މާލެ ދަތުކުރާ މުދާ އުފުލާ ބޯޓެއްގައި އަލިފާން ރޯވެ އެކަކު ގެއްލިގެން ހޯދަން ފަށައިފިއެވެ.

އެމްއެންޑީއެފްއިން ބުނީ މ . ތުވަރު ކައިރިން ދަތުރުކުރަމުން ދިޔަ "އާގަލާ" ކިޔާާ މާލެ ދަތުރު ކުރާ ބޯޓެއް ގައި އަލިފާން ރޯވެގެން ސެންޓްރަލް އޭރިއާ ކޮމާންޑުން ދަނީ ހަރަކާތްތެރިވަމުންދާ ކަމަށެވެ. އަދި ހާދިސާގެ ރިޕޯޓް ކޯސްޓްގާޑަށް ލިބުނީ ރޭ މެންދަމު 2:47 ހާއިރުގައި ކަމަށެވެ. 

އެމްއެންޑީއެފްއިން އިތުރަށް ބުނީ، ބޯޓުގައި ވަރަށް ބޮޑަށް އަލިފާން ރޯވުމުގެ ސަބަބުން އެ ބޯޓުން ދަތުރުކުރި 15 ފަޅުވެރިން ކަނޑަށް ފުންމާލުމުގެ ސަބަބުން ކަނޑުވެފަ ތިއްބައި، އެމްއެންޑީއެފް ސެންޓްރަލް އޭރިއާ ކޯސްޓްގާޑް ތާޑް ސްކޮޑްރަންގެ ސިފައިން އެމީހުންގެ ތެރެއިން ފެންނަންތިބި 14 މީހުން ސަލާމަތްކޮށްފައިވާ ކަމަށެވެ. އަދި ފުލުހުންގެ އެހީތެރިކަމާއެކު ސަލާމަތް ކުރެވުނު މީހުން މ. މުލީ ހޮސްޕިޓަލަށް ގެންދެވިފައިވާ ކަމަށްވެސް ބުނެފައިވެއެވެ.  

އެ ބޯޓުން ދަތުރުކުރަމުންދިޔައީ، 5 ދިވެހިންނާއި، އިންޑިއާ 5 މީހުންނާއި އަދި ބަންގްލަދޭޝް 5 މީހުން ކަމަށާ، އޭގެ ތެރެއިން ގެއްލިފައިވަނީ އިންޑިޔާ މީހެއް ކަމަށްވެސް އެމްއެންޑީއެފް އިން މައުލޫމާތު ދެއެވެ. އެމީހާ ހޯދުމުގެ މަސައްކަތް ކަނޑާއި ވައިގެ މަގުން ކުރަމުންދާކަމަށް އެ އިދާރާއިން ބުނެފައިވެއެވެ. 

މީގެ އިތުރުން އެމްއެންޑީއެފްއިން ބުނީ، އެ ބޯޓުގައި ވަނީ ވަރަށް ބޮޑަށް އަލިފާން ރޯވެފައި ކަމަށާ، އަލިފާން ރޯވެ ލިބުނު ގެއްލުމުގެ ސަބަބުން، މިއަދު ގާތްގަނޑަކަށް 8:20 ގައި އެ ބޯޓު އަޑިއަށް ގޮސްފައިވާ ކަމަށެވެ.