މިދިޔަ ޖަނަވަރީމަހު ގްރީން ޓެކްސްގެ ގޮތުގައި އެންމެ ގިނަ އަދަދަކަށް ފައިސާ ލިބިފައިވަނީ ކ.އަތޮޅާއި އދ.އަތޮޅުން ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ފިނޭންސް މިނިސްޓްރީން އާއްމުކޮށްފައިވާ ތަފާސްހިސާބުތަކުން ދައްކާގޮތުން މިދިޔަ ޖަނަވަރީމަހު، ގްރީން ޓެކްސްގެ ގޮތުގައި ދައުލަތަށް 100.7 މިލިއަން ރުފިޔާ ވަނީ ލިބިފައެވެ. މީގެތެރޭގައި ހިމެނެނީ ރިސޯޓް، ގެސްޓްހައުސް އަދި ހޮޓެލްތަކުން ގްރީން ޓެކުހުގެ ގޮތުގައި 98.9 މިލިއަން ރުފިޔާ އާއި، ސަފާރީތަކުން ލިބިފައިވާ 1.8 މިލިއަން ރުފިޔާގެ އިތުރުން ހޯމްސްޓޭ ފެސިލިޓީތަކުން ލިބިފައިވާ 2113 ރުފިޔާއެވެ.

ފިނޭންސް މިނިސްޓްރީން ނެރެފައިވާ ގްރީން ޓެކްސް ރިޕޯޓުގައި ވާ ގޮތުން މިދިޔަ ޖެނުއަރީ މަހު ގްރީން ޓެކްސްގެ ގޮތުގައި އެންމެ ގިނަ އަދަދެއްގެ ފައިސާ ލިބިފައިވާ ކ. އަތޮޅުން ގްރީން ޓެކްސްގެ ގޮތުގައި 37 މިލިއަން ރުފިޔާ ދައުލަތަށް ލިބިފައިވެއެވެ. އެއީ އެ އަތޮޅުގެ ރިސޯޓުތަކުން ލިބުނު 34.7 މިލިއަން ރުފިޔާ އާއި ގެސްޓްހައުސްތަކުން ލިބިފައިވާ 2.3 މިލިއަން ރުފިޔާއެވެ.

Advertisement

ދެވަނައަށް އެންމެ ގިނަ އަދަދަކަށް ގްރީން ޓެކްސްގެ ގޮތުގައި ފައިސާ ލިބިފައިވަނީ އދ. އަތޮޅުންނެވެ. މިއަހަރުގެ ޖެނުއަރީ މަހު އެ އަތޮޅުގެ ރިސޯޓުތަކުންނާއި ހޮޓާ އަދި ގެސްޓްހައުސްތަކުން ގްރީން ޓެކްސްގެ ގޮތުގައި ޖުމްލަ 12.4 މިލިއަން ރުފިޔާ ދައުލަތަށް ވަނީ ލިބިފައެވެ

ޖަނަވަރީ މަހު ތިންވަނައަށް އެންމެ ގިނަ އަދަދަށް ގްރީން ޓެކްސްގެ ގޮތުގައި ފައިސާ ލިބުނީ ރ. އަތޮޅުންނެވެ. އެ އަތޮޅުގެ ރިސޯޓްތަކުން އެކަނިވެސް 8.5 މިލިއަން ރުފިޔާ ގްރީން ޓެކްސްގެ ގޮތުގައި ލިބިފައިވެއެވެ. 

ފިނޭންސް މިނިސްޓްރީން އާންމުކޮށްފައިވާ ތަފާސް ހިސާބުތަކުން ދައްކާ ގޮތުގައި ޖެނުއަރީ މަހު އެންމެ މަދު އަދަދަކަށް ގްރީން ޓެކްސް ލިބިފައިވަނީ ފުވައްމުލަށް ސިޓީންނާއި ފ. އަތޮޅުގެ އިތުރުން ހދ. އަތޮޅުންނެވެ. ފުވައްމުލަށް ސިޓީން ގްރީން ޓެކްސްގެ ގޮތުގައި ދައުލަތަށް 9،203 ރުފިޔާ ލިބުނު އިރު، ފ. އަތޮޅުން ލިބިފައިވަނީ 10،459 ރުފިޔާއެވެ. އަދި ހދ. އަތޮޅުން 460،365 ރުފިޔާ ގްރީން ޓެކްސްގެ ގޮތުގައި ދައުލަތަށް ލިބިފައިވެެއެވެ

ފިނޭންސް މިނިސްޓްރީގެ ހިސާބުތައް ދައްކާގޮތުން ޖަނަވަރީ މަސް ނިމުނުއިރު ގްރީން ފަންޑުގައި ހުރީ ޖުމްލަ 798 މިލިއަން ރުފިޔާއެވެ.