ޖޫނިއާ ޗެމްބާ އިންޓަނޭޝަނަލް (ޖޭސީއައި) އަކީ ދުނިޔޭގެ 100 އަށްވުރެ ގިނަ ގައުމުތަކުގައި މުޖުތަމައުގެ ލާބައާއި މަންފާއަށްޓަކައި މަސައްކަތް ކުރަމުން އަންނަ ބައިނަލްއަގުވާމީ ޖަމިއްޔާއެކެވެ. އެ ޖަމިއްޔާގައި ދުނިޔޭގެ އެކި ކަންކޮޅުތަކުގައި 200،000 އަށް ވުރެ ގިނަ މެމްބަރުން ހިމެނެ އެވެ.

މި ޖަމިއްޔާގެ ރާއްޖޭގެ ގޮފި، ޖޭސީއައި މޯލްޑިވްސް އުފެދިފައިވަނީ 2007 ވަނަ އަހަރުއެވެ. އެއިރުން ފެށިގެން ޖޭސީއައި މޯލްޑިވްސް އިން ވަނީ އިޖުތިމާއީ މައްސަލަތައް ހައްލު ކުރުމަށާއި ޒުވާނުންނާ ގުޅޭ ގިނަ ފޯރަމްތަކެއް ބާއްވައިފަ އެވެ. އެގޮތުން ތަފާތު ހުނަރުތައް ތަރައްގީކުރުމުގެ ޕްރޮގްރާމްތައް ހިންގުމާއި މުޖުތަމައުގައި ޒުވާނުންގެ ބައިވެރިވުން އިތުރުކުރުމާއި ޒުވާނުންގެ ތެރެއިން ހަރުދަނާ ވެރިންތަކެއް ތައާރަފްކުރުމަށް ގިނަ މަސައްކަތްތަކެއް ވަނީ ކޮށްފައެވެ. 

މީގެ އިތުރުން ވެސް، މާލީ އެހީއަށް ބޭނުންވާ ފަރާތްތަކަށް ފައިސާ ހޯދައި ދިނުމުގެ ގޮތުން ޖަމިއްޔާ ތަކާއީ ގުޅިގެން ފަންޑް ރެއިޒިން އިވެންޓް ތަކާއި އެނޫންވެސް ހަރަކާތްތައް ބާއްވާފައި ވާއިރު، އަމަން އަމާން ކަމާއި ސުލްހަ މަސަލަސްކަން ދެމެހެއްޓުމަށްޓަކައި ވެސް އެ ޖަމިއްޔާ އިން ގިނަ މަސައްކަތް ތަކެއް ކޮށްފައިވެއެވެ. 

ޖޭ.ސީ.އައިގެ "ވަން އިޔާ ޓު ލީޑް" ފަލްސަފާގެ ދަށުން ކޮންމެ އަހަރަކުވެސް ޖަމިއްޔާގެ ހިންގާ ކޮމިޓީގެ މަގާމުތަކަށް އާ މެންބަރުން އައްޔަން ކުރެވެއެވެ. އެގޮތުން ދާދި ފަހުން ވަނީ އެ ޖަމިއްޔާގެ އައު ހިންގާ ކޮމިޓީގެ މެންބަރުން ތައް މަގާމަށް އިންތިޚާބު ކޮށް ހުވާ ކޮށްފައެވެ. 

• ރައީސް -- އަޙްމަދު ފާރިޙު މުޙައްމަދު

• އެގްޒެކެޓިވް ނައިބު ރައީސް -- ނޫރު ރަޝާދު

• ނައިބު ރައީސް -- އައިޝަތު ނުހާ

•ސެކްރެޓެރީ ޖެނެރަލް -- އައިޝަތު ގާހިރު

• ޕަބްލިކް ރިލޭޝަންސް އޮފިސަރު -- ރާޖާނީ ޝްރެސްތާ (ރިޒް)

• ޗީފް ފައިނޭންޝަލް އޮފިސަރު -- މުހައްމަދު އީމާން

• ޖެނެރަލް ލީގަލް ކައުންސެލް -- ރިފްގާ އިބްރާޙީމް 

• އެގްޒެކެޓިވް ޑިރެކްޓަރ -- މުހައްމަދު އީވާން

• އެގްޒެކެޓިވް ޑިރެކްޓަރ -- މުހައްމަދު އަރުހަމް

• ރައީސްގެ ސްޕެޝަލް އެޑްވައިޒަރ -- މުއީސް މޫސާ

• ޑިރެކްޓަރ -- ޝަފްރާޒް އަޙުމަދު

• ޑިރެކްޓަރ -- ޝަމްޢޫން އަފީފު

• ސިޔާސަތާއި ބައިނަލްއަގުވާމީ ގުޅުންތަކާއި ބެހޭ ޚާއްސަ އެޑްވައިޒަރ -- މުހައްމަދު ހޫދު

