އަންހެނުން ކަމަކަށް ކުރިމަތިލާނަމަ ވަރަށް ދުއްތުރާތަކާއި ކުރިމަތިވާ ކަމަށާ އެހެން ނަމަވެސް ގޮތްދޫކޮށް ނުލެއްވުމަަށް ޖުމްހޫރީ ޕާޓީގެ ޑެޕިއުޓީ ލީޑަރު އަދި ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.

ބައިނަލްއަގްވާމީ އަންހެނުންގެ ދުވަހާއި ގުޅުވައިގެން ޖޭޕީގެ ފަރާތުން ރޭ ބޭއްވި ހަފްލާގައި ވާހަކަދައްކަވަމުން ނަހުލާ ވިދާޅުވީ، އޭނާ ސިޔާސީ ހަރަކާތްތަކަށް ނުކުތް އިރު އެތައް ބައިވަރު ގޮންޖެހުންތަކާއި، އުނދަގޫތަކަކާއި ކުރިމަތިވި ކަމަށެވެ. އެގޮތުން ސަރުކާރުގެ ޓްރާންސްޕޯޓް މިނިސްޓަރުގެ މަގާމަށް އޭނާ ހުރުމުން، އެކަމާއި ގުޅިގެން ބައެއް ފިރިހެނުން ގެންގުޅެމުންދިޔަ ވިސްނުމުގެ ސަބަބުން ވަރަށް އުނދަގޫވި ކަމަށްވެސް ވިދާޅުވި އެވެ. 

މިއާއެކު ނަހުލާ ވިދާޅުވީ، އަންހެނުން ކަމަކާ ކުރިމަތިލާން ނުކުމެއްޖެ ނަމަ، ވަރަށް އުނދަގޫތަކާއި ދުއްތުރާތަކާއި ކުރިމަތިވާ ކަމަކީ އެންމެންވެސް ގަބޫލުކުރަންޖެހޭ ހަގީގަތެއް ކަމަށެވެ. 

ނަހުލާ އިތުރަށް ވިދާޅުވީ، ބައެއް އަންހެން ކަނބަލުން ކަންކަމާއި ކުރިމަތިލާއިރު، ވަޒީފާއި މާހައުލުގައި، އާއި ގޭގައި އަދި އެނޫން ކަންކަމުގައިވިޔަސް އެހީވާނެ ފަރާތްތައް ވަަރަށް މަދު ކަމަށެވެ. އެހެންކަމުން، އެފަދަ އެންމެހާއި ކަނބަލުންނަށް ވެސް އެހީވުމަށް އަންހެނުން އިސްނަގަން ޖެހޭ ކަމަށް އޭނާ ވިދާޅުވިއެވެ. އެހެނީ ރާއްޖޭގެ ނިސްބަތުން ބެލި ނަމަވެސް، ދުނިޔޭގެ ނިސްބަތުން ބެލި ނަމަވެސް އަންހެނުންގެ އަދަދުވެސް ގިނަ ކަން ނަހުލާ ފާހަގަކުރެއްވިއެވެ. ވުމާއެކު އެހެން މީހުން ކުރާ ފުރައްސާރަ އަކަށް ބެލުމެއްނެތި އަންހެނުންގެ ފަހަތުގައި އަންހެނުން ތިބެގެން ކުރިއަށް ދިޔުމަށް ނަހުލާ ވަނީ ކަނބަލުންގެ ކިބައިން އެދިލައްވާފައެވެ. 

މި މޭރުމުން ވާހަކަ ދައްކަވަމުން ނަހުލާ އިތުރަށް ވިދާޅުވީ،  ގޭތެރޭގެ މައްސަލަތަކުގައި އާއި އޮފީސް ތެރޭގައި ދިމާވާ މައްސަލަތަކުގައި އަޑު އުފުލައި އެ ވާހަކަ ދައްކަން ނުކެރޭ އަދި އިތުރުން، އެވާހަކަ އެހެން މީހަކާއި ހިއްސާ ކުރަން ނުކެރޭ ވަގުތުތައް ދާ ކަަމަށެވެ. 

އެހެންކަމުން ނަހުލާ ވަނީ، ކޮންމެ ފިކުރެއްގެ ބަޔަކުވެސް ކޮންމެ އެންޖީއޯއެއްވެސް، ސަރުކާރުގެ ކޮންމެ މުވައްސަސާއެއް ވިޔަސް، އަންހެނަކު ކުރިއަރުވަން ކަމެއް ކުރާނަމަ އެ މީހަކަށް ވެވޭ ވަރަކުން އެހީވުމަށް އެދިފައެވެ.