ކުރިއަށް އޮތް ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނުގައި ވާދަކުރައްވާ ޕީޕީއެމްގެ ކެންޑިޑޭޓު ހުސެއިން ރިޒާގެ ކެމްޕޭނު ހަރަކާތްތައް ހިންގުމަށް އިދިކޮޅު އިއްތިހާދުގެ ލީޑަރުން ގުރައިދޫ ދާއިރާއަށް ވަޑައިގެންފި އެވެ. 

އިދިކޮޅު ލީޑަޝިޕްގެ މި ދަތުރުފުޅުފައި ޕީޕީއެމްގެ ނައިބުރައީސް މުޙައްމަދު ޣައްސާން މައުމޫނުގެ އިތުރުން، ޕީޕީއެމްގެ ނައިބުރައީސް އަހުމަދު ޝިޔާމު އަދި ޕީއެންސީގެ ނައިބުރައީސް އިބްރާހިމް ޝުޖާއު ބައިވެރިވެވަޑައިގެންނެވި އެވެ. 

އިދިކޮޅުން މައުލޫމާތު ދިން ގޮތުގައި މި ދަތުރުފުޅުގައި ލީޑަޝިޕް ބޭފުޅުން ދާއިރާގެ ތިން ރަށަށް ދަތުރުކުރައްވާނެ އެވެ. އަދި ޑޯ-ޓު-ޑޯ ހަރަކާތްތަކެއް ކުރިއަށް ގެންދަވާނެއެވެ. 

އިދިކޮޅުން މައުލޫމާތުދެއްވި ގޮތުގައި މި ދަތުރުފުޅުގައި ގުރައިދޫ ދާއިރާގެ ރައްޔިތުންނާއި ބައްދަލުކޮށް ލީޑަޝިޕް ބޭފުޅުންވަނީ ދާއިރާއަށް ބޭނުންވާ ކަންކަމާއި ގުޅިގެން މަޝްވަރާކޮށްފަ އެވެ. 

ގުދައިރޫ ދާއިރާގައި ލީޑަޝިޕުން ހަރަކާތްތެރިވަނީ

މި ދަތުރުގެ ތެރެއިން ގުރައިދޫ ދާއިރާގެ ރައްޔިތުންގެ ހިތްތަކުގައި ޕީޕީއެމްގެ ރައީސް އަބްދުﷲ ޔާމީން އަބްދުލްގައްޔޫމަށް އޮތް ލޯތްބާއި އެމަނިކުފާނު ޖަލަށް ލުމާއި ގުޅިގެން ރައްޔިތުންގެ އޮތް ނުތަވަސްކަން ހާމަވެގެން ދިޔަކަމަށް އިދިކޮޅުން ވަނީ ބުނެފައެވެ. 

އޭގެ އިތުރުން ދާއިރާގެ ރައްޔިތުން، އެ ދާއިރާ މީގެ ކުރިން ތަމްސީލު ކުރައްވަމުން ގެންދެވި މަރުޙޫމް އިބްރާހިމް ރިޒާއާއި އޮތް ގާތްކަމާއި، އެމަނިކުފާނަށް ރައްޔިތުންގެ ހިތްތަކުގައި އޮތް އިޚްތިރާމުވެސް ފެނިގެން ދިޔަކަމަށް އިދިކޮޅުން ވަނީ ބުނެފައެވެ. 

އިދިކޮޅުގެ ލީޑަޝިޕުން ގުރައިދޫއަށް ކުރާ މި ދަތުރަކީ ކާމިޔާބު ދަތުރެއްކަމަށާއި، ދަތުރުގެ ތަޖުރިބާއަށް ބަލާ، ގުރައިދޫ ދާއިރާގެ ބައި-އިލެކްޝަން ޕީޕީއެމްގެ ކެންޑިޑޭޓު ހުސެއިން ރިޒާ ކާމިޔާބު ކުރައްވާނެކަމުގެ އުންމީދު އޮތްކަމަށް އިދިކޮޅުން ވަނީ ބުނެފައެވެ. 

ރިޒާގެ ކެމްޕޭނުގައި ޑޯ-ޓު-ޑޯ ހަރަކާތުގެ ތެރެއިން 

ކ. ގުރައިދޫ ދާއިރާގެ ރައްޔިތުން މަޖިލީހުގެ ބައި އިލެކްޝަނުގައި އިދިކޮޅު ޕީޕީއެމްގެ ޓިކެޓު އެ ދާއިރާގެ ކުރީގެ މެންބަރު އިބްރާހީމް ރިޒާގެ ކޮއްކޮ އަށް ދީފިއެވެ.

ޕީޕީއެމް އިން ބުނީ އެޕާޓީގެ ޕްރައިމަރީގައި ވާދަ ކުރުމަށް ހުޅުވާލި ފުރުސަތުގައި މުއްދަތު ހަމަވިއިރު ކުރިމަތިލާފައި ވަނީ އެޕާޓީގެ އާއްމު މެންބަރެއްގެ ގޮތުގައި ހުންނެވި، ހުސައިން ރިޒާ އެކަނި ކަމަށެވެ.

މި އިންތިޚާބުގައި ޕީޕީއެމްގެ އިތުރުން އެމްޑީޕީ އަދި އެމްއެންޕީންވެސް ވާދަކުރުމަށް ވަނީ ނިންމާފަ އެވެ. އެހެންކަމުން މިއީ ފޯރިގަދަ އިންތިޚާބަކަށް ވާނެކަމަށް ފެނެއެވެ.