2012 ވަނަ އަހަރުން ފެށިގެން އާންމުން އަލިފާނުގެ ހާދިސާތަކަށް ހޭލުންތެރިކުރުވުމަށް އެމްއެންޑީއެފް އިން ބާއްވަމުންދާ "ފަޔާ ޕްރިވެންޝަން ވީކް" މިއަދު ފެށިގެންދާނެއެވެ.

ޕީއެސްއެމްގެ "ހެނދުނު ހެނދުނާ" ޕްރޮޤްރާމްގައި ވާހަކަދައްކަވަމުން ފަސްޓް ލެފްޓިނަންޓް އިސްމާޢީލް އަޙްމަދު އަދި ވޮރަންޓް އޮފިސަރ 1 ފާރޫޤް އިސްމާޢީލް ވިދާޅުވެފައިވަނީ 2012 ވަނަ އަހަރުން ފެށިގެން ކުރިއަށް ގެންދާ މި ޕްރޮގްރާމަކީ އާންމުންގެ ލޯތްބާއި ތަރުހީބު ލިބިގެންދާ ޕްރޮގްރާމެއް ކަމަށެވެ.

އެގޮތުން ރަމަޟާން މަހާއިި ގުޅިގެން ހިނގާ އަލިފާނުގެ ހާދިސާތައް ގިނަ ކަމަށް ފާހަގަކޮށް އެބޭފުޅުން ވިދާޅުވެފައިވަނީ މި އަހަރުގެ ޕްރޮގްރާމް ހާއްސަ ކުރެވިފައިވަނީ ބަދިގެ ތެރޭގައި ހިނގާ އަލިފާނުގެ ހާދިސާތަކާއި ގުޅުންހުރި މައުލޫމާތު ދިނުމަށް ކަމަށެވެ.

Advertisement

މީގެ ތެރޭގައި ކައްކާ ގޭހުގެ ނުރައްކަލާއި، ކައްކާ ގޭހުގެ އަލިފާނުގެ ހާދިސާއެއް ހިނގާފިނަމަ އަމަލު ކުރާނެ ރަނގަޅު ގޮތްތަކާއި، ބަދިގެ ތެރޭގައި ހިނގާ އެކި ކަހަލަ އަލިފާނުގެ ހާދިސާތަކުގެ ވާހަކަ ޕްރޮގްރާމްގައި ދެކެވިގެން ދާނެ ކަމަށް ވަނީ ވިދާޅުވެފައެވެ.

މިއާއިއެކި ދުންފަތުގެ އިސްތިއުމާލު ކުރުން ފަދަ އާންމު ދިރިއުޅުމުގައި ހުންނަ ނޭދެވޭ ކަންކަމުގެ ސަބަބުން ދިމާވާ ހާދިސާތަކާއި އިމާރާތްތަކުގައި ގާއިމު ކުރެވިފައި ހުންނަ ޕްރޮޓެކްޝަން ސިސްޓަމްތަކުގެ މުހިންމުކަމާއި އެ ސިސްޓަމްތައް މެއިންޓެއިން ކުރާނެ ގޮތްތަކާއި އިވެކުއޭޝަންގެ މުހިންމުކަންވެސް ކިޔާ ދެވިގެން ދާނެ ކަމަށް އެބޭފުޅުން ވަނީ ވިދާޅުވެފައެވެ.

"ރޯވުމުގެ ކުރިން ސަމާލުވެލައްވާ" މި ޝިއާރުގެ ދަށުން މި އަހަރު ހިންގާ މި ޕްރޮގްރާމް ކުރިއަށް ދާނީ މިއަދުން ފެށިގެން 18 މާރިޗުގެ ނިޔަލަށް މާލެ ސަރަހައްދުގެ އިތުރުން، އުތުރު، މެދު އަދި ދެކުނު އޭރިއާގެ ކޮމާންޑް ސެންޓަރުތަކުން އެކި ރަށްރަށުގައި ކަމަށް އެމްއެންޑީއެފްއިން މައުލޫމާތު ދެއެވެ.

ފަޔަރ ސޭފްޓީ ވީކް ފެށުމުގެ ގޮތުން، މާލެ ސަރަހައްދުގައި ފުރަތަމަ ޕްރޮގްރާމް ބާއްވާނީ ރަސްފަންނު ސަރަހައްދުގައި މިއަދު ހަވީރު 4:15 ގައެވެ. އަދި މާދަމާ ހަވީރު 4:15 ގައި އާޓިފިޝިއަލް ބީޗްގައި ބޭއްވުމަށް ހަމަޖެހިފައިވާ އިރު، ވިލިމާލެ ރުއްދަނޑުގައި އަންގާރަ ދުވަހު ހަވީރު 4:15 ގައި ޕްރޮގްރާމް ކުރިއަށްގެންދާނެއެވެ. މިއާއިއެކު ބުދަ ދުވަހު 4:15 ގައި ހުޅުމާލެ ރުއްގަނޑު 2 ގައި ޕްރޮގްރާމް ކުރިއަށް ގެންދާނެއެވެ. އަދި ތިލަފުށީ ފުޓްބޯޅަ ދަނޑުގައި 18 ވަނަ ދުވަހު މި ޕްރޮގްރާމް ކުރިއަށްގެންދާނެއެވެ. 

މިފަހަރުގެ ފަޔަރ ސޭފްޓީ ވީކްގެ ތެރެއިން ބެހެއްޓޭ 3 ސްޓޭންޑުގެ ތެރޭގައި ކިޗަން ސިމިއުލޭޓަރ ސްޓޭންޑާއި، ކައްކާ ގޭސް ސްޓޭންޑް އަދި ބްލެންކެޓް ސްޓޭންޑެއް ވެސް ހިމެނެއެވެ. މި ސްޓޭންޑްތަކަށް ޒިޔާރަތްކޮށްގެން ހާއްސަ އިނާމުތަކެއް ލިބިގެންދާނެ ކަމަށް އެމްއެންޑީއެފުން ބުނެފައިވެއެވެ.