މި ސަރުކާރު ދަމަހައްޓާ ފޯމިއުލާ ކުރަހާ ކުލަޖައްސަމުން ދާކަމަށް އަދާލަތު ޕާޓީގެ ރައީސް އަދި މި ސަރުކާރުގެ ހޯމް މިނިސްޓަރު އިމްރާނު އަބްދުﷲ ވިދާޅުވެއްޖެ އެވެ.
އިމްރާނު މިފަދައިން ވިދާޅުވެފައިވަނީ ކުރިއަށް އޮތް ރިޔާސީ އިންތިޚާބުގައި އަދާލަތު ޕާޓީން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ތާއީދުކުރައްވަން ނިންމެވި ނިންމުން ދިފާއުކުރައްވާ ކުރެއްވި ޓްވީޓއެއްގަ އެވެ.
އެގޮތުން އިމްރާނު ވިދާޅުވީ ގައުމު ވެއްޓިފައި މިއޮތް ހިސާބުން ކުރިއަށް ގެންދެވޭނީ ކުރިއަށް އޮތް ރިޔާސީ އިންތިޚާބުގައި އަމާން ސަރުކާރެއް ޤާއިމްކުރެވިގެން ކަމަށެވެ.
ސަރުކާރަށް ތާއީދުކުރަން ނިންމީ އެ މަސައްކަތް ކާމިޔާބު ކުރުމަށް ކަމަށާއި، ސަރުކާރު ދެމެހެއްޓުމަށްޓަކައި ކުރަން ޖެހޭ މަސައްކަތްތައް ކުރަމުންދާކަމަށް އިމްރާނު ވިދާޅުވިއެވެ. އަދި ވިދާޅުވީ، އެ މަސައްކަތް ކާމިޔާބުވާތަން ރައްޔިތުންނަށްވެސް ދާދި އަވަހަށް ފެނިގެންދާނެ ކަމަށެވެ.
"ގައުމު ވެއްޓިފައި އޮތް ހިސާބުން ކުރިއަށް ގެންދެވޭނީ މިއަހަރު ސްޓޭބަލް ސަރުކާރެއް ގާއިމްކުރެވިގެން. އެ ފޯމިއުލާގެ މަންޒަރުގައި މިދަނީ ކުރަހާ ކުލަޖައްސަމުން. ﷲ އިރާދަކުރެއްވިއްޔާ އެ މަންޒަރުގެ ކުލަތައް ލަސްތަކެއް ނުވެ ރައްޔިތުންނަށް ސާފުވާނެ"
ހޯމް މިނިސްޓަރު އިމްރާނު އަބްދުﷲ
އަދާލަތު ޕާޓީން އެމްޑީޕީއާއެކު ކޯލިޝަން ހެދުމަށް ނިންމި ނިންމުމަށް ގިނަ ފާޑުކިޔުންތަކެއް ވަނީ އަމާޒުވެފަ އެވެ. އެގޮތުން އަދާލަތުގެ އެ ނިންމުން ގޯސްކަމަށް 100 އަށްވުރެ ގިނަ ދީނީ އިލްމުވެރިން ވަނީ އިއްތިފާގުވެފައެވެ.
އެކަމަށްޓަކައި ދީނީ އިލްމުވެރިންގެ ޖަމުއިއްޔާއަކުން ހުޅުވާލި އޮންލައިން ޕޯލްއެއްގައި އަދާލަތުގެ ނިންމުން ގޯސްކަން ފާހަގަކޮށް ގިނަ އިލްމުވެރިން ވަނީ ވޯޓުލާފަ އެވެ.
އެފަހުން އަދާލަތު ޕާޓީގެ ރައީސް އިމްރާނު ވިދާޅުވީ، އަދާލަތުގެ މަޝްވަރާ މަޖިލީހުން ކަންކަން ނިންމަނީ ވަރަށް ބޮޑަށް ވިސްނަވާފައި ކަމަށެވެ. ރައީސް ޞާލިހާއެކު ކޯލިޝަން ހަދަން އަދާލަތުން ނިންމީ ހިސާބުތައް ޖަހައިގެންކަމަށްވެސް އިމްރާނު ވިދާޅުވެފައި ވެއެވެ.
Advertisement
This content is created and paid for by advertisers and does not involve Voice Journalists
