އައްޑު އަތޮޅުގައި ހުންނަ ގަން އިންޓަނޭޝަނަލް އެއާޕޯޓު އިންޝުއަރެންސް ކޮށްދޭނެ ފަރާތެއް ހޯދަން އިއުލާންކޮށްފިއެވެ.

ގަން އިންޓަނޭޝަނަލް އެއާޕޯޓުން އިއްޔެ ކުރި އިއުލާނެއްގައި ބުނީ އެއް އަހަރު ދުވަހަށް އެ އެއާޕޯޓް އިންޝުއަރެންސް ކޮށްދޭނެ ދިވެހި ކުންފުންޏެއް ހޯދަން ބޭނުންވާ ކަމަށެވެ. 

މީގެ އިތުރުން، އެ އިއުލާނުގައި ބުނީ އެ އެއާޕޯޓަށް ބޭނުންވާ އިންޝުއަރެންސް ޕޮލިސީތަކަކީ، އެއާޕޯޓް ލައިބިލިޓީ އިންޝުއަރެންސް، ޕްރޮޕަޓީ އޯލް ރިސްކް، ބިޒްނަސް އިންޓަރަޕްޝަން އިންޝުއަރެންސް އަދި ޓެރަރިޒަމް އިންޝުއަރެންސް އެވެ.

އެއާޕޯޓް އިންޝުއާ ކޮށްދިނުމަށް ޝައުގުވެރިވާ ފަރާތްތަކުން މިމަހުގެ 13 ވަނަ ދުވަހުގެ ކުރިން ބިޑް ހުށަހެޅުމަށް އައްޑޫ އެއާޕޯޓުން ވަނީ އެދިފައެވެ.

ގަން އިންޓަރނޭޝަނަލް އެއަރޕޯޓް އިންޝުއަރެންސް ކޮށްދޭނެ ފަރާތެއް ހޯދަން އިއުލާން ކޮށްފައިވާއިރު، އެ އެއާޕޯޓް ތަރައްޤީކުރުމުގެ މަޝްރޫޢު އިންޑިއާގެ ރެނާޓަސް ކުންފުންޏާ މިމަހު 5 ވަނަ ދުވަހު ވަނީ ހަވާލުކޮށްފައެވެ..

އެ އެއާޕޯޓު ތަރައްގީކުރަނީ އިންޑިއާގެ އެގްޒިމް ބޭންކުން ރާއްޖެއަށް ދޫކޮށްފައިވާ ލައިން އޮފް ކްރެޑިޓްގެ ދަށުން، 17 މިލިއަން ޑޮލަރު (272.2 މިލިއަން ރުފިޔާ) ހަރަދުކޮށްގެންނެވެ.

މި މަޝްރޫއުގެ ދަށުން އަހަރަކު 1.5 މިލިއަން ފަސިންޖަރުންނަށް ހިދުމަތް ދެވޭ ވަރުގެ ޒަމާނީ ވަސީލަތްތަކާ އެކުގައި ޕެސެންޖާ ޓާމިނަލް ތަރައްޤީ ކުރަން ވަނީ ނިންމާފައެވެ. ހަމައެއާއެކު އާ ކޮންޓްރޯލް ޓަވަރަކާއި ފަޔާ ސްޓޭޝަން އިމާރާތް ކުރުމަށް ވަނީ ހަމަޖެހިފައެވެ. އަދި އެއާޕޯޓަށް ބޭނުންވާ ކޯލްޑް ސްޓޯރޭޖާއެކު ކާގޯ ވަސީލަތްތައް ތަރައްގީ ކުރުމުގެ އިތުރުން އެއާޕޯޓުގެ މަގުތައް ތަރައްގީކޮށް ޕާކިން ސަރަހައްދެއް ވެސް ތަރައްގީ ކުރުމަށް ވަނީ ހަމަޖެހިފައެވެ.

އަދި މީގެ އިތުރުން ފިހާރަތަކާއި ރެސްޓޯރެންޓުތަކާއި ލައުންޖު އަދި އެ ނޫން ވެސް އެއާޕޯޓް ތަރައްގީ ކުރުމާ ގުޅޭ އެހެނިހެން ގިނަ ކަންތައްތަކެއް މި މަޝްރޫއުގެ ތެރެއިން ކުރުމަށް ވަނީ ހަމަޖހެިފައެވެ.