ހއ.އަތޮޅު ސުކޫލުތަކުގެ ތައުލީމީ ހާލަތު ރަނގަޅުކުރުމަށް އެ އަތޮޅު ކައުންސިލުން އިސްނަގައިގެން ކުރިއަށްގެންދިޔަ ޕްރިންސިޕަލުންގެ ފޯރަމަށް ދައުވަތު ދީފައިވަނީ މިނިސްޓްރީ ގެ ޕޮލިސީ ލެވެލްގެ ބޭފުޅަކަށް ކަން ހާމަވެއްޖެއެވެ.
ގުރައިދޫ ދާއިރާގެ ބައި އިލެކްޝަންގައި ވާދަ ކުރައްވާ އެމްޑީޕީގެ ކެނޑިޑޭޓް އިބްރާހިމް ޝާޒް ގެ ކެމްޕޭނަށް އެޑިއުކޭޝަން މިނިސްޓަރު ޑރ. ޢާއިޝަތު ޢަލީ އެރަށަށް ވަޑައިގެން އުޅުއްވަނީ ހއ .އަތޮޅު ކައުންސިލުން އިންތިޒާމް ކޮށްގެން ބޭއްވި ޕްރިންސިޕަލް ފޯރަމަށް ދެއްވި ދައުވަތު ގަބޫލުނުކުރައްވާ ކަމަށް ބުނެ ޕީއެންސީ ގެ ނައިބު އިބްރާހިމް ޝުޖާޢު ވަނީ އިއްޔެ ޓުވީޓެއް ކުރައްވާފަ އެވެ.
ޝުޖާއުގެ ޓުވީޓަށް ރައްދު ދެއްވައި މިނިސްޓަރު ކުރެއްވި ޓުވީޓެއްގައި ވިދާޅުވީ، އެއީ ރަނގަޅު ވާހަކައެއް ނޫން ކަމަށާ އަދި އެފަދަ ދައުވަތެއް ލިބިފައެއްވެސް ނުވާ ކަމަށެވެ.
"ޙަޤީޤަތާ ޚިލާފު ދޮގު މަޢުލޫމާތު ނުަފެތުރެއްވުން އެދެން." މިނިސްޓަރު ވިދާޅުވި އެވެ.
ޕްރިންސިޕަލް ފޯރަމް ގައި ބައިވެރިވުމަށް އެދި ހއ.އަތޮޅު ކައުންސިލުން އެޑިއުކޭޝަން މިނިސްޓްރީއަށް ފޮނުވާފައިވާ ސިޓީގެ ކޮޕީއެއް "ވޮއިސް" އަށް ވަނީ ލިބިފައެވެ. އެ ސިޓީގައި އެ ކައުންސިލުން ވަނީ މިނިސްޓްރީގެ ޕޮލިސީ ލެވެލްގެ ބޭފުޅެއް އެ ފޯރަމަށް ފޮނުވުމަށް އެދިފައެވެ. އަދި ވަކިން ޚާއްޞަކޮށް މިނިސްޓަރަށް ދައުވަތު އަރުވާފައި ނުވާކަންވެސް އެއިން ހާމަވެއެވެ.
އެ ފޯރަމުގައި ބައިވެރިވުމަށް އެޑިއުކޭޝަން މިނިސްޓްރީއަށް ފޮނުވި ދައުވަތާ ގުޅިގެން އެ މިނިސްޓްރީން ދީފައިވާ ޖަވާބުގެ ކޮޕީއެއްވެސް މީސްމީޑިއަށް ވަނީ ތިލަވެފައިވެއެވެ.
ފޯރަމްގައި ބައިވެރިވެވެން ނެތް ކަމަށް ބުނެ މިނިސްޓްރީން ފޮނުވި ޖަވާބު
އެ ސިޓީގައި ވާގޮތުން މިނިސްޓްރީގެ ޕާމަނަންޓް ސެކްރެޓަރީ އަޙްމަދު އަލީ ސޮއިކުރައްވައި ފޮނުއްވި ސިޓީގައި ވިދާޅުވީ މިހާރު މިނިސްޓްރީގެ މަސައްކަތްތައް ހުރި ގޮތުން އެ ވުޒާރާގެ ބޭފުޅަކު ހއ.އަތޮޅު ކައުންސިލުން ބާއްވާ ފޯރުމުގައި ބައިވެރިކުރުމަކީ ދަތިކަމެއް ކަމުގައި ދަންނަވާ ކަމަށެވެ.
Advertisement
This content is created and paid for by advertisers and does not involve Voice Journalists
