ސަރުކާރުގެ މަގާމް ތަކުގެ ތެރެއިން، ޖުމްހޫރީ ޕާޓީ (ޖޭޕީ)ގެ މެންބަރުން ފުރުއްވަމުންދާ މަގާމްތަކުން އެ މެންބަރުން ވަކިކޮށް އެ މަގާމްތައް ހުސްކުރަންޖެހޭ ކަމަށް އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެއެވެ.

ޖުމްހޫރީ ޕާޓީގެ މިއަދު އޮތް ކައުންސިލްގެ ބައްދަލުވުމުގައި އެޕާޓީން ވަނީ ކުރިއަށް އޮތް ރިޔާސީ އިންތިޚާބުގައި، އެ ޕާޓީ އިސްވެ އޮވެ އުފައްދާ ކޯލިޝަނެއްގެ ތެރެއިން ވާދަކުރުމަށް ނިންމާފައެވެ. އެގޮތުން، އެޕާޓީގެ ރިޔާސީ ކެންޑިޑޭޓެއްގެ ގޮތުގައި ޕާޓީގެ ލީޑަރު ގާސިމް އިބްރާހިމް ވަނީ ކަނޑައަޅައިފަ އެވެ. 

އެކަމާއި ގުޅިގެން، އެމްޑީޕީގެ ޕާލަމެންޓްރީ ގްރޫޕަށް ޝިފާއު ކުރެއްވި މެސެޖެއްގައި ވިދާޅުވީ، ސަރުކާރުގެ މަގާމްތަކުން ޖުމްހޫރީ ޕާޓީއަށް ދީފައިވާ ޖާގަތައް ހުސްކުރަން ޖެހޭ ކަމަށެވެ. 

ޝިފާއު ގެ ވާހަކަތަކަށް ތާއީދު ކުރައްވައި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ ޝަރީފް) ވަނީ، ކޯލިޝަނުން ޖޭޕީ ވަކިވީ އަމިއްލަ އަށް ކަމަށާ، އެހެންކަމުން ސްލޮޓްތައް އަމިއްލައަށް ހުސްވާނެ ކަމަށެވެ. 

އެމްޑީޕީގެ ސަރުކާރަށް ތާއީދު ކުރައްވާ އެ ޕާޓީގެ މެންބަރުން އެފަދައިން ވިދާާޅުވި ނަމަވެސް، ޤާސިމް ވަނީ އެގޮތަށް އެކަން ނުވާނެ ކަމަށް ވިދާޅުވެފައެވެ. އެގޮތުން ގާސިމް މިއަދު ވިދާޅުވީ، ރިޔާސީ އިންތިޚާބަށް ނިކުންނަން ނިމުމަކީ މިހާރު އޮތް ސަރުކާރު ކޯލިޝަނުން ވަކިވާން ޖެހޭ ސަބަބެއް ނޫންކަމަށެވެ. އަދި ވަޒީފާތަކުގައި ތިއްބެވި ބޭފުޅުންވެސް މިއަހަރު ނޮވެމްބަރު 11 އާއި ހަމައަށް ތިއްބަވާނެކަމަށެވެ.

"އަޅުގަނޑުމެންނަކީ ސަރުކާރު ކޯލިޝަންގައި އޮތްބައެއް. ފަސް އަހަރު ނިމެންދެން މިއަހަރު ނޮވެމްބަރު 11 ވަނަ ދުވަހާއި ހަމައަށް އަޅުގަނޑުމެން ކުރިއަށްދާނެ. ވަޒީފާތަކުގައި ތިއްބެވި ބޭފުޅުންވެސް ދެން ކުރިއަށްދާނެ އެދުވަހާއި ހަމައަށް. އަޅުގަނޑު ދަންނަވާލަން ބޭނުމީ އެއީ އެއްބަސްވުމުގައި އޮތްގޮތޭ." ޤާސިމް ވިދާޅުވިއެވެ.

މީގެ އިތުރުން ޤާސިމް ވިދާޅުވީ ޖުމްހޫރީ ޕާޓީން ކެނޑިޑޭޓަކު ނެރުމަކީ ކޯލިޝަން ރޫޅޭނެ ކަމެއް ނޫންކަމަށާ، އެކަން ވަރަށް ސާފުކޮށް އެއްބަސްވުމުގައި އެނގެން އޮތް ކަމަށެވެ. 

"އަޅުގަނޑުމެންގެ އެއްބަސްވުން އޮތް ގޮތުން 2023 އަށް ކެނޑިޑޭޓަކު ނެރުމަކީ އަޅުގަނޑުމެން އޭގައިން ބަރީއަވާ ކަމެއްނޫން. އެއީ ވަރަށް ސާފު ސަރީހަ އިބާރާތުން އޮތްގޮތް." ގާސިމް ވިދާޅުވި އެވެ.