ކ. ތިލަފުށީ ކުޑަގިރިއަށް އެރި ބޯޓު ތިން މިލިއަނުން ޖޫރިމަނާ ކޮށްފިއެވެ.

އީޕީއޭއިން ކުރި އިއުލާނެއްގައި ބުނީ، "އޭއެމް އެމްއެސްވީ. މަރިޔާ ސިންތަޔަތިރައި ރިޔަނަ" ނަމަކަށް ކިޔާ ބޯޓު ކ.އަތޮޅު ތިލަފުށީ ކުޑަގިރިއަށް އެރުމާއި ގުޅިގެން ތިމާވެއްޓަށް ލިބުނު ގެއްލުންތަކަށް ޖޫރިމަނާ ކޮށްފައިވާ ކަމަށެވެ.

މި ބޯޓު ކުޑަގިރިއަށް އަރާފައި ވަނީ  31 ޖެނުއަރީ 2023 ގައެވެ.

ބޯޓު ފުންކޮށް ނިމުމުން އެ ސަރަޙައްދުގެ ތިމާވެށްޓަށް ލިބުނު ގެއްލުންތައް ބެލުމަށް ބޯޓުގެ ވެރިފަރާތުން ސާރވޭކޮށް ސާރވޭ ރިޕޯޓު އީޕީއޭއާ ޙިއްސާކޮށްފައި ވާކަމަށާއި އަދި އެ އެޖެންސީގެ ސަރވެޔަރުން އެ ސަރަޙައްދަށް ގޮސް ސަރވޭއެއް ކޮށްފައިވާކަމަށް އީޕީއޭއިން ބުންޏެވެ.

"މިގޮތުން، ބޯޓުގެ ވެރިފަރާތުން މި އެޖެންސީއަށް ޙިއްސާކޮށްފައިވާ ސާރވޭ ރިޕޯޓަށާއި މި އެޖެންސީން އެ ސަރަޙައްދަށް ގޮސް ކޮށްފައިވާ ސާރވޭގެ، ސާރވޭ ރިޕޯޓަށް ރިޢާޔަތްކޮށް MSV. MARIA SINTHAYATHIRAI RIYANA އުޅަނދު ތިލަފުށި ކުޑަގިރި ފަރަށް (RF0563) އެރުމުގެ ސަބަބުން 130 އަކަމީޓަރުގެ ސަރަޙައްދަކަށް އެކިވަރުގެ ގެއްލުން ލިބިފައިވާކަން ވަނީ ފާހަގަކުރެވިފައި" އީޕީއޭއިން ބުންޏެވެ.

މި ބޯޓު ފަރަށް އެރުމާ ގުޅިގެން އެ ފަރުގެ މާހައުލަށް ލިބުނު ގެއްލުންތަކަށް، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހެދިފައިވާ ތިމާވެށްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލުހޯދުމުގެ ޤަވާޢިދުގެ ދަށުން 3,098,710.00ރ (ތިން މިލިއަން ނުވަދިހަ އަށްހާސް ހަތްސަތޭކަ ދިހައެއް ދިވެހި ރުފިޔާ) އިން އެ އުޅަނދުގެ ވެރިފަރާތް ވަނީ ޖޫރިމަނާ ކޮށްފައެވެ.

އަދި ޖޫރިމަނާގެ ފައިސާ 30 ދުވަހުގެ ތެރޭގައި އީޕީއޭއަށް ދެއްކުމަށް 28 ފެބްރުއަރީ 2023 ގައި އީޕީއޭއިން ވަނީ އަންގާފައެވެ.