މިމަހު 22 ވަނަ ދުވަހުގެރޭ ދަންވަރު މެލޭޝިޔާގައި އަވަހާރަވި ރައްޔިތުން މަޖިލީހުގެ ކ.ގުރައިދޫ ދާއިރާގެ މެންބަރު އިބްރާހިމް ރިޒާގެ މައްޗަށް ޣައިބަށް ކުރެވޭ ކަށުނަމާދު މިއަދު ހުކުރު ނަމާދަށް ފަހު މާލޭ މަސްޖިދު އަލް ސުލްޠާން މުހައްމަދު ތަކުރުފާނުލް އައުޒަމް (އިސްލާމީ މަރުކަޒު) ގައި ބާއްވަން ނިންމައިފިއެވެ.
ރިޒާ އަވަހާރަވީ ކެންސަރުގެ އާލާސްކަންފުޅަށް މެލޭޝިޔާގައި ފަރުވާ ހޯއްދަވަމުން ގެންދަވަނިކޮށެވެ. އާލާސްކަންފުޅަށް ފަރުވާ ހޯއްދަވާތާ ދުވަސްތަކެއް ވެއްޖެއެވެ.
ރިޒާއަކީ އިދިކޮޅު ޕީޕީއެމްއަށް ނިސްބަތްވެ ވަޑައިގަންނަވާ މެމްބަރެކެވެ. އަދި އޭނާ އަކީ 17 ވަނަ ރައްޔިތުންގެ މަޖިލީހުން ފެށިގެން ކ. ގުރައިދޫ ދާއިރާގެ މެމްބަރުކަން ކުރައްވަމުން ގެންދަވާ ފަރާތެވެ.
ރިޒާގެ ޖަނާޒާ މިއަދު މެލޭޝިޔާގައި ބާއްވާފައި ވާއިރު، ޖަނާޒާގައި އިދިކޮޅުގެ އިސް ބައެއް މެންބަރުން ވަނީ ބައިވެރިވެ ވަޑައިގެންފަ އެވެ.
އަދި ރިޒާގެ މައްޗަށް ޣައިބަށް ކުރެވޭ އިސްލާމީ މަރުކަޒުގެ އިތުރުން ގުރައިދޫ ދާއިރާގައި ހިމެނޭ ތިން ރަށް ކަމަށްވާ ގުރައިދޫ، މާފުށި އަދި ގުޅީގައި ވެސް ކުރުން އޮންނާނެއެވެ. އެރަށްރަށުގައި ވެސް ކަށުނަމާދު ކުރުން އޮންނާނީ ހުކުރު ނަމާދަށް ފަހުއެވެ.
Advertisement
This content is created and paid for by advertisers and does not involve Voice Journalists