ޖޭސީއައި ގެ ހިންގާ ކޮމިޓީގެ ރައީސް ކަމަށް ކުރިއަށް އޮތް އަހަރަށް އިންތިޚާބު ކުރެވުނު ފާރިހް، "ވޮއިސް" އަށް ދެއްވި ބަސްދީގަތުމެއްގައި ވަނީ މިއަހަރުގެ ތެރޭގައި ޒުވާނުންނަށާއި އަދި މުޖުތަމަޢުއަށްޓަކައި އެ ޖަމިއްޔާ އިން ރާވައި ހިންގުމަށް ހަމަޖެހިފައިވާ ބައެއް ކަންކަމަށް އަލިއަޅުވާލައްވާފައެވެ. 

އެގޮތުން މިއަހަރު ތެރޭގައި ވެސް ޒުވާނުން އެކި ދާއިރާއިން ތަމްރީނު ކޮށް، ޒުވާނުންނަކީ މުޖުތަމައުއަށް ފައިދާ ހުރި ބަޔަކަށް ހެދުމަށް މަސައްކަތް ތަކެއް ރޭވިފައިވާކަމަށް އޭނާ ފާހަގަ ކުރެއްވި އެވެ.

އަދި ހަމައެހެންމެ، މުޖުތަމަޢުގެ އަފުރާދުންގެ މެދުގައި ގުޅުން ބަދަހިކޮށް އެކުވެރިކަން އާލާކުރުމަށްޓަކައި އިޖުތީމާއީ ތަފާތު ހަރަކާތްތައްވެސް ރޭވިފައިވާއިރު، ބައިނަލްއަގުވާމީ ގޮތުން ބޭއްވޭ ތަފާތު ކޮންފަރެންސް ތަކުގައިވެސް ޖޭސީއައި މޯލްޑިވްސްގެ ފަރާތުން ބައިވެރިވުމަށް ހަމަޖެހިފައިވާ ކަމަށް ފާރިހް ވިދާޅުވި އެވެ. 

މީގެ އިތުރުން، އެހެނިހެން އަހަރުތަކެކޭވެސް އެއްފަދައިން، ރާއްޖޭގައި ހަރަކާތްތެރިވާ އަމިއްލަ ޖަމިއްޔާ ތަކާއި އިންސްޓިޓިއުޝަންތަކާއި ގުޅިގެން ޕާޓްނަރޝިޕް އުސޫލުންވެސް ކަންކަން ހިންގުމަށް ހަމަޖެހިފައިވާ ކަން ފާރިހު ފާހަގަ ކުރެއްވިއެވެ. 

މި އަހަރަކީ ރިޔާސީ އިންތިޚާބު ބޭއްްވުމަށް ހަމަޖެހިފައިވާ އަހަރު ކަމުގައި ވާއިރު، އެ އިންތިހާބުގެ ކަންކަން މޮނިޓަރ ކުރުމުގައިވެސް ޖޭސީއައިގެ ފަރާތުން ހަރަކާތްތެރިވަމުންދާނެ ކަމަށް ފާރިހް ވިދާޅުވި އެވެ. 

ޖޭސީއައި މޯލްޑިވްސް އިން ކުރިއަށް ގެންދާ ޕްރޮގްރާމް ތަކާއި ގުޅޭ މައުލޫމާތު ހޯދުމަށް، ނުވަތަ ޖަމިއްޔާ އާއި ގުޅިގެން ޕްރޮގްރާމް ތައް ހިންގުމަށް އަދި އެ ޖަމިއްޔާއާއި ބެހޭ އިތުރު މައުލޫމާތު ހޯދުމަށް ޖަމިއްޔާގެ ނަންބަރު 9512010 އަށް ގުޅައިގެން ނުވަތަ [email protected] އަށް މެއިލް ކޮށްގެން ކުރިއަށް ގެންދެވޭނެއެވެ. ޖޭސީއައި މޯލްޑިވްސްގެ ވެބްސައިޓް www.jci.mv