މިމަހުގެ ނިޔަލަށް ތިން އެއާޕޯޓަކަށް ރޭގަނޑުގެ ދަތުރުތައް ފެށޭނެ ކަމަށް ރީޖަނަލް އެއާޕޯޓްސް ކޮމްޕެނީ (އާރުއޭސީއެލް) ގެ މެނޭޖިން ޑިރެކްޓަރު މުހައްމަދު ރިޒުވީ ވިދާޅުވެއްޖެ އެވެ.

ގދ. ފަރެސްމާތޮޑާ އެއާޕޯޓް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުން ރިޒްވީ ވިދާޅުވީ އެ އެއާޕޯޓަކީ އާރްއޭސީއެލް އުފެދުނު ފަހުން އެ ކުންފުނީގެ އެންމެ ބޮޑު ބައިވެރިވުމެއް ހިމެނިގެން ނިންމާލެވިފައިވާ ފުރަތަަމަ އެއާޕޯޓް ކަމަށެވެ. 

އަދި އެ އެއާޕޯޓް އަށް އާރްއޭސީއެލް ގެ ވަޒީފާއަށް ހުޅުވާލުމުން 45 ވަޒީފާއަށް 157 މުވައްޒަފުން ކުރިމަތިލާފައިވާއިރު، އެ 45 ވަޒީފާއާއި އެކު އެ ސަރަހައްދުގެ އިގްތިސާދަށް ސީދާ ގޮތުން  އަހަރަކު 7 މިލިއަން ރުފިޔާ ވަންނާނެ ކަމަށެވެ. އަދި އެހެން މުވައްސަސާތަކާއި އެކު އެ އަދަދު އެތައް ގުނަ އަކަށް އިތުރު ވެގެންދާނެ ކަމަށްވެސް ރިޒްވީ ވިދާޅުވި އެވެ. 

ރިޒްވީ އިތުރަށް ވިދާޅުވީ، އެއާޕޯޓާއި އެކީ އެ ސަރަހައްދުގައި ގެސްޓްހައުސް ތަރައްގީ ކުރުމަށް ހުޅުވާލެވިގެންދާނެ ކަމަށާ، މަސްވެރިކަމާއި ދަނޑުވެރިކަމުގެ ބާވަތްތައް ވެސް ތާޒާކަމާއި އެކީ އެކި ސަރަހައްދު ތަކަށް ފޮނުވުމުގެ ފުރުސަތު ހުޅުވިގެންދާނެ ކަމަށެވެ. 

މިއާއެކު ރިޒްވީ ވިދާޅުވީ، މިހާރު ކުރަމުންދާ މަސައްކަތަކީ ރޭގަނޑު ދަތުރުތައް ކުރެވޭ ގޮތަށް އެއާޕޯޓްތަކުގައި ލައިޓް ހަރުކުުރުމުގެ މަސައްކަތް ކަމަށެވެ. 

އެގޮތުން ކުންފުނީގެ އަމާޒަކީ ހދ. ކުޅުދުއްފުށި ސިޓީގެ އެއާޕޯޓް މި މަހުގެ ނިޔަލަށް ނިންމުން ކަމަށާ އަދި ހއ. ހޯރަފުއްޓާއި މާވަރުލު އެއާޕޯޓްގެ ލައިޓިން މަސައްކަތް އެ މުއްދަތުގައި އެކުއެކީ ނިންމާލުން ކަމަށްވެސް އޭނާ ވިދާޅުވި އެވެ. 

"އެއާޕޯޓްތައް ގިނަވެ ރަންވޭތައް ދިގުވެ ޓާމިނަލްތަކުގެ ޑިޒައިން ބަދަލުވާއިރު އަޅުގަނޑުމެން އަރުވަން ބޭނުންވާ ޔަގީން ކަމަކީ ރައްކާތެރި އަމާން ލާމެހިފައިވާ ޖަޒީރާ ރާއްޖެއެއްގެ ޔަގީންކަން،" ރިޒްވީ ވިދާޅުވިއެވެ.

މި މަހުގެ ނިޔަލަށް ލައިޓް ހަރުކުރުމުގެ މަސައްކަތް ނިންމުމަށް ކަނޑައަޅާފައިވާ ކުޅުދުއްފުށި ސިޓީގެ އެއާޕޯޓަކީ ރައީސް ޔާމީންގެ ސަރުކާރުގައި އެއާޕޯޓް ގެ މަސައްކަތް ފުރިހަމަ ވުމުގެ ކުރިން ދަތުރުތައް ފެށި އެއާޕޯޓެެކެވެ.

އަދި މިސަރުކާރުންވެސް އެ އެއާޕޯޓަށް ކޮށްދޭނެ ކަމަށް ވައުދުވީ ކަންކަން ނުވާތީ އެ ސިޓީގެ ރައްޔިތުންނާއި، އެ ދާއިރާގެ މެންބަރުން ވެސް އަންނަނީ ކަންބޮޑުވުން ފާޅުކުރަމުންނެވެ.

އަދި ސިޓީ ގެ ލަގަބު ލިބިފައިވާ ރަށެއްގައި އޮންނަ އެއާޕޯޓް ގައި ރޭގަނޑު ދަތުރުތައް ނުކުރެވޭތީ ރޭގަނޑު ބަލި މީހަކު މާލެ ގެންނަން ޖެހިއްޖެނަަމަ އަދިވެސް ޖެހެނީ ހަނިމާދޫއަށް ދާށެވެ. 

އެހެންކަމުން އެ އެއާޕޯޓް ގައި ލައިޓް ހަރުކުރެވިގެން ދިޔުން ވާނީ، ރައްޔިތުންނަށް ލިބިގެންދާނެ ވަރަށް ބޮޑު ލުޔަކަށްކަން ފާހަގަކޮށްލަންޖެހެއެވެ.