އުފަންވާއިރު ލިބޭ ދަރިފުޅުގެ ކިބައިގައި ހުންނަ އައިބުތަކުން ރައްކާތެރިވާން ކުރެވިދާނެ ކަންތައްތަކެއް ކުޑަ ކުދިންގެ ޚާއްސަ ޑޮކްޓަރު އަހުމަދު ފައިސަލް ފައިސަލް ހާމަކޮށްދެއްވައިފި އެވެ. 

ޑރ. ފައިސަލް ލިޔުއްވާފައި ލިޔުމެއްގައި ބުނީ، އުފަންވާއިރު ހުންނަ ހުރިހާ އައިބަކުން ރައްކާތެރިވާނެގޮތް އަދި ހޯދިފައިނުވިޔަސް، އައިބުތަކުން ރައްކާތެރިވާން ކުރެވިދާނެ ކަންތައްތަކެއް ދިރާސާތަކުން އެނގިފައިވާ ކަމަށެވެ. އަދި މަންމަ ރަނގަޅު ޞިއްހަތެއްގައި ހުރުމަށް ކުރާ މަސައްކަތްތަކަކީ ޞިއްހަތު ރަނގަޅުކުއްޖަކު ހޯދުމަށް ކުރެވޭނެ އެންމެ މުހިއްމު ކަންތައް ކަމަށްވެސް އެ ލިޔުމުގައި ފާހަގަކޮށްފައިވެއެވެ. 

އެގޮތުން ފާހަގަކުރެވޭ މައިގަނޑު 5 ކަމެއް ޑޮކްޓަރު ހާމަކޮށްދެއްވާފައިވާއިރު، މާތް الله ގެ އިރާދަފުޅާއެކު ޞިއްހަތު ރަނގަޅު ދަރިފުޅަކުހޯދުމަށް އެކަންތައްތައް ކުރުމަށް ވަނީ ނަސޭހަތްތެރިވެފައެވެ.

ފޯލިކްއެސިޑުގެ ފައިދާ ފުރިހަމަގޮތުގައި ލިބުމަށްޓަކާ ފޯލިކުއެސިޑުގެ ގުޅަ މަދުވެގެން މާބަނޑުވުމުގެ އެއްމަސް ދެމަސް ކުރިން ކާން ފެށުމަށް ޑޮކްޓަރ އިރުޝާދު ދެއްވާފައިވެއެވެ. އަދި ބަނޑަށް 3މަސް ވާންދެން ކާންވާނެ ކަމަށާ، ކޮންމެ ދުވަހަކުވެސް 400 މައިކުރޯގުރާމް ބޭނުން ކުރަންވާނެ ކަމަށްވެސް ވިދާޅުވި އެވެ. 

މީހެ އިތުރުން، މާބަދައިގެ އައިބު ތަކުގެ ތެރެއިން ސުޕައިނާ ބައިފިޑާފަދަ  ނިއުރަލްޓިއުބް ޑިފެކްޓް އެއް ހުރި ކުއްޖަކު ކުރިން ލިބިފައިވާނަމަ މިދެންނެވި ޑޯޒް އަށްވުރެ 10 ގުނަ މަތިވާންޖެހޭނެ ކަމަށާ އެއީ 4 މިލިގުރާމް ކަންވެސް ވިދާޅުވި އެވެ. މިއާއެކު ޑޮކްޓަރ ވަނީ ފޯޓިފައިޑްނުކޮށް ހުންނަ ކާތަކެތިން ފޯލިކުއެސިޑުގެ 400 މައިކުރޯގުރާމް  ލިބުމަކީ ނާދިރުކަމެއްކަން ފާހަގަކުރައްވައި ރާއްޖޭގައި ފޯޓިފައިޑް ގޮވާން ބާޒާރުގައި ނުހުންނަ ކަމަށް ލިޔުއްވާފައި ވެއެވެ. އެހެންކަމުން މިވަގުތު ފޯލިކުއެސިޑުލިބެންއޮތް ގޮތަކީ ގުޅަކެއުން ކަން ފާހަގަކުރެއްވިއެވެ.

ބައެއްކަހަލަ ބޭސްތަކަކީ ދަރިފުޅު ބަނޑުގައި އުފެދެމުން އަންނައިރު ޚާއްޞަކޮށް ފުރަތަމަ ދުވަސްކޮޅު، އެބޭސްތަކުގެ ސަބަބުން ދަރިފުޅު އައިބުވުމަށް ފުރުސަތުއޮތް ބޭސްތަކެއްކަން ދިރާސާއިން ދައްކައެވެ. އަދި ބައެއްކަހަލަ ބޭސްތަކަކީ މައިމީހާގެ ހުންނަ ބައްޔަކަށް ކޮންމެހެން ކާންޖެހޭ ބޭސްތަކެކެވެ.

ވީމާ މާބަނޑުވުމަށް ވިސްނާއިރު ޑރ އަށް ދައްކާ ލަފާހޯދުން މުހިންމު ކަމަށް ޑރ. ފައިސަލްގެ ލިޔުމުގައި ވެއެވެ. 

ރުބެއްލާ އަދި ފާނަބަސަންދު ފަދަ ވައިރަސް ތަކުން ބަނޑުގައި އޮންނަ ދަރިފުޅު އައިބުވެއެވެ.

އެހެން ކަމުން ދުވަހަކުވެސް މި ދެބަލި ނުވަތަ ބައްޔަށް ވެކްސިން ޖަހާފާނުވާނަމަ މާބަނޑޫވުމުގެ ކުރިން ވެކްސިން ޖެހުން މުހިއްމުކަން ޑރ. ފާހަގަކުރެއްވިއެވެ.  އެއީ މި ދެވެކްސިންއަކީ މާބަނޑުއިރު ނުޖެހޭނެ ވެކްސިނަަށް ވާތީއެވެ. 

ބަރުދަން މާމަތިނަމަ ލިބޭދަރިފުޅު އައިބުވުމުގެ ފުރުސަތު ބޮޑެވެ. ވީމާ ބަރުދަން ރަގަނޅުމިނުގައި ހިފެހެއްޓުމަށް މަސައްކަތްކުރުމަށް ޑރ. ވަނީ އިރުޝާދު ދެއްވާފަ އެވެ. 

ދުންފަތާއި މަސްތުވާ ތަކެތި ފަދަ ތަކެތިން އަބަދުވެސް ދުރުވެ، ތިމާ އުޅޭ މާހައުލުވެސް މިކަމުން ރައްކާތެރި ކުރުމަށް ޑރ. ފައިސަލް ވަނީ ނަސޭހަތްތެރިވެފައެވެ. އަދި މިކަމުގައި ފިރިމީހާވެސް އެހީތެރިވެދިނުމަށް ވަނީ އެދިލައްވާފައެވެ.