ބޭރަށް ހިންގާތީ ގައިގަ ވަރުޖެއްސުމުގެ ގޮތުން ވިޔަސް ހަކުރު ގިނައިން އަޅާފަ ހުންނަ ޖޫސް/ފަނި ފަދަ ތަކެތި ނުބުއިމަށް ކުޑަކުދިންގެ ޚާއްޞަ ޑޮކްޓަރު އަހުމަދު ފައިސަލް އިލްތިމާސް ކުރައްވައިފި އެވެ. 

މިދުވަސްކޮޅަކީ މާލޭ އާއި އަތޮޅު ތެރޭގައި ބޭރަށް ހިންގުމާއި ރޯގާ ގިނަ ވެފައިވާ ދުވަސްވަރަކަށްވާއިރު، އެކަމާއި ގުޅިގެން ޑރ. ފައިސަލް ކުރެއްވި ޓުވީޓެއްގައި ވަނީ ބޭރަށް ހިންގާއިރު ހަކުރު ގިނައިން އަޅާފައި ހުންނަ ބުއިންތައް ބުއިމުން އިތުރަށް ބަނޑު ދިޔާވާނެކަމަށް ވިދާޅުވެފައެވެ.

އަދި އެފަދައިން ކަން ދިމާވުމުން، ހަށިގަނޑުގައި ފެންމަދުވެ ލޭގެ ޕުރެޝަރ ދަށްވެ ޝޮކަށް ގޮސްފާނެ ކަމުގެ އިންޒާރު ވެސް ޑޮކްޓަރ ވަނީ ދެއްވާފައެވެ. 

"ޖޫހަށް އާދައިގެ ވަރަކަށް ހަކުރުކޮޅެއް ލިޔަސް ހެޔޮވާނެ. ކުރުނބަޔަށް ވިޔަސް ހަކުރު ނައަޅާ" ޑރ. ފައިސަލް ވިދާޅުވި އެވެ. 

ބޭރަށް ހިންގުން އިތުރު ވަމުންދާާއިރު ބަލި ފެތުރުވުން ހުއްޓުވުމަށް ބާރު އެޅުމަށް ބަލިވެ އުޅޭނަމަ ސްކޫލަށް އަދި އޮފީސްތަކަށް ނުގޮސް އަރާމު ކުރުމަށް ހެލްތް ޕްރެޓެކްޝަން އެޖެންސީ (އެޗްޕީއޭ) އިލްތިމާސް ކުރެއެވެ. 

އަދި ގިނަ ގިނައިން ލޮނު ޕެކެޓް، ޖޫސް އަދި ސޫޕުފަދަ ދިޔާ ތަކެތި ބޭނުން ކުރުމަށާއި ކާބޯތަކެތި ތައްޔާރު ކުރުމުގެ ކުރިން އަތް ދޮވުމަށާއި ފާހާނާ ކުރުމަށް ފަހު އަތް ދޮވުމަށް އެ އެޖެންސީން އިރުޝާދު ދެއެވެ. 

މީގެ އިތުރުން، ބޭރަށް ހިންގުމުގެ އިތުރަށް އާދަޔާއި ޚިލާފަށް ކަރުހިއްކުމާއި، ބޮލަށް އެނބުރުން އެރުމާއި، މާބޮޑަށް ވަރުދެރަވެ ދިޔާތަކެތި ބޭނުން ނުކުރެވޭ ވަރުވުމާއި، ކުޑަކަމު ދެވޭ މިންވަރު މަދުވުމާއި، ގިނަގިނައިން ހޮޑުލެވުމާއި، ހޮޑުގައި ނުވަތަ ބޮޑު ކަމުދާ ތަކެތީގައި ލޭގެ އަސަރު ހުރުން، އަދި އާދަޔާ ޚިލާފަށް ބަނޑުގައި ރިއްސުން ފަދަ ކަންކަން ފެންނަނަމަ ވީ އެންމެ އަވަހަކަށް ޑޮކްޓަރެއްގެ ލަފާ ހޯދުމަށް އެޗްޕީއޭ އިން އިރުޝާދު ދެއްވައިފައިވެއެވެ