ދަރުމަވަންތަ ސްކޫލްގެ އާ އިމާރާތަށް ދަރިވަރުން ބަދަލު ކުރާނީ ބޭނުންވާ ވަސީލަތްތައް ފުރިހަމަ ކޮށްފައި ކަމަށް އެޑިޔުކޭޝަން މިނިސްޓްރީއިން ބުނެފިއެވެ.

ވިލާ ކޮލެޖް ކުރިމަތީ ހަދާ އާ އިމާރާތަށް އަންނަ ހަފްތާގައި ދަރުމަވަންތަ ސްކޫލްގެ ދަރިވަރުން ބަދަލު ކުރުމަށް މިނިސްޓްރީއިން ނިންމާ އެކަމުގެ ތައްޔާރީތައް ވުމަށް ވަނީ އަންގާފައެވެ.

ނަމަވެސް އެ އިމާރާތަކީ ވަސީލަތްތައް ފުރިހަމައަށް ނެތް އިމާރާތަކަށް ވެފައި ބަދަލުވަނީ ކުއްލިއަކަށް ދިރާސީ އަހަރުގެ މެދު ތެރޭގައި ކަމަށް ވުމުން ދިމާވާނެ ދަތިތަކާއިމެދު ބެލެނިވެރިން ވަނީ ކަންބޮޑުވުން ފާޅުކޮށްފައެވެ.

Advertisement

މިކަމާއި ގުޅިގެން އެޑިޔުކޭޝަން މިނިސްޓްރީއިން މިއަދު ބުނެފައިވަނީ އާ ދަރުމަވަންތަ ސްކޫލަށް ދަރިވަރުން ބަދަލު ކުރާނީ ދަރިވަރުންނަށް ބޭނުންވާ ވަޞީލަތްތައް ފުރިހަމަ ކޮށްފައި ކަމަށެވެ.

އަދި ސްކޫލު ބަދަލުކުރާނެ ތާރީޚެއް ކަނޑައެޅުމުން ފަހުން އިޢުލާން ކުރާނެ ކަމަށް ވެސް އެޑިޔުކޭޝަނުން ވަނީ ބުނެފައެވެ.

ދަރުމަވަންތަ ސްކޫލްގެ ދަރިވަރުން ވަގުތީ އިމާރާތެއްގައި ކިޔަވާތާ ގާތް ގަނޑަކަށް 7 އަހަރުވެގެން ގޮސްފައިވާއިރުވެސް އާ އިމާރާތުގެ މަސައްކަތް ނިންމާ ދަރިވަރުންނަށް ކިޔަވަން ފެށޭނެ ފަދަ ނިޒާމެއް ޤާއިމު ނުކުރެވި ވަނީ ދިގު ދެމިގެންގޮސްފައެވެ.