ޖުމްހޫރީ ޕާޓީގެ ނައިބު ލީޑަރުންގެ މަގާމު، އެ ޕާޓީގެ ލީޑަރު ގާސިމް އިބްރާހިމް ގެ އަރިސް ބޭފުޅުން ކާމިޔާބު ކުރައްވައިފިއެވެ.

ޖޭޕީގެ 7 މަޤާމަކަށް ބޭފުޅުން އިންތިޚާބުކުރުމަށް އިއްޔެ ވޯޓު ނަގާފައިވާއިރު އެންމެ ވާދަވެރި މަގާމަކަށް ވެގެން ދިޔައީ ނައިބު ލީޑަރުކަމުގެ މަގާމެވެ.

އެ މަގާމަށް 12 ބޭފުޅުން ކުރިމަތިލައްވާފައި ވާއިރު މަގާމަށް އިންތިހާބު ކޮށްފައިވަނީ އެތަނުން އެންމެ ގިނަ ވޯޓު ލިބުނު 5 ބޭފުޅުންނެވެ. 

އެގޮތުން، މަގާމަށް ކުރިމަތި ލެއްވި ބޭފުޅުންގެ ތެރެއިން އެންމެ ގިނަ ވޯޓު ލިބިފައިވަނީ ގާސިމް އިބްރާހިމްގެ އަނބިކަނބަލުން އަދި ޓްރާންސްޕޯޓް މިނިސްޓަރު އާއިޝަތު ނަހުލާއެވެ. ނަހުލާ އާއި ޖެހިގެން ދެން ނައިބު ލީޑަރުންނަށް ހޮވިވަޑައިގަތީ ކުރީގެ ޓްރާންސްޕޯޓް މިނިސްޓަރު އަދި ޖޭޕީގެ ކުރީގެ ނައިބު ރައީސް އަމީން އިބްރާހިމް، ޖޭޕީގެ ކައުންސިލްގައި މިހާރު ވެސް ހިމެނިވަޑައިގަންނަވާ އިގްބާލް އާދަމް، ޖޭޕީގެ ކުރީގެ ނައިބު ރައީސް އަހުމަދު ސައުދު އަދި ފުވަމުލަކު އުތުރު ދާއިރާގެ ކުރީގެ މެންބަރު އަލީ ޝާހް އެވެ.

ނައިބު ލީޑަރުންނަށް ހޮވިވަޑައިގެންނެވި ބޭފުޅުންގެ ތެރެއިން އަމީން އަކީ އެންމެ ގިނަ ދުވަހު ގާސިމް އާއިއެކު ސިޔާސީ ހަރަކާތްތަކުގައި ބައިވެރިވެ ވަޑައިގެންނެވި އެއްބޭފުޅާއެވެ. އިގްބާލް އަކީ ގާސިމްގެ ޕާސަނަލް ސެކްރެޓަރީ އެވެ. ސައުދު އަކީ ގާސިމް އާއި އާއިލީ ގުޅުން އޮންނަ ބޭފުޅެކެވެ.

ޖޭޕީގެ ޑެޕިއުޓީ ލީޑަރުގެ މަގާމަށް އިންތިހާބުވި އަމީން: ފޮޓޯ/ ވޮއިސް

ނާއިބު ލީޑަރުންގެ މަގާމަށް ވާދަކުރެއްވި އެހެން ބޭފުޅުންގެ ތެރޭގައި، ސްޓޭޓް މިނިސްޓަރު ހަސަން މުޣުނީ، އިމިގްރޭޝަން ކޮންޓްރޯލާ މުހައްމަދު އަހްމަދު ހުސައިން (ހަނަފީ)، ފިޝަރީޒް މިނިސްޓަރު ޙުސައިން ރަޝީދު ޙަސަން، ކުރީގެ ކެޔޮދޫ ދާއިރާގެ މެމްބަރު މޫސާ ނިޒާރު އިބްރާހިމް އަދި ތިނަދޫ ދެކުނު ދާއިރާގެ ކުރީގެ މެންބަރު އަބްދުالله އަހުމަދު ހިމެނެއެވެ.

ޑެޕިއުޓީ ލީޑަރުގެ އިންތިހާބުގައި ވޯޓުލުމަށް 741 މީހުން ރަޖިސްޓަރީ ކުރި އެވެ. އޭގެ ތެރެއިން ވޯޓު ލާފައި ވަނީ 680 މީހުންނެވެ.