ޕީސް ފައުންޑޭޝަނުން މުޅިން އަލަށް ތަޢާރަފް ކުރާ ޕްރޮގްރާމް، "ރޯދަ ސްކޮޑް" ގައި ބައިވެރިވުމުގެ ފުރުޞަތު ހުޅުވާލައިފިއެވެ.

ޕީސް ފައުންޑޭޝަން އިން ބުނީ، ރޯދަ ސްކޮޑަކީ ރަމަޟާން މަހުގެ ބޭނުން އެންމެ ހެޔޮގޮތުގައި ހިފުމަށްޓަކައި އެހީތެރިކަން ބޭނުންވާ ފަރާތްތަކަށް ޚާއްޞަކޮށްގެން ހުޅުވާލެވިފައިވާ ޕްރޮގްރާމެއް ކަމަށެވެ. އެގޮތުން މި ޕްރޮގްރާމްގެ މައިގަނޑު މަޤްޞަދަކީ ރަމަޟާން މަސް ފެށިގެން ނިމެންދެން އެއް ވާނެއްގައި އަޅުކަމުގައި ހީވާގިވެ އުޅެން ބޭނުންވާ ބޭފުޅުންނަށް އެ ލަނޑުދަނޑިއާ ހަމައަށް ވާޞިލުވުމުގެ އާރުކާޓީއަކަށް ވުން ކަމަށްވެސް އެ ޖަމިއްޔާ އިން ބުނެއެވެ. 

މި ޕްރޮގްރާމުގައި މުޅި ރޯދަމަހަށް ބަހާލައިގެން ބައިވެރިން ފުރިހަމަ ކުރަންޖެހޭ ޓާސްކުތަކާއި، ކޮންމެ ހަފްތާއަކު ފުރިހަމަ ކުރަންޖެހޭ ޓާސްކުތައް ހިމެނޭނެ ކަމަށް ޕީސް ފައުންޑޭޝަން އިން ބުނެއެވެ. މި ޓާސްކުތަކުގެ ތެރޭގައި، "ރޯދަ ސްކޮޑް" ގެ ހިންގާ ޓީމުން ކަނޑައަޅާ ޓާސްކުގެ ތަކުގެ އިތުރުން ބައިވެރިން ބޭނުންވާ ޓާސްކުތައްވެސް ހިމެނޭނެކަން އެ ޖަމިއްޔާ އިން ފާހަގަ ކުރެއެވެ. 

މީގެ އިތުރުން، ކޮންމެ ހަފްތާއަކު ދެ ދުވަހު ޢިލްމުވެރިއަކާއެކު ބައްދަލުވުން ބޭއްވުމަށް ހަމަޖެހިފައިވާއިރު، މި ބައްދަލުވުންތައް ކުރިޔަށް ދާނީ ޢަޤީދާ އަދި ޤުރުއާނުގައި އައިސްފައިވާ ވާހަކަތައްފަދަ މަޢުޟޫތަކަށް އަލިއަޅުވާލެވިގެން ކަމަށްވެސް ޕީސް ފައުންޑޭޝަން އިން މައުލޫމާތު ދެއެވެ. 

އަދި ހަމައެހެންމެ، ކޮންމެ ހަފްތާއަކު އެއް ދުވަހު ބައިވެރިންނަށް ބާއްވާ ރޯދަ ވީއްލުމަކާއި، ތަރާވީޙް ނަމާދު ފަހުން ކޮފީ އަކުން ބައްދަލުކުރުން ވެސް އޮންނާނެ ކަމަށާ މި ބައްދަލުވުމަކީ ބައިވެރިންގެ ވާހަކަތައް އަޑު އަހާ، ސުވާލުތަކަށް ޖަވާބު ދިނުމަށް ޚާއްޞަ ބައްދަލުވުމެއް ކަންވެސް އެ ޖަމިއްޔާ އިން ފާހަގަ ކުރެއެވެ.

ރޯދަ ސްކޮޑުގައި މި އަހަރު ބައިވެރިވުމަށް ހުޅުވާލާފައިވަނީ 18 އަހަރާއި 26 އަހަރާދެމެދު ފިރިހެނުންނަށެވެ. މި ޕްރޮގްރާމުގައި ބައިވެރިވުމުގެ ފީ އަކީ 900 ރުފިޔާ އެވެ. އަދި ޕްރޮގްރާމް ކުރިޔަށް ދާނީ މާލެ ސިޓީ ގައެވެ.

ބައިވެރިވުމަށްޓަކައި (https://forms.gle/yvpeSAPeiT52bjqp7) މި ލިންކުގައިވާ ފޯމް ފުރާލާށެވެ. އަދި އިތުރު މަޢުލޫމާތު ހޯއްދެވުމަށް 9552949 މި ނަންބަރަށް ގުޅާލައްވާށެވެ.