މި ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި އިދިކޮޅު ޕީޕީއެމާއި އެކު ކޯލިޝަން ހެދުމުގެ ފުރުސަތު ވެސް އެބައޮތް ކަމަށް އެމްއާރްއެމް ގެ ޒަޢީމް އަދި ކުރީގެ ރައީސް މައުމޫން އަބްދުލްޤައްޔޫމް ވިދާޅުވެއްޖެ އެވެ.
ރިޔާސީ އިންތިޚާބުގައި ކޯލިޝަން ހެދުމާއި ގުޅޭ ގޮތުން މަޝްވަރާ ކުރުމަށް ހ. ފުލިދޫ ގޭގައި ރައީސް މައުމޫނާއި، އެމްއާރްއެމްގެ ރައީސް ފާރިސް މައުމޫން ވަނީ ޖޭޕީގެ ލީޑަރު ގާސިމް އިބްރާހިމާއި ބައްދަލުކުރައްވާފައެވެ.
އެ ބައްދަލުވުމަށް ވަޑައިގެންނެވުމުގެ ކުރިން، ފުލިދޫ ގޭގެ ބޭރުގައި ރައީސް މައުމޫން ވަނީ ނޫސްވެރިންގެ ސުވާލުތަކަށް ޖަވާބުދެއްވާފައެވެ.
އެގޮތުން، ރިޔާސީ އިންތިހާބުގައި އެމަނިކުފާނުގެ ކޮއްކޯފުޅު އަދި ކުރީގެ ރައީސް ޔާމީން އަބްދުލްގައްޔޫމްގެ ޕާޓީ، ޕީޕީއެމާއި އެކު ކޯލިޝަން ހައްދަވާފާނަންތޯ ނޫސްވެރިއެއް ކުރި ސުވާލަށް ޖަވާބު ދެއްވަމުން މައުމޫން ވަނީ އެއީވެސް ވެދާނެ ކަމެއް ކަމަށް ވިދާޅުވެފައެވެ.
"ހުރިހާ ކަމަކީވެސް ވެދާނެ ކަމެއް ދެއްތޯ؟ ކޮންމެ ކަމެއްވެސް އެކަމެއްގެ ވަގުތުގައި އެކާމާއި ބެހޭ މަޝްވަރާތައް ކޮށްފައި، ގޮތެއް ނިންމާނީ. ކުރިއަކުން ބުނާކަށް ނޭނގެ." ޕީޕީއެމާއި އެކު ކޯލިޝަން ހަދާނަންތޯ ސުވާލު ކުރުމުން ޖަވާބުގައި މައުމޫން ވިދާޅުވިއެވެ.
މައުމޫންގެ ޖަވާބާއި ގުޅިގެން ނޫސްވެރިޔާ ވަނީ، އެހެންކަމުން ޕީޕީއެމާއި އެކު ކޯލިޝަން ހެދުމުގެ ފުރުސަތު އޮތްތޯ އަނެއްކާވެސް ސުވާލު ކުރައްވާފައެވެ.
"ހުރިހާ ކަމަކަށްވެސް ފުރުސަތު އެބައޮތް. ގިޔާމަތް ވުމަށްވެސް ފުރުސަތު އެބަ އޮތެއް ނޫންތޯ." ސަމާސާ ރާގެއްގައި މައުމޫން ވިދާޅުވިއެވެ.
ޕީޕީއެމާއި އެކު ކޯލިޝަން ހެދުމުގެ ފުރުސަތު އޮތް ކަމަށް މައުމޫން ވިދާޅުވެފައިވާއިރު، ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އާއި މިހާތަނަށް ރައީސް މައުމޫނާއި އެކު ސިޔާސީ މަސައްކަތް ކުރުމާއި ގުޅިގެން ކުރި ސުވާލުތަކަށް ސީދާ ޖަވާބެއް ދެއްވާފައެއް ނުވެއެވެ. އެގޮތުން، މީގެ ކުރިން 'ވޮއިސް' އަށް ދެއްވި ޚާއްސަ ބަސްދީގަތުމުގައިވެސް އެމަނިކުފާނު އެ ސުވާލާއި ގުޅިގެން ވަކި އެއްޗެއް ވިދާޅުވެވެން ނެތް ކަމަށް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
