މި އަހަރު ސެޕްޓެމްބަރު މަހު އޮން ރިޔާސީ އިންތިހާބުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ކޯލިޝަނަށް %51.2 ވޯޓު ލިބޭނެ ކަމަށް ހޯމް މިނިސްޓަރު ޢިމްރާން އަބްދުالله ވިދާޅުވެއްޖެ އެވެ. 

ރިޔާސީ އިންތިޚާބުގައި ރައީސް ޞާލިހާއިއެކު ކޯލިޝަން ހެދުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ދައުވަތު އަރުއްްވާފައި ވަނިކޮށް، އެ ޕާޓީގެ ފަރާތުން ކެންޑިޑޭޓެއްގެ ގޮތުގައި ގާސިމް ނުކުތުމަށް އިއްޔެ ވަނީ ނިންމާފައެވެ. 

އެކަމާއި ގުޅިގެން ގިނަ ބަޔަކު އަންނަނީ ރައީސް ޞާލިހަށް އިންތިހާބު ކާމިޔާބު ނުކުރެވޭނެ ކަމަށް ބުނަމުންނެވެ. 

އެފަރާތްތަކަށް ރައްދު ދެއްވައި އިމްރާން ކުރެއްވި ޓުވީޓެއްގައި ވިދާޅުވީ، އެމްޑީޕީ އާއި، ރައީސް ޞާލިހާއި އެކު ކޯލިޝަން ހެދުމަށް އެއްބަސްވެފައިވާ އަދާލަތު ޕާޓީއާއި، އެމްޑީއޭ އިން އެކުގައި، ރައީސް ޞާލިހު ދެވަނަ ދައުރަކަށް އިންތިހާބު ކުރުމަށް މަސައްކަތް ކޮށްފި ނަމަ، %51.2 އަށްވުރެ މަތިން ވޯޓު ހޯދައިގެން އިންތިހާބު ކާމިޔާބު ކުރާނީ އެމަނިކުފާނު ކަމަށެވެ. 

އަދި އެފަދައިން އެ ވިދާޅުވަނީ ވަރަށް ހިސާބު ޖެހުމަށް ފަހުގައި ކަމަށްވެސް އޭނާ ވިދާޅުވި އެވެ. 

ޢިމްރާން މިފަދައިން ވިދާޅުވި ނަމަވެސް، ޖުމްހޫރީ ޕާޓީ އާއި ނުލައި ރައީސް ޞާލިހަށް އިންތިހާބު ކާމިޔާބު ނުކުރެވޭނެ ކަމަށް ގިނަބަޔަކު އަންނަނީ ބުނަމުންނެވެ. އެހެނީ، މީގެ ކުރިން ބޭއްވުނު ކޮންމެ އިންތިޚާބެއްގައިވެސް ކާމިޔާބު ވެފައިވަނީ އެ ޕާޓީން ނަގާ ކޮޅަކަށް ވާއިރު, ރައީސް ޞާލިހަށްވެސް 2018 ވަނަ އަހަރު އިންތިހާބު ކާމިޔާބުވީ އެ ޕާޓީއާއިއެކު ކޯލިޝަން ހަދައިގެންނެވެ. އަދި އެ އަހަރު އެމްޑީޕީގެ ހުރިހާ މެންބަރުން ރައީސް ޞާލިހު ގެ ފަހަތްޕުޅުގައި ތިއްބެވި އިރު, މިހާރު އެ ޕާޓީ ދެކަފިވެ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނުގެ މެންބަރުން އަންނަނީ ޖުމްހޫރީ ޕާޓީ އަށް ތާއީދު ކުރުމާއި މެދު މަޝްވަރާ ފަށަން ނިންމާފައެވެ.