ހުސްވެފައިވާ ރައްޔިތުންގެ މަޖިލީހުގެ ކ.ގުރައިދޫ ދާއިރާގެ ގޮނޑިއަށް މެމްބަރަކު އިންތިޚާބު ކުރުމަށް ބާއްވާ ބައި-އިލެކްޝަނުގައި ވާދަކުރާނެކަން މޯލްޑިވްސް ތާޑްވޭ ޑިމޮކްރެޓްސް (އެމް.ޓީ.ޑީ) އިން އިއުލާނުކޮށްފި އެވެ.
އެމްޓީޑީން ވަނީ އެ އިންތިޚާބުގައި އެ ޕާޓީން ވާދަކުރާނެ މީހަކު ކަނޑައެޅުމަށް ޕްރައިމަރީ ބޭއްވުމަށް ނިންމާފައެވެ. އަދި އިންތިޚާބުގައި ވާދަކުރުމުގެ ފުރުސަތު ހުޅުވާލާފަ އެވެ.
އެގޮތުން އެމްޓީޑީން ކުރި އިއުލާނުގައި ވަނީ ކ، ގުރައިދޫ ދާއިރާގެ ބައި-އިލެކްޝަނަށް ވާދަކުރަން ބޭނުންވާ މެމްބަރުން އެކަމަށް އެދި ހުށައަޅާ އީމެއިލް 11 މާޗު ވާ ހޮނިހިރު ދުވަހުގެ 17:00 އާއި ހަމަޔަށް ފޮނުމަށް އަންގާފަ އެވެ.
މި އިންތިޚާބުގައި މިހާތަނަށް 3 ޕާޓީއަކުން ވާދަކުރާނެކަން ވަނީ އިއުލާނުކޮށްފަ އެވެ.
އެއީ މީގެ ކުރިން އެ ގޮނޑި ތަމްސީލު ކުރަމުން ދިޔަ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ސަރުކާރު ހިންގާ މައި ޕާޓީ އެމްޑީޕީގެ އިތުރުން މޯލްޑިވްސް ނެޝަނަލް ޕާޓީ (އެމްއެންޕީ) އެވެ.
މި އިންތިޚާބުގައި ޕީޕީއެމް ތަމްސީލު ކުރައްވާނީ ގުރައިދޫ ދާއިރާގެ ކުރީގެ މެމްބަރު މަރުޙޫމް އިބްރާހީމް ރިޒާގެ ކޮއްކޮ، ޙުސައިން ރިޒާކަމަށް އެ ޕާޓީން ވަނީ އިއުލާނުކޮށްފަ އެވެ.
އެހެން ނަމަވެސް، އެމްޑީޕީ އާއި އެމްއެންޕީން ކެންޑިޑޭޓެއް އިއުލާނުކޮށްފައެއް ނުވެއެވެ. އެކަމަށްޓަކައި ޕާޓީގެ އެތެރޭގެ އިންތިޚާބެއް ބޭއްވުމަށް އެ ދެ ޕާޓީންވެސް ވަނީ ނިންމާފަ އެވެ.
Advertisement
This content is created and paid for by advertisers and does not involve Voice Journalists
