ގުރައިދޫ ދާއިރާގެ ރައްޔިތުން ތިބީ މަރުހޫމު އިބްރާހިމް ރިޒާގެ އާއިލާއިން ނިންމަވާ ކޮންމެ ނިންމެވުމަކާއެކު ކުރިއަށްދާން ތައްޔާރަށްކަމަށް އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
މަރުހޫމު ރިޒާގެ ހަނދާނުގައި ގުރައިދޫގައި ބޭއްވި ތައުބީންގެ ޖަލްސާގައި އަބްދުއްރަހީމް ވަނީ ގުރައިދޫ ދާއިރާގެ ރައްޔިތުން ރިޒާގެ ހަނދާން އާކުރާ ގޮތަށް އަލިއަޅުވާލައްވާފަ އެވެ.
އަބްދުއްރަހީމް ވިދާޅުވީ ވަރަށް ގިނަ ބޭފުޅުން ރައްޔިތުންގެ މަޖިލިސް މެމްބަރުކަން ކުރައްވާކަމަށެވެ. އަދި ވަރަށް ގިނަ އަހަރު މަޖިލީހުގައި ހޭދަކުރެއްވި ބޭފުޅުންވެސް ތިއްބަވާ ކަމަށެވެ.
އެހެން ނަމަވެސް ގުރައިދޫ ދާއިރާގެ ރައްޔިތުންނާއި އެ ދާއިރާ ތަމްސީލު ކުރެއްވި މަރުހޫމު ރިޒާއާއި ދެމެދު އޮތީ ރައްޔިތަކާއި މަޖިލިސް މެމްބަރެއްގެ އޮންނަ ގުޅުމަށްވުރެ މާ ގާތް ގުޅުމެއްކަން އަބްދުއްރަހީމް ފާހަގަކުރެއްވި އެވެ. އަދި ވިދާޅުވީ ގުރައިދޫ ދާއިރާގެ 3 ރަށުގެ ރައްޔިތުން ރިޒާ ދެކެނީ އެއީ އިޚްލާސްތެރި ޚިދުމަތްތެރިއެއްގެ ގޮތުގައި ކަމަށެވެ. އަދި ރައްޔިތުންނާއި ގާތް ގުޅުމެއް ބާއްވާ މިތުރެއްގެ ގޮތުގައި ކަމަށެވެ.
އެކަންކަން ފާހަގަކުރައްވާ އަބްދުއްރަހީމްގެ ވާހަކަފުޅު ނިންމަވާލައްވަމުން ވިދާޅުވީ، ރިޒާގެ ކުއްލި ވަކިވެ ދިއުމާއި ގުޅިގެން އިދިކޮޅުގެ ލީޑަޝިޕުން ގުރައިދޫ ދާއިރާގެ ވަރަށް ގިނަ ރައްޔިތުންނާއި ބައްދަލުކޮށް ވާހަކަ ދައްކަވާފައިވާ ކަމަށެވެ. އަދި އެ ވާހަކަތަކުން އެނގުނީ ރައްޔިތުން ތިބީ މަރުހޫމު ރިޒާގެ އާއިލާއިން ނިންމާ ނިންމުމާއެކު ކުރިއަށް ދިއުމަށްކަން ކަމަށް އަބްދުއްރަހީމް ވިދާޅުވި އެވެ.
"މި ތިންރަށުގެ ބޭފުޅުންގެ ފަރާތުން އަޅުގަނޑުމެންނަށް އިވުނީ އެއް އަޑެއް. އެއީ އިޚްލާސްތެރި ޚިދުމަތްތެރިއެކޭ. ހިތްހެޔޮ ގާތް އެކުވެރިއެކޭ. ތިމަންނަމެންނަށް ހަނދާން ނައްތާނުލެވޭނެ މިތުރެކޭ. އަޅިގަނޑުމެން ސުވާލެއްކޮށްލިން ކޮންމެ ރަށެއްގައި އަޅުގަނޑުމެން ބައްދަލުކުރި ޓީމާ.. ރިޒާ އަޅުގަނޑުމެންނާއި ވަކިވެއްޖެއޭ، އެ ހިތާމަ އަޅުގަނޑުމެންގެ އެބައޮތޭ، އެހެން ނަމަވެސް އަޅުގަނޑުމެން ކުރިމަތިލާން ޖެހޭ ކަމެއްވެސް އެބައޮތޭ، ވަރަށް ސާދާ ޖަވާބެއް ދެއްވީ.. ރިޒާގެ އާއިލާއިން ނިންމާ ކޮންމެ ނިންމުމަކަށް ތިމަންނަމެން މި ތިބީ ތާއީދުކޮށްގެނޭ"
ޕީއެންސީގެ ރައީސް އަބްދުއްރަހީމް އަބްދުﷲ
އެ ވާހަކައިގައި އިތުރު ތަފްސީލެއް އަބްދުއްރަހީމް ނުދެއްވި ނަމަވެސް، އޭނާ އެ އިޝާރާތްކުރެއްވީ ކުރިއަށް އޮތް ގުރައިދޫ ދާއިރާގެ ބައި-އިލެކްޝަނަށް ކަމަށް ބެލެވެއެވެ. އެ އިންތިޚާބުގައި ޕީޕީއެމް ތަމްސީލު ކުރައްވަނީ މަރުހޫމު ރިޒާގެ ކޮއްކޮ ހަސަން ރިޒާއެވެ.
އިދިކޮޅު ޕީޕީއެމްގެ މެމްބަރެއްގެ ގޮތުގައި މަޖިލިސް ތަމްސީލުކުރައްވަމުންް ގެންދެވި ރިޒާއަކީ މަޖިލީހުގައި އެންމެ ގިނަ ދުވަސްވީ އެއް މެމްބަރެވެ. ރިޒާ ވަނީ، ނިމުނު 3 ދައުރުގައިވެސް މެންބަރުކަން ކުރައްވާފައެވެ. ރިޒާ ގެންދެވީ މަޖިލީހުގެ ޖުޑިޝަރީއާއި، މިނިވަން މުވައްސަސާތަކުގެ ކޮމިޓީގެ މެންބަރުކަންވެސް ކުރައްވަމުންނެވެ.
ޤާނޫނީ ވަކީލުކަންވެސް ކުރައްވަމުން ގެންދެވި ރިޒާ ވަނީ ރައްޔިތުން މަޖިލީހުގެ މިދިޔަ ދައުރުގައި އެމަޖިލީހުން ޖޭއެސްސީއަށްް ކަނޑައެޅުއްްވި މެމްބަރުގެ ގޮތުގައި އެ ކޮމިޝަންގައިވެސްް މަސައްކަތް ކުރައްވާފައެވެ. އަދި ޖޭއެސްްސީގެ ނައިބު ރައީސްގެ މަޤާމުވެސް ރިޒާވަނީ ފުރުއްވާފައެވެ.
Advertisement
This content is created and paid for by advertisers and does not involve Voice Journalists
