އަދާލަތު ޕާޓީގެ އިސް ލީޑަރުން އިމާމުންނަށް އެރުމުން، އެމީހުންގެ ފަހަތަށް ނާރަން އާންމުން މިސްކިތްތަކުން ވެސް މިހާރު ފައިބަމުންދާކަމަށް ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ. 

ޑރ ޖަމީލު މިފަދައިން ވިދާޅުވެފައިވަނީ އަދާލަތަށް އާންމުން ކުރި އިތުބާރު ގެއްލި، އެ ޕާޓީގެ އިސް ލީޑަރުންނަށް ނަފްރަތު ކުރާކަން ސިފަކުރައްވާ ކުރެއްވި ޓްވީޓެއްގަ އެވެ. 

އެގޮތުން ޑރ ޖަމީލު ވިދާޅުވީ އިސްލާމުދީނުގެ ބަލަދުވެރިންކަމަށް އަދާލަތު ޕާޓީ ހެދިގެން އުޅުނު ނަމަވެސް، އެމީހުންނަކީ މާއްދީ އެޖެންޑާއެއް އޮތް ބައެއްކަން ރައްޔިތުންނަށް ސާފުވާކަމަށެވެ.

އިސްލާމްދީނަށް ފުރައްސާރަކޮށް ލާދީނީ ރިޕޯޓު ނެރުނު އެމްޑީއެންގެ އިސް ބޭފުޅުން ސަރުކާރުގެ އިސް ފަޑީގައި ތިބިއިރު، އަދި ދީނާއި ޚިލާފު އެތައް ކަމެއް ފެތުރުމަށް ފުރުސަތު ދީފައި އޮތް އިރު، އަދާލަތުން ސަރުކާރު ދިފާއުކުރަމުން ދާ ދިއުމުންވެސް އަދާލަތުގެ މާއްދީ އެޖެންޑާ ފެނިގެންދާކަމަށް ޑރ ޖަމީލު ވިދާޅުވި އެވެ. 

އެވާހަކަތަކާއި ގުޅުވާ ޑރ ޖަމީލު ވިދާޅުވީ، އަދާލަތުގެ އިސް ލީޑަރުން އިމާމުކަމަށް އެރުމުން، އެ މިސްކިތްތަކުގައި ތިބޭ އާންމުން، މިސްކިތްތަކުން ފައިބަމުންދާ ކަމަށެވެ. 

އެހާވެސް ބޮޑަށް އާންމުންގެ މެދުގައި އަދާލަތަށް އޮތް އިޚްތިރާމާއި އިތުބާރު ކުޑަވެފައިވާކަން ޑރ ޖަމީލު ވަނީ ސިފަކުރައްވާފަ އެވެ. އަދި އާންމުންގެ އެ އަމަލުތަކުން ވަރަށް ގިނަ ވާހަކަ ބުނެދޭކަމަށް ޑރ ޖަމީލު ވިދާޅުވިއެވެ.