ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި "ކުޅެން" އުޅުމަށްވުރެ ރަނގަޅު ވާނީ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ބޯވާ ނަގަން ދިޔައީޔާ ކަމަށް ވިދާޅުވެ އިހަވަންދޫ ދާއިރާގެ މެންބަރު މުހައްމަދު ޝިފާއުގެ ބަހުގެ ހަމަލާތަކެއް އާޒިމަށް ރައްދު ކުރައްވައިފި އެވެ. 

ރައީސް ޞާލިހްގެ އިތުބާރު ނެތް ކަމުގެ ވޯޓު ނަގާނެ ކަމުގެ އިންޒާރު އާޒިމް ދެއްވުމާއި ގުޅިގެން ޝިފާއު އެކަމަށް ރައްދު ދެއްވައި ކުރެއްވި ޓްވީޓެއްގައި ވިދާޅުވީ، ޑީއާރުޕީ މީހުންނާ، އެލްޕީ އެމްޑީޕީގެ ދުވަސް ދުއްވާލަން ކުރަމުންދާ މަސައްކަތަށް ޖާގަ ދެވެން ނެތް ކަމަށެވެ. 

"ރައީސުލްޖުމްހޫރިއްޔާ އާއި "ކުޅެން" އުޅުމަށްވުރެ ރަނގަޅު ވާނީ އާޒިމް ބޯވާ ނަގަން ފަރަށް ދިޔައީޔާ" ޝިފާއު ވިދާޅުވި އެވެ. 

މީގެ އިތުރުން، އެމްޑީޕީގެ ރައީސް، އަދި މަޖިލީހުގެ ރައީސް،  މުހައްމަދު ނަޝީދު ރައީސް ކަމުގެ މަގާމުން ވަކިކުރަން އުޅޭ ކަމަށް އާޒިމް ވިދާޅުވުމާއި ގުޅިގެން އެ ވާހަކައަށް ރައްދު ދެއްވައި ޝިފާއު ވަނީ ރައީސް ނަޝީދު ބާކީކުރަން އެ ޕާޓީން ނޫޅޭ ކަމަށް ވިދާޅުވެފައެވެ. 

އެމްޑީޕީއެ އެތެރޭގެ އިންތިޚާބުގައި އުފެދުނު ކޯޅުންތަކުގައި ޕާޓީ ބައިވެ ދެ ފެކްޝަނަށް ބެހިފައިވާއިރު، ދެ ބައިމީހުންގެ ދެމެދުގައި އޮތް ނުތަނަވަސްކަން ދުވަހެއް ދުވަހަށް ދަނީ އިތުރުވަމުން ނެވެ. 

ދެ ފެކްޝަނުންގެ މެމްބަރުންގެ މެދުގައި ހޫނު ބަހުގެ ހަމަލާތަކެއް ބަދަލުކުރެވެމުންދާއިރު، އެންމެ ގަދައަށް ދެކެވޭ އެއް ވާހަކައަކީ މަޖިލީސް ރައީސްގެ މަގާމުން ނަޝީދު ވަކިކުރާ ވާހަކައެކެވެ. 

އެގޮތުން ނަޝީދު ވަކިކުރުމަށް ބޭނުންވާ ގާނޫނީ އަދަދަށް މެމްބަރުންގެ ތާއީދު ލިބިފައިވާކަމަށް އެމްޑީޕީގައި ތިއްބަވާ ސަރުކާރަށް ތާއީދުކުރައްވާ މެމްބަރުން މީގެ ކުރިން ވަނީ ވިދާޅުވެފައެވެ. އަނެއްކާވެސް އެ ބަހުސް ހޫނުވެފައިވާ މި ފަނޑިވަޅުގައި އަލީ އާޒިމް ކުރެއްވި ޓްވީޓެއްގައި ވަނީ އެ މަސައްކަތް ހުއްޓާ ނުލާނަމަ ރައީސް ޞާލިހުގެ އިތުބާރު ނެތްކަމުގެ ވޯޓުނަގަން މަޖިލީހަށް ހުށައަޅާނެކަމަށް ވިދާޅުވެ އިންޒާރު ދެއްވާފަ އެވެ. 

އާޒިމްގެ ޓްވީޓުގައި ވަނީ މަޖިލީސް ރައީސްކަމުން ނަޝީދު ވަކިކުރުމަށް މަޖިލީހުގައި އެމްޑީޕީގައި ތިބި ސަރުކާރަށް ތާއީދުކުރާ މެމްބަރުން މަސައްކަތް ކުރާކަަން އިޝާރާތް ކުރައްވާފަ އެވެ. އަދި އެކަން ހުއްޓާނުލައިފި ނަމަ ރައީސް ޞާލިހުގެ މައްސަލަވެސް މަޖިލީހަށް ވައްދާނެކަމަށް ވިދާޅުވެފަ އެވެ. 

"މަޖިލީހުގެ ރައީސް ވަކިކުރަން ވޯޓު ހަމަކުރަން މަސައްކަތް ފަށައިފިނަމަ ރައީސް ޞާލިހުގެ އިތުބާރު ނެތްކަމުގެ ވޯޓު ހަމަކުރުމުގެ މަސައްކަތް އަޅުގަނޑުމެން ފަށާނަން" އާޒިމް ވިދާޅުވިއެވެ.