ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގެ ރ. އަތޮޅު ފައިނަލުގައި މިއަދު ހަވީރު އެންމެ ފަހުގެ ޗެންޕިއަން ދުވާފަރު ބަލިކޮށް އިނގުރައިދޫ އިން ޗެންޕިއަންކަން ހޯދައިފިއެވެ.

ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑުޖަހައި ލީޑު ހޯދީ ދުވާފަރުންނެވެ. ފުރަތަމަ ހާފު ފެށިގެން ފަސް ވަނަ މިނެޓުގައި އެޓީމަށް ލީޑު ހޯދައިދިނީ އާދަމް އިލްޔާސް އެވެ. މިއީ އިނގުރައިދޫ ޓީމުގެ ކީއްޕަރަށް ހެދުނު ގޯހެއްގެ ފައިދާނަގައި އިލްޔާސް ކާމިޔާބުކުރި ލަނޑެކެވެ.

ފައިނަލް މެޗުގެ ފުރަތަމަ ހާފު ނިމުމުގެ ކުރިން އިނގުރައިދޫއަށް ނަތީއްޖާ އެއްވަރުކޮށްދިނީ ކެޕްޓަން އަލީ ހާފިޒް އެވެ. މިއީ އެޓީމުގެ އައިހަމް މުޅިން ހުސްކޮށްލާަފައި ގޯލުކުރިމައްޗަށް ހުރަސްކޮށްދިން ބޯލައެއް ގޯލްތެރެއަށް ފޮނުވާލައިގެން އޭނާ ކާމިޔާބުކުރި ލަނޑެކެވެ. ދެޓީމުގެ ފަރާތުން ވަރުގަދަ އެޓޭކިން ކުޅުމެއް ފެނިގެންދިޔަ މި މެޗުގެ ފުރަތަމަ ހާފު ނިމުނީ 1-1 ގެ ނަތީއްޖާއަކުން ދެޓީމު އެއްވަރުފައި އޮވެގެންނެވެ.

ދެވަނަ ހާފުގައި އިނގުރައިދޫ އިން ވަރަށް ކުރީކޮޅު ލަނޑެއް ކާމިޔާބުކޮށް މި މެޗުގައި ފުރަތަމަ ފަހަރަށް ލީޑުނެގިއެވެ. މި ލަނޑު ދެވަނަ ހާފު ފެށިގެން ފަސް ވަނަ މިނެޓުގައި ކާމިޔާބުކޮށްދިނީ މުހައްމަދު މަމްދޫހު އެވެ. މިއީ އެޓީމުގެ ކެޕްޓަން އަލީ ހާފިޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. 

އިނގުރައިދޫ އިން ލީޑުނެގިތާ މިނެޓެއްނުވަނީސް ދުވާފަރުން މެޗުގެ ނަތީއްޖާ އެއްވަރުކުރިއެވެ. މި ލަނޑު އެޓީމަށް ކާމިޔާބުކޮށްދިނީ މުހައްމަދު އިސާމް އެވެ.

ފައިނަލް މެޗުގައި އިނގުރައިދޫ ޓީމަށް ދެވަނަ ފަހަރަށް ލީޑު ހޯދައިދިނީ ވެސް މި މެޗުގައި މޮޅުކުޅުމެއް ދެއްކި އަލީ ހަފީޒް އެވެ. މި ލަނޑާއި އެކު 3-2 ގެ ނަތީއްޖާއަކުން އިނގުރައިދޫ ކުރިގައިއޮވެ މެޗު ނިމެންދަނިކޮށް އެންމެ ފަހު މިނެޓުގައި ދުވާފަރަށް ނަތީއްޖާ އެއްވަރުކޮށްދިނީ މި މެޗުގައި އެޓީމުން އެންމެ ރަގަޅު ކުޅުމެއްދެއްކި މުހައްމަދު އިސާމް އެވެ. މިއާއެކު މެޗުގެ ކުޅުން ނިމިގެން ދިޔައީ 3-3 ގެ ނަތީއްޖާއަކުން ދެޓީމު އެއްވަރުވެގެންނެވެ. އަދި ނަތީއްޖާ ނެރުމަށް ޖެހި ޕެނަލްޓީގައި އިނގުރައިދޫ ޓީމުންޖެހި ފަސް ޕެނަލްޓީ އެޓީމުން ކާމިޔާބުކުރި އިރު ދުވާފަރު ޓީމުން ޖެހި ފަސް ޕެނަލްޓީގެ ތެރެއިން ކާމިޔާބުކުރެވުނީ ހަތަރު ޕެނަލްޓީ އެވެ.

ދުވާފަރު ޓިމުގެ ފަސް ވަނަ ޕެނަލްޓީ މުހައްމަދު އިސާމް ފޮނުވާލުމުން އިނގުރައިދޫ ޓީމުގެ ކީއްޕަރު އިހުސާން ވަނީ ދިފާއުކޮއްފައެވެ. މިއާއެކު އިނގުރައިދޫ ޓީމަށް ރ.އަތޮޅުގެ ޗެންޕިއަންކަން ލިބިގެންދިޔައި ކުޅުނު ހުރިހާ މެޗަކުން މޮޅުވެ ސަތޭކަ ޕަސެންޓް މޮޅުވުމުގެ ރެކޯޑަކާއި އެކުގައެވެ. ފައިނަލް މެޗުގެ މޮޅު ކުޅުންތެރިއާގެ އިތުރުން މުބާރާތުގެ އެންމެ މޮޅު ކުޅުންތެރިއަކަށް ހޮވުނީ މިރޭގެ ފައިނަލް މެޗުގައި އިނގުރައިދޫ ޓީމަށް ދެ ލަނޑު ކާމިޔާބުކޮށްދިން އެޓީމުގެ ކެޕްޓަން އަލީ ހާފިޒެވެ. އެންމެ ގިނަ ލަނޑުޖެހި ކުޅުންތެރިއަކަށް ހޮވުނީ މީދޫ ޓީމަށް 10 ލަނޑު ކާމިޔާބުކޮށްދިން ރަޝާހް އަބްދުލް މަތީން އެވެ.