ސޮނީ ސްޕޯޓްސް ގޯލްޑެން ފުޓްސަލް ޗެލެންޖު 2023 ގެ ޒޯން ދޭއްގެ ފައިނަލުގެ ދެވަނަ ލެގުގައި އޭދަފުށި 2-0 ގެ ނަތީއްޖާއަކުން ބަލިކޮށް އިނގުރައިދޫ އިން މުބާރާތުގެ ޗެންޕިއަންކަން ހޯދައިފިއެވެ.

ޒޯން ދޭއްގެ ފައިނަލުގެ ފުރަތަމަ ލެގު 3-1 ގެ ނަތީއްޖާއަކުން އިނގުރައިދޫ މޮޅުވެފައި އޮތުމުން މިރޭގެ މެޗު އެއްވަރުކޮށްގެން ވެސް ޗެންޕިއަންކަން ހޯދުމުގެ ފުރުސަތު އެޓީމަށް އޮތެވެ.

ނަމަވެސް މިއަހަރުގެ މުބާާރާތުގައި ކުޅުނު ހުރިހާ މެޗަކުން މޮޅުވެ އަތޮޅު ޗެންޕިއަންކަން ހޯދާފައިވާ އިނގުރައިދޫ ޓީމުން މިރޭގެ މެޗުގައިވެސް ފެނުނީ އިދިކޮޅު ޓީމަށް ވުރެ ވަރުގަދަކޮށެވެ.

މިރޭގެ ފައިނަލް މެޗު ފުރަތަމަ ހާފުގައި އިނގުރައިދޫ ޓީމަށް ލީޑު ހޯދައިދިނީ މިރޭގެ މެޗުގެ މޮޅުކުޅުންތެރިއަކަށް ހޮވުނު މުހައްމަދު މަމްދޫހު އެވެ. އަދި އެޓީމުގެ ދެވަނަ ލަނޑު މެޗުގެ ދެވަނަ ހާފުގައި ކާމިޔާބުކޮށްދިނީ އަހުމަދު އައިހަމް އެވެ.

މުބާރާތުގެ އެންމެ ގިނަ ލަނޑުޖެހި ކުޅުންތެރިއާގެ އިތުރުން ޒޯން ދޭއްގެ މޮޅު ކުޅުންތެރިއާގެ މަގާމް ލިބުނީ ވެސް ފައިނަލު މެޗުގެ ދެ ލެގުގައިވެސް މޮޅުކުޅުމެއް ދެއްކި އިނގުރައިދޫ ޓީމުގެ އަހުމަދު އައިހަމް އަށެވެ.

މި މުބާރާތުގައި އިގުރައިދޫ ޓީމުގެ މީޑިއާ ޕާޓްނަރަކަށް ވޮއިސް އެމްވީ ހަމަޖައްސާފައިވާއިރު، އެޓީމުގެ ސްޕޮންސަރުންނަކީ ޒީން، ސުޕާރީ ފިހާރަ އަދި ބޯލްޑް އެވެ. އެޓީމުގެ ކިޓް ސްޕޮންސާރ އަކީ ޖާޒިއާ އެމްވީ އެވެ.