ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގެ ސެމީ ފައިނަލް މާދަމާ ރޭ ކުޅުމަށް ހަމަޖެހިފައިވާއިރު، މިފަހަރުގެ މުބާރާތުގެ ސެމީގައި ވާދަކުރަނީ ދ.ކުޑަހުވަދޫ، ލ.ގަން، ރ.އިނގުރައިދޫ އަދި ގދ.ވާދޫގެ އެވެ.

މި ހަތަރު ޓީމަކީ ވެސް މީގެ ކުރިން ގޯލްޑެން ފުޓްސަލް ޗެލެންޖް ކާމިޔާބު ނުކުރާ ހަތަރު ޓީމަށް ވާއިރު، އިނގުރައިދޫ އަދި ވާދޫން ސެމީ ފައިނަލަށް ދަތުރުކުރި މިއީ ވެސް ފުރަތަމަ ފަހަރެވެ. 

ހުޅުމާލޭ ރެހެނދި ފުޓްސަލް ދަނޑުގައި މާދަމާ ރޭ ކުޅޭ ސެމީ ފައިނަލުގެ ފުރަތަަމަ މެޗުގައި 20:15 ގައި އިނގުރައިދޫ ނުކުންނާނީ ގަމާއި ދެކޮޅަށެވެ. އަދި ސެމީ ފައިނަލްގެ ދެވަަނަ މެޗުގައި 22:15 ގައި ވާދޫ ނުކުންނާނީ ކުޑަހުވަދޫ އާއި ދެކޮޅަށެވެ. މުބާރާތުގެ ސެމީ ފައިނަލް ދެ މެޗު މާދަމާ ރޭ ކުޅޭ އިރު ފައިނަލް މެޗު ކުޅުމަށް ހަމަޖެހިފައިވަނީ މިމަހުގެ 19 ވަނަ ދުވަހު އެވެ.

މިއަހަރުގެ ގޯލްޑެން ފުޓްސަލް ޗެލެންޖުގައި ޖުމްލަ 102 ޓީމު ބައިވެރިވިއިރު، މިހާތަނަށް 239 މެޗު ވަނީ ކުޅެވިފަ އެވެ. މި މުބާރާތަކީ ރާއްޖޭގައި މީހުން ދިރިއުޅޭ ކޮންމެ ރަށަކުން ވެސް ޓީމެއް ނެރިގެން ކުރިއަށްގެންދާ މުބާރާތެކެވެ. މިމުބާރާތުގައި މާލެ އާއި ފުވަމައްމުލަކުން ނެރުނީ ކޮންމެ އަވަށަކުން އެއް ޓީމެވެ.