއިންޓުގެ ގޮތުގައި ހަދާފައި ހުރި ލިޔުންތަކުގައިވެސް ބިޑެތި ތަފާތުތަކެއް ހުރިކަން ފާހަގަކުރެވިފައި ވާކަމަށް ޝިޔާޒު ވަނީ ވިދާޅުވެފަ އެވެ. 

 ރައީސް ޔާމީންގެ ގާނޫނީ ވަކީލު ޝިޔާޒު ވިދާޅުވީ އާރަށު މައްސަލައިގެ ދިފާއީ ވަކީލުންނާއި ގުޅޭގޮތުން ދައްކާފައިވާ ވާހަކަތަކުގައި އުނިއިތުރު ގެނެސްފައިވާކަމަށް ރިޕޯޓު ދިރާސާ ކުރަމުން ދިޔައިރު ފާހަގަކުރެވިފައިވާ ކަމަށެވެ. 

އެގޮތުން ރިޕޯޓު ލިބުނުއިރު ދިފާއީ ހެކިންނާއި ބެހޭ ވަރަށް ބޮޑެތި ތުހުމަތުތަކެއް ބަޔާންކޮށްފައި ހުރިކަމަށެވެ. އެހެން ނަމަވެސް އެ ތުހުމަތުތަކަކީ ހުކުން އިއްވިއިރު ފަނޑިޔާރު ދައްކަވާފައިވާ ވާހަކަތަކެއް ނޫންކަމަށް ޝިޔާޒު ވިދާޅުވިއެވެ. އަދި އެ ދިފާއީ ހެކިންނަށް ފަނޑިޔާރު ރިޕޯޓުގައި ބަޔާންކޮށްފައިވާ ތުހުމަތުތައްވެސް ކޮށްފައި ނުވާކަމަށް ޝިޔާޒު ވިދާޅުވިއެވެ. 

ޝިޔާޒު ވިދާޅުވީ ރިޕޯޓު ދިރާސާ ކުރަމުން ދިޔައިރު އެފަދަ ވަރަށް ގިނަ ވާހަކަތަކެއް ފާހަގަކުރެވިގެން ދިޔަކަމަށެވެ. 

ދެ ރިޕޯޓުގައި ހުރި ފުށޫއަރާ ކަންތައްތަކަށް އަލިއަޅުވާލައްވާ ޝިޔާޒު ވިދާޅުވީ އެ މައްސަލައިގައި ހުށައެޅި ލިޔެކިޔުންތަކަށްވެސް ބަދަލުތަކެއް އައިސްފައިވާކަން ދެނެގަނެވިފައި ވާކަމަށެވެ. އެގޮތުން އެހެން މައްސަލައެއްގެ ދައުލަތުން ހުށައަޅާަފައި އޮންނަ ލިޔުމެއްގެ ކޮޕީ ލިޔުމެއްކަމަށް ބުނެ ހުށައަޅާފައިވާ ލިޔުންތައް މުޅިން އެހެން ލިޔުމަކަށް ބަދަލުވެފައިވާ ލިޔެކިޔުންތައްވެސް ފާހަގަކުރެވިފައިވާކަމަށް ޝިޔާޒު ވިދާޅުވި އެވެ. 

ޝިޔާޒު ވިދާޅުވީ ވ އާރަށުގެ މައްސަލައިގައި ޝަރީއަތް ނިންމި ރިޕޯޓުގައި އެ މައްސަލައިގައި ހެކިބަސް ދިން ހެކިން ނުދައްކާ ގިނަ ވާހަކަތަކެއް ހިއްސާކޮށްފައި ވާކަމަށެވެ.

ޝަރީއަތުގައި ހެކި ދިން ފަރާތްތަކުގެ ސްކްރިޕްޓް ގާނޫނީ ވަކީލުންގެ އަތްޕުޅުގައި އޮތްކަމަށާއި، ހެކިން ބުނިކަމަށް، ޝަރީއަތް ނިންމި ގޮތުގެ ރިޕޯޓުގައި ބަޔާންކޮށްފައިވާ ބައެއް ވާހަކަތަކަކީ ހެކިން ހެކިބަސް ދެމުން ދައްކާފައިވާ ވާހަކަތަކެއް ނޫންކަމަށް އޭނާ ވިދާޅުވި އެވެ. 

ޝިޔާޒު އިތުރަށް ވިދާޅުވީ މި ނޫނަސް އެފަދަ އެތައް މައްސަލައެއް ފާހަގަކުރެވިފައިވާކަމަށެވެ. ޝަރީއަތް ނިންމިގޮތުގެ ރިޕޯޓުގައި ވަރަށް ގިނަ ކަންތައްތަކެއް އޮޅުވާލައިގެން ލިޔެފައިވާކަމަށާއި، އެކަންކަން އިސްތިއުނާފު ފެށުމުން އަދި އިތުރަށް ސާފުކޮށްދެއްވާނެކަމަށް ޝިޔާޒު ވިދާޅުވި އެވެ. 

އެކަންކަން ފާހަގަކުރައްވާ ޝިޔާޒު ވިދާޅުވީ މި މައްސަލައިގައި ދައުލަތުން އުފުލި ދައުވާވެސް ހަގީގަތުގައި ސާބިތުކޮށްދެވިފައި ނުވާކަމަށެވެ. އަދި ރައީސް ޔާމީންގެ މައްޗަށް ހުކުން އިއްވި ދުވަހު ކަންކަން ހިނގައިދިޔަ ގޮތާއި، އެފަހުން އެ މައްސަލައިގެ ރިޕޯޓު ހޯދުމަށް ކުރަން ޖެހުނު މަސައްކަތަށް ބަލާއިރުވެސް މިއީ އިންސާފުން އިއްވާފައިވާ ހުކުމެއް ނޫންކަން ހާމަވެގެންދާކަމަށް އޭނާ ވިދާޅުވިއެވެ.