ރައީސް އިބްރާހިމް މުޙައްމަދު ޞާލިޙްގެ ލީޑަރޝިޕް ކޯލިޝަނުން ރިޔާސީ އިންތިޚާބު ކާމިޔާބު ކުރައްވާނެ ކަމަށް ރައީސް އޮފީހުގެ ޗީފް އޮފް ސްޓާފް ޢަލީ ޒާހިރު ވިދާޅުވެއްޖެއެވެ.

ޢަލީ ކުރެއްވެވި ޓްވީޓެއްގައި ވިދާޅުވީ ރައީސް އިބްރާހިމް މުޙައްމަދު ޞާލިޙްގެ ލީޑަރ ޝިޕް ގައި އެމްޑީޕީ އިސްވެ އޮވެ ޢަދާލަތު ޕާޓީ އާއި އެމްޑީއޭ  ހިމެނޭ ކޯލިޝަން އެކުގައި މަސައްކަތް ކޮށްގެން 2023 ވަނަ އަހަރުގެ ރިޔާސީ އިންތިޚާބު ފަސޭހަ ކަމާއިއެކު ކާމިޔަބު ކުރެވޭނެކަން ޔަޤީން ކަމަށެވެ.

ރިޔާސީ އިންތިޚާބު ގައި ވާދަކުރެއްވުމުގެ ޝައުޤުވެރިކަމާއި ވާދަވެރިކަން މިހާރު އަންނަނީ ބޮޑު ވަމުންނެވެ.

މިހާރު ވެރިކަމަށް ވާދަކުރައްވާނެ ކަން އިއްލާނު ކުރައްވާފައިވަނީ އެމްޑީޕީ، ޢަދާލަތު އަދި އެމްޑީއޭ ކޯލިޝަނުން މިހާރުގެ ރައީސް އިބްރާހިމް މުޙައްމަދު ޞާލިޙު، އެމްއެންޕީ އިން ދަނގެތީ ދާއިރާގެ މެމްބަރު ކާނަލް މުހައްމަދު ނާޒިމް، ޕީޕީއެމް، ޕީއެންސީ ކޯލިޝަނުން ރައީސް ޢަބްދުﷲ ޔާމިން ޢަބްދުލް ޤައްޔޫމް، ޖޭޕީ އިން މާމިގިލީ ދާއިރާގެ މެމްބަރު ޤާސިމް އިބްރާހިމް، އަމިއްލަ ގޮތުން ކުރީގެ ހޯމް މިނިސްޓަރ ޢުމަރް ނަސީރު އަދި ކުރީގެ ބަންޑާރަ ނައިބު މުހައްމަދު މުނައްވަރެވެ.  

ޖޭޕީ އިން އިންތިޚާބާއި މެދު ގޮތެއް ނިންމައި އިއްލާނު ކުރީ މިއަދުއެވެ. ޖޭޕީ އިން ނިންމާފައިވަނީ އެޕާޓީގެ ލީޑަރ ޤާސިމް އިބްރާހިމް ކެނޑިޑޭޓެއްގެ ގޮތުގައި ނެރުމަށެވެ. ސަރުކާރު ކޯލިޝަންގައި ހިމެނުނު ފަރާތްތަކުގެ ތެރެއިން އިންތިޚާބާއި މެދު މިހާރު ގޮތެއް ނުނިންމަނީ އެމްއާރްއެމް އިންނެވެ. 

އިދިކޮޅު ކޯލިޝަނުން އިންތިޚާބަށް ނެރުމަށް ނިންމާފައިވަނީ ރައީސް ޔާމީނެވެ. ރައީސް ޔާމިން ހުންނެވީ 11 އަަހަރުގެ ޖަލު ހުކުމެއްގައި ބަންދުގައެވެ. ނަމަވެސް އެކޯލިޝަނުން އަދި ކެނޑިޑޭޓު ބަދަލު ކުރުމުގެ ވާހަކައެއް ދައްކައިފައެއް ނުވެއެވެ.  އެކޯލިޝަނުންނާއި ރައީސް ޔާމިންގެ ވަކީލުންގެ ޓީމުން މަސައްކަތް ކުރަމުން އަންނަނީ އިންތިޚާބަށް ޖެހެންވާއިރަށް އެމަނިކުފާނުް މިނިވަން ކުރުމަށެވެ.