ކުރިއަށް އޮތް ރިޔާސީ އިންތިޚާބުގައި ސަރުކާރު ހިންގާ މައި ޕާޓީ އެމްޑީޕީގެ އެންމެ އިސް ލީޑަރު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ތާއީދުކުރުމަށް އެމްޑީއޭއިން ނިންމި ނިންމުމަށް ރައީސް ޞާލިހު މަރުހަބާ ދަންނަވައިފި އެވެ.
މިއަހަރު ބާއްވާ ރިޔާސީ އިންތިހާބުގައި ވާދަ ކުރައްވަން މީގެ ކުރިން އެމްޑީއޭގެ ރައީސް އަދި މީދޫ ދާއިރާގެ މެމްބަރު އަހުމަދު ސިޔާމް މުޙައްމަދު ނިންމެވިއެވެ. އެކަމަކު ފަހުން ވަނީ މިފަހަރުގެ ރިޔާސީ އިންތިހާބަށް ކުރިމަތިލުމުގެ ބަދަލުގައި އެހެން ޕާޓީއަކާއެކު ކޯލިޝަނެއްގެ ގޮތުގައި އިންތިހާބަށް ނިކުތުމަށެވެ.
އެގޮތުން ކޯލިޝަން ހެދުމުގެ ދައުވަތު އިދިކޮޅު ކޯލިޝަނުންނާއި ވެރިކަން ކުރާ އެމްޑީޕީގެ ފަރާތުންވެސް އެމްޑީއޭއަށް ވަނީ ދީފައެވެ.
އެމްޑީއޭއަށް ކޯލިޝަން ހެދުމަށް ދައުވަތު ދެއްވުމުގެ ކުރިން ރައީސް އޮފީހުގައި ރައީސް ޞާލިހާއި ސިޔާމް ބައްދަލުކުރައްވައި މަޝްވަރާތަކެއް ކުރައްވާފައިވެއެވެ. އެއަށްފަހު ރައީސް ޞާލިހް ގެ މަންދޫބުން އެމްޑީއޭގެ ވެރިންނާ ބައްދަލުކުރައްވައި މަޝްވަރާކުރައްވާފައިވެއެވެ.
އަދި ރިޔާސީ އިންތިޚާބުގައި ކޯލިޝަން ހެދުމާއި ގުޅިގެން އެމްޑީއޭއިން މިއަދު ބުނީ، ދިވެހި ރައްޔިތުންގެ ލާބަޔާއި މަންފާއަށްޓަކައި އަދި ދިވެހިރާއްޖޭގެ ސިޔާސީ މަސްރަހުގައި ހަމަޖެހުން ގާއިމް ކުރުމަށްޓަކައި، ރައީސް ޞާލިހަށް ދެވަނަ ދައުރެއް ހޯދައިދެއްވުމަށްޓަކައި އެމަނިކުފާނާއިއެކު ކޯލިޝަން ހަދައިގެން މަސައްކަތް ކުރުމަށް އެ ޕާޓީގެ ކައުންސިލުން މިއަދު ނިންމާފައިވާ ކަމަށެވެ.
އެމްޑީއޭގެ އެ ނިންމުމަށް މަރުހަބާ ދަންނަވާ ރައީސް ޞާލިހު ކުރެއްވި ޓްވީޓުގައި ވިދާޅޫވީ އަންނަ ރިޔާސީ އިންތިޚާބު އެމަނިކުފާނަށް ކާމިޔާބުކޮށްދިނުމަށް އެމްޑީއޭއިން އެމަނިކުފާނުގެ ފަހަތްޕުޅަށް އެރީތީ ޝުކުރު އަދާކުރާކަމަށެވެ. އަދި އެމްޑީއޭއާއެކު ޤައުމު ތަރައްގީކުރުމަށް އެމަނިކުފާނު ފެއްޓެވި މަސައްކަތްޕުޅު މަޑު ނުޖެހި ކުރިއަށް ގެންދެވޭނެކަމަށް ޔަގީންކުރައްވާކަމަށް ވެސް ރައީސް ޞާލިހު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
