އާއްމު ގޮތެއްގައި ހެޔޮލަފާ މީހުން ލޯބިވާނީ ވެސް ހެޔޮލަފާ މީހުން ދެކެ ކަމަށާ، ނުބައި މީހުން ލޯބިވާނީ ވެސް ނުބައި މީހުން ދެކެ ކަމަށް އަދާލަތު ޕާޓީގެ ރައީސް އަދި ހޯމް މިނިސްޓަރު ޢިމްރާން އަބްދުالله ވިދާޅުވެއްޖެ އެވެ. 

އަންނަ ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއިދު ކުރަން ޢަދާލަތު ޕާޓީން ނިންމުމާއި ގުޅިގެން ގިނަ ބައެއްގެ ފާޑުކިޔުންތައް އެޕާޓީ އާއި ޢިމްރާނަށްވެސް ރައްދުވަމުންދާ މި ދަނޑިވަޅުގައި، ޢިމްރާން ކުރެއްވި ޓްވީޓެއްގައި އޭނާ ވަނީ، އެންމެ ހެޔޮލަފާ، ޞާލިހް އަދި ތަގުވާވެރި އިންސާނަކަށް ވެސް އެންމެންގެ ރުހުމާއި ތާއީދު ނުލިބޭ ކަމަށް ވިދާޅުވެފައެވެ. 

އަދި ހަމައެހެން، އެންމެ ނުބައި، ނުލަފާ، ޖައްބާރު މީހާއަށް އެންމެން ދެކޮޅުވެރިވެ، ނަފްރަތު ވެސް ނުކުރާ ކަމަށް އޭނާ ވިދާޅުވި އެވެ. 

"އާއްމު ގޮތެއްގައި ހެޔޮ މީހުން ލޯބި ވަނީ ހެޔޮ މީހުން ދެކެއެވެ. ނުބައި މީހުން ލޯބިވާނީ ނުބައި މީހުން ދެކެއެވެ." ޢިމްރާން ވިދާޅުވިއެވެ. 

ކުރިއަށް އޮތް ރިޔާސީ އިންތިހާބުގައި ރައީސް ޞާލިހަށް ތާއީދު ކުރަން އަދާލަތުން ނިންމާފައިވަނީ ދީނާއި ގައުމަށް އެންމެ ރަނގަޅު އަދި މަސްލަހަތު ހުރި ގޮތަކީ އެއީ ކަމަށް އެ ޕާޓީން ބުނެފައިވާއިރު، ރާއްޖޭގެ ގިނަ ޢިލްމުވެރިންނާއި ދީނަށް ލޯބި ކުރާ މީހުން އަންނަނީ އެ ނިންމުމަށް ފާޑު ކިޔަމުންނެވެ.

އަދި މި ވެރިކަަމުގައި ހަށިވިއްކުމާއި، ފާހިޝް ކަންކަމާއި، މަސްތުވާތަކެތީގެ މައްސަލަ ތައް އިންތިހާއަށް ގިނަ ވެފައިވާއިރު، ރައީސް ޞާލިހު ގެ މި ފަސް އަހަރު ފަދަ އަނިޔާވެރި ފަސް އަހަރެއް ނުދެކޭ ކަމަށްވެސް ޢިލްމުވެރިން އަންނަނީ ބުނަމުންނެވެ.