ފަންނުވެރިކަމުގެ ދާއިރާއިން ޒުވާނުން ތަމްރީނުކުރުމަށް "ފަންނުވެރިޔާ" ޕްރޮޤްރާމްގެ ދަށުން އާޓް އެންޑް ކްރާފްޓް ވޯކްޝޮޕެއް ބެއްވުމަށް މާލެ ސިޓީ ކައުންސިލުން ނިންމާފިއެވެ.

ސިޓީ ކައުންސިލްގެ 70 ވަނަ ރަސްމީ އާއްމު ޖަލްސާގައި ޒުވާނުންނަކީ ހުނަރުވެރި ބަޔަކަށް ހެދުމަށްޓަކައި ޔޫތް ޕްރޮޤްރާމެއް ކުރިއަށް ގެންދިއުމަށް ނިންމާފައިވެއެވެ. މިކަމުގެ ދަށުން ކުރިއަށް ގެންދިއުމަށް ހަމަ ޖެހިފައިވާ އާޓް އެންޑް ކްރާފްޓް ވޯކްޝޮޕްގައި ބައިވެރިވުމަށް ހުޅުވާލައި ސިޓީ ކައުންސިލުން ވަނީ އިއުލާން ނެރެފައެވެ.

1 މަސްދުވަހަށް ކުރިއަށް ގެންދިޔުމަށް ހަމަ ޖެހިފައިވާ މި ވޯކްޝޮޕްގައި ބައިވެރިވުމަށް 18 އަހަރާއި 25 އަހަރާއި ދެމެދުގެ ދެ ޖިންސްގެ ޒުވާނުންނަށް ވަނީ ހުޅުވާލައިފައެވެ.

މި ވޯކްޝޮޕަކީ ފީއެއް ދެއްކުމެއް ނެތި ހިލޭ ކުރިއަށް ގެންދާ ވޯކްޝޮޕެކެވެ. އަދި ވޯކްޝޮޕް ފެށުމަށް އަންނަ މާރޗް މަހު ހަމަ ޖެހިފައިވާއިރު، މާރޗް މަހުގެ 8 ގެ 14:00 ގެ ކުރިން ފޯމް ފުރުމަށްފަހު ހުށަހެޅުމަށް އަންގާފައިވެއެވެ.

އެގޮތުން ގޫގުލް ފޯމް ލިންކު މެދުވެރިކޮށް ފޯމް ފުރުމަށްފަހު  ނުވަތަ ސިޓީ ކައުންސިލްގެ ވެބްސައިޓްގައި އިއުލާނާއި އެއްކަރުދާސް ކުރެވިފައިވާ ފޯމް ފުރުމަށްފަހު [email protected] އަށް އީމެއިލް ކުރެވިދާނެއެވެ.

ވޯކްޝޮޕް ކުރިއަށް ގެންދެވޭނީ ހަފްތާއަކު 4 ދުވަހު 3 ދަންފަޅިއަކަށް ބަހާލައިގެން ކަމަށާއި ބައިވެރިން ބޭނުންވާ ކޮންމެ ދަންފަޅިއެއްގައި ބައިވެރި ވެވޭނެ ކަމަށް އިއުލާނުގައިވެއެވެ.

މީގެ އިތުރުން މިކަމަށް ބެނުންވާ ސާމާނު ސިޓީ ކައިންސިލުން ފޯރުކޮށްދޭނެ ކަމަށާއި ވޯކްޝޮޕް ފުރިހަމަ ކުުރުމުން ހަނދާނީ ލިޔުމެއް ފޯރުކޮށްދެވިގެން ދާނެ ކަމަށް ވެސް އިއުލާން ކޮށްފައިވެއެވެ.