ދިވެހިރާއްޖޭގައި، އޭވިއޭޝަން ދާއިރާގައި ބައި ގަރުނުން ނުލިބުނު ތަރައްޤީ 2 އަހަރުން ގެނެސްދެވިފައިވާ ކަމަށް ރީޖަނަލް އެއާޕޯޓްސް ކޮމްޕެނީ (އާރުއޭސީއެލް) ގެ މެނޭޖިން ޑިރެކްޓަރު މުހައްމަދު ރިޒުވީ ވިދާޅުވެއްޖެ އެވެ.

ގދ. ފަރެސްމާތޮޑާ އެއާޕޯޓް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުން ރިޒްވީ ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރައްޔިތުންނަށް ވައުދުވެ ވަޑައިގަތީ ރަށުބަންދުން ވީއްލަައި ދެއްވުމަށް ކަމަށާ، އެމަނިކުފާނު އެ ވައުދު ފުއްދަވަމުން އަންނަ ކަމަށެވެ. 

މިއާއެކު ރިޒްވީ ވިދާޅުވީ، ރައީސް ޞާލިހު، އާރްއޭސީއެލް ކުންފުނި އުފެއްދެވި އެންމެ މުހިންމު މަގުސަދަކީ ރައްކާތެރިކަން ކަށަވަރު ވެފައި އޮތް ވައިގެ ދަތުރުފަތުރުގެ ނިޒާމަކުން ރާއްޖޭގެ ރަށްތައް ގުޅާލުމަށް ކަމަށެވެ. 

އަދި އެ ކުންފުނި އުފެދުނުތާ މިހާރު ދެ އަހަރު ވެފައިވާއިރު، އެ ވައުދު ފުއްދުމަށް ވަރަށް ގިނަ މަސައްކަތް ތަކެއް ކުރެވިފައިވާ ކަން ރިޒްވީ ފާހަގަކުރެއްވި އެވެ. އެގޮތުން، މިއަދު ރީޖަނަލް އެއާޕޯޓް ތަކުގައި މަސައްކަތް ކުރާ ހުރިހާ މުވައްޒަފުންނަކީވެސް އެ މުވައްޒަފު މަސައްކަތް ކުރާ ދާއިރާއިން ތަމްރީނު ލިބިފައިވާ މުވައްޒަފުން ކަމަށް އޭނާ ވިދާޅުވި އެވެ. 

ރިޒްވީ އިތުރަށް ވިދާޅުވީ، އަމިއްލަ ވަސީލަތްތައް ބިނާކުރުމަށް އެ ކުންފުނިން ކޮށްފައިވާ މަސައްކަތްތަކުގެ ފައިދާ މުޅި ސިނާއަތައް ކުރަމުންދާ ކަމަށެވެ.  

އެގޮތުން މީގެ ކުރިން ބޭރު ގައުމުތަކުން ބޮޑު އަގުގައި ހަދަމުންދިޔަ ޓްރެއިނިންގ ތައް މިއަދު ހަދަމުންދަނީ އެ ކުންފުނިން އުފެއްދި ސެޓިފައިޑް ދިވެހި ޓްރެއިނަރުންނާއި އެކީ، އެ ކުންފުނީގެ އޭވިއޭޝަން އެކަޑަމީ ގައި ކަން ރިޒްވީ ފާހަގަކުރެއްވި އެވެ. 

ރިޒްވީ ވިދާޅުވީ މިހާރު އެ ކުންފުނިން ކުރަމުންދާ މަސައްކަތަކީ، ފައިދާވާ ކުންފުންޏަކަށް ހެދުމުގެ މަސައްކަތް ކަމަށާ، އެކަންވެސް ކުރައްވާނެ ކަމަށެވެ. އަދި ކުންފުނި އުފެއްދުނީއްސުރެވެސް އެ ކުންފުނިން އަންނަނީ ރައީސް ޞާލިހް ވެފައިވާ ވައުދު ރަނުން ރަނަށް ފުއްދަމުން ކަމަށެވެ.