ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީން) އޮޅުވާލައިގެން އެއްވެސް ފަރާތަކަށް ބިމެއް ވިއްކާފައި ނުވާނެ ކަމަށާއި، އާންމު ފަރާތަކަށް އޮޅުވާލައިގެން ކ. ތިލަފުށިން ބިމެއް ވިއްކަން ކަމަށް ބުނެ ރިޝްވަތު ނެގި އެކުންފުނީގެ މުވައްޒަފަކު މިހާރު ސަސްޕެންޑުކޮށްފައި ވާ ކަމަށް އެޗްޑީސީން ބުނެފި އެވެ.
އެޗްޑީސީގައި މަސައްކަތް ކުރާ އެ މުވައްޒަފު އަމިއްލަ ފަރާތެއްގެ އަތުން ރިޝްވަތު ނަގައި އެ ފައިސާ އަމިއްލަ އެކައުންޓަށް ޓްރާންސްފާ ކޮށްފައިވާ މައްސަލަ އެ ކުންފުނީގެ ސަމާލުކަމަށް އައިސްފައިވުމާއެކު އެ މުވައްޒަފާއި ދޭތެރޭގައި ފިޔަވަޅު އަޅާފައިވާކަމަށް އެކަމާއި ގުޅިގެން އެޗްޑީސީން ނެރުނު ބަޔާނުގައި ވަނީ ހާމަކޮށްފައެވެ.
އޭގެއިތުރުން އެ ކުންފުނިން ވަނީ އެއް މިލިއަން ރުފިޔާއަށް ބިން ވިއްކާލަން އުޅުނު ބައެއް މީޑިއާތަކުން ފަތުރަމުންދާ ޚަބަރު ދޮގުކޮށްފަ އެވެ.
އެޗްޑީސީން ބުނީ އެއްވެސް ފަރާތަކަށް ބިމެއް ވިއްކާފައި ނުވާނެކަމަށެވެ. އެހެން ނަމަވެސް ބިން ވިއްކުމުގެ ނަމުގައި އެޗްޑީސީގެ މުވައްޒަފަކު ރިޝްވަތުގެ އަމަލެއް ހިންގާފައިވާކަމަށް އެކުންފުނިން ވަނީ ބުނެފައެވެ.
އެކަމާއި ގުޅޭގޮތުން އެޗްޑީސީން ބުނީ އެ ކުންފުނިން އެއްވެސް ކަމެއްގައި އަމިއްލަ ފަރާތްތަކުގެ އެކައުންޓު ބޭނުން ނުކުރާނެ ކަމަށެވެ.
އެހެންކަމުން އެފަދަ ކަންކަމަށް އާންމު ރައްޔިތުންވެސް ސަމާލުވުމަށް އެ ކުންފުނިން ވަނީ އިލްތިމާސްކޮށްފަ އެވެ.
އެއާއެކު އެޗްޑީސީން ބުނީ ރިޝްވަތު ނެގި މުވައްޒިފަށް ގާނޫނުގެ ތެރެއިން ދެވެން އޮތް އެންމެ ހަރުކަށި އަދަބު ދޭނެ ކަމަށެވެ.
އެ މައްސަލަ ފުލުހުންނާއި ގުޅިގެން މިހާރު ތަރުހީގު ކުރެވެމުންދާކަންވެސް އެޗްޑީސީން ވަނީ ހާމަކޮށްފަ އެވެ.
Advertisement
This content is created and paid for by advertisers and does not involve Voice Journalists
