ދެއިރުކާ ބޭހެއްގޮތަށް ޤައުމީ އިނާމާއި އެވޯޑްތައް ބަހައި، "ބޮޑުގުޅަކުރުން" ބުއްދިވެރިއެއް ނޫން ކަމަށް ރައްޔިތުން މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.

ވައްޑެ މިހެން ވިދާޅުވެފައިވަނީ މިއަހަރު ދިވެހި ދައުލަތަށް ޚިދުމަތް ކުރުމުގެ އިނާމަށް ނަން ހުށަހެޅުމަށް މިއަދު ހުޅުވާލުމާއި ގުޅިގެން ކުރި ޓްވީޓެއްގައެވެ.

އެގޮތުން ވައްޑެ ވިދާޅުވެފައިވަނީ ޤައުމީ އިނާމުގެ އެންމެ ބޮޑު ސިފައަކީ އެ އިނާމުގެ ޝަރަފުވެރިކަމާއި އެ ލިބިގަންނަ ފަރާތުގެ އަގު ވަޒަންކުރެވޭ މިންވަރު ކަމަށެވެ.

އެހެންކަމުން ދެއިރުކާ ބޭހެއްގޮތަށް ޤައުމީއިނާމާއި އެވޯޑުތައް ބަހައި، އެއިނާމުތައް "ބޮޑުގުޅަކުރުމަކީ" އެހާ ބުއްދިވެރި ކަމެއް ނޫން ކަމަށް ވައްޑެ ވަނީ ވިދާޅުވެފައެވެ.

މީގެ އިތުރުން ގިނަ އިނާމު ދީގެން ގިނަ ވޯޓު ހޯދަން ކުރާ ކަމެއް ގޮތަށް މިކަހަލަ ކަންކަން ނުހައްދެވުމަށް ވައްޑެ ވަނީ އެދިފައެވެ.

ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާގައި ދެއްވާ ދައުލަތަށް ޚިދުމަތް ކުރުމުގެ އިނާމަކީ، 2021 ވަނަ އަހަރު ތަޢާރުފު ކުރެވުނު އިނާމެކެވެ.

މިއީ، ދިވެހި ދައުލަތަށް 35 އަހަރަށްވުރެ ދިގު މުއްދަތަކަށް ޚިދުމަތް ކޮށްފައިވާ މުވައްޒަފުންގެ ތެރެއިން، މަގާމުގެ މަސްއޫލިއްޔަތު އަދާކުރުމުގައި ޤާބިލުކަމާއި އިޚްލާޞްތެރިކަމާއެކު ކޮށްފައިވާ ޚިދުމަތްތަކަށާއި، އެ މުއައްސަސާއެއްގެ ކުރިއެރުމަށް ކޮށްދީފައިވާ ޚިދުމަތްތަކުގެ އަގުވަޒަންކުރުމުގެގޮތުން ޤައުމީ ފެންވަރުގައި ދިވެހި ދައުލަތުން ރައީސުލްޖުމްހޫރިއްޔާ ދެއްވާ އެންމެ ޝަރަފުވެރި އިނާމެވެ.

އެގޮތުން މި އިނާމުގެ ގޮތުގައި ރައީސުލްޖުމްހޫރިއްޔާ ދެއްވާނީ އައްޑަނައަކާއި، ޝަރަފުގެ ބެޖަކާއި، ހަނދާނީ ލިޔުމެކެވެ.

މިއިނާމަށް ނަން ހުށަހެޅުމުގެ ފުރުސަތު ޤައުމީ އިނާމާބެހޭ ކޮމިޓީއިން މިއަދު ހުޅުވާލައި، އިނާމު ދިނުމުގެ އުސޫލު ދިވެހި ސަރުކާރުގެ ގެޒެޓުގައި ވަނީ ޝާއިޢު ކޮށްފައެވެ.

މިއާއިއެކު އިނާމަށް ހުށަހަޅާ މީހުންގެ ނަން މިއަހަރު ހުށަހެޅޭނީ، މިއަދުން ފެށިގެން 2023 އެޕްރީލް 30 ވާ އާދީއްތަ ދުވަހުގެ ނިޔަލަށް ރައީސް އޮފީހުން އިއުލާން ކޮށްފައިވެއެވެ.