ހިޔާ ފްލެޓްތަކާއި، މއ. ވޭސައިޑް އަދި ގ.ގާކޮށީގެ ފްލްޓްތަކުން އިދާރީ ގަވާއިދުތަކާއ އުސޫލުތަކާއި ޚިލާފުވާ ފަރާތްތަކާއި ދޭތެރޭ ފިޔަވަޅު އަޅާނެ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފިއެވެ.

މިކަމާއި ގުޅިގެން އެޗްޑީސީއިން ވަނީ މިއަދު ދެ އިއުލާން ނެރިފައެވެ.

އެގޮތުން މއ. ވޭސައިޑް އަދި ގ.ގާކޮށީގެ ފްލެޓުތަކުގައި ދިރިއުޅޭ ފަރާތްތަކާއި ގުޅިގެން ނެރިފައިވާ އިއުލާނުގައި ވަނީ އެ އިމާރާތުގެ އާންމު ބައިތަކުގައި ގަސްމުށި، ފަރުނީޗަރު، ކުނި އަދި ބާކީ ތަކެތި، އަދި އެހެނިހެން ހިފާގެންގުޅޭ ތަކެތި ބެހެއްޓުމާއި، އެސީ އައުޓްޑޯ ޔުނިޓްގެ ފެންހޮޅިތަކުން ތިރިއަށް ފެންލީކްވާގޮތަށް ދޫކޮށްލާފައި ހުންނަކަމާއި، އަދި އިމާރާތުގެ އަލިފާން ނިއްވާ ނިޒާމުގެ ފަޔަރ ހޯސް ބޮކްސް ތަކުގެ ކައިރީގަޔާއި މަތީގައި ތަކެތި ބަހައްޓާފައި ހުންނަކަން އެ ކޯޕަރޭޝަނަށް ވަނީ ފާހަގަކުރެވިފައި ކަމަށެވެ.

އަދި މިފަދަ ކަންކަން އިސްލާހު ކުރުމަށް ތަކުރާރުކޮށް ދެންނެވިފައިވާ ކަމަށެވެ.

މަތީގައި ދެންނެވުނު ފަދަ ކަންކަމަކީ އިމާރާތުގެ ސަލާމަތާއި ރައްކާތެރިކަން ގެއްލިގެންދާ ފަދަ ކަންކަމަށްވުމުން، އިމާރާތުގައި ދިރިއުޅުއްވާ ހުރިހާ ފަރާތެއްގެ ލާބައަށްޓާކައި މި ފަދަ ކަންކަން ނުކުރުމަށް އެޗްޑީސީއިން ވަނީ އިލްތިމާސް ކޮށްފައެވެ.

މިއާއިއެކު ހިޔާ ފްލެޓުތަކުގައި ދިރިއުޅޭ ފަރާތްތަކާއި ގުޅިގެން ނެރިފައިވާ އިއުލާނުގައި ވަނީ އެ އިމާރާތުން ބޭރަށްވާ ގޮތަށް ގަސްމުށި، ފަރުނީޗަރު އަދި އެހެނިހެން ހިފާގެންގުޅޭ ތަކެތި ބެހެއްޓުމާއި، އިމާރާތުގެ ވައިގޮޅިއަށް ހަރުކުރެވިފައިވާ އޭސީ އައުޓްޑޯ ޔުނިޓްގެ ފެންހޮޅިތަކުން ތިރިއަށް ފެންލީކުވާގޮތަށް ފެންހޮޅި ތިރިއަށް ދޫކޮށްލާފައިވާކަން އެ ކޯޕަރޭޝަނަށް ފާހަގަކުރެވިފައިވާ ކަމަށެވެ.

އަދި މިފަދަ ކަންކަން އިސްލާހު ކުރުމަށް ތަކުރާރުކޮށް ދެންނެވިފައިވާ ކަމަށެވެ.

ހިޔާ ސަރަހައްދަކީ ވައިގަދަ ސަރަހައްދަކަށްވެފައި ގަސްމުށިފަދަ ތަކެތި ނުނަގާ ދޫކޮށްލުމަކީ މިސަރަހައްދުގައި އުޅޭ ފަރާތްތަކަށް ބޮޑެތި ނުރައްކާތަކެއް ކުރިމަތިވެދާނެ ފަދަ ކަމަކަށްވާތީވެ، ހުރިހާ ބޭފުޅުންވެސް ދެންނެވުނު އުސޫލާއި އެއްގޮތަށް އަމަލު ކުރެއްވުމަށް އެޗްޑިސީއިން ވަނީ އިލްތިމާސް ކޮށްފައެވެ.

މިއާއިއެކު މަތީގައި ދެންނެވުނު ކަންކަމަކީ ތިން ފުލެޓުވެސް ވިއްކުމުގެ އެއްބަސްވުމުގެ ދަށުން ފުލެޓުގެ ވެރިފަރާތުން ޒިންމާވާންޖެހޭ ކަންކަން ކަމުގައި ވަނީ ބުނެފައެވެ.

ވީމާ މަތީގައި ބަޔާންކޮށްފައިވާ ކަންކަމަށް ސަމާލުކަންދީގެން އިމާރާތުގައި ހެދިފައިވާ އުސޫލުތަކާއި ހިލާފަށް ހުރި ކަންކަން، މއ. ވޭސައިޑް އަދި ގ.ގާކޮށީގެ ފްލްޓްތަކުން 20 މާރިޗް 2023 ގެ ކުރިން ރަނގަޅުކުރުމަށް އެޗްޑީސީއިން ވަނީ އަންގާފައެވެ. އަދި ހިޔާ ފްލެޓުތަކުން މަތީގައި ބަޔާންކޮށްފައިވާ ކަންކަމަށް ސަމާލުކަންދީގެން 15 މާރޗް 2023 ގެ ކުރިން ރަނގަޅުކުރުމަށް ވަނީ އަންގާފައެވެ.

އަދި ދެންނެވުނު ތާރީޚުގެ ކުރިން މިކަންކަން ރަނގަޅު ކޮށްފައި ނުވާ ފަރާތްތަކާއިމެދު އެއްބަސްވުުމުގައި ވާ ގޮތުގެ މަތިން އެ ކޯޕަރޭޝަނުން ފިޔަވަޅު އަޅަމުންގެންދާނެ ކަމަށް ހެޗްޑީސީއިން ވަނީ ފާހަގަކޮށްފައެވެ.