މިއަހަރު ބާއްވާ ރިޔާސީ އިންތިޚާބުގައި އެމްޑީޕީގެ ކެނޑިޑޭޓް ރައީސް އިބްރާހިމް މުހައްމަދު ޞާލިހާއި އެމަނިކުފާނާއި ކޯލިޝަން ހެއްދެވި ޕާޓީތައް މިހާރުވެސް އުޅުއްވަނީ ރޭހުގެ ކުރީގައި ކަމަށް ރައީސް ޞާލިހަށް ދެވަނަ ދައުރެއް ހޯދުމަށް ކޯލިޝަން ހަދާފައިވާ އަދާލަތު ޕާޓީގެ ރައީސް އިމްރާން ވިދާޅުވެއްޖެއެވެ.

ރިޔާސީ އިންތިހާބުގައި އެމްޑީޕީ އާއެކު ކޯލިޝަން ހަދާފައިވާ ޕާޓީތަކުގެ ރައީސުންނާއި އިސް ފަރާތްތަކާއި އެކު ރައީސް ޞާލިހް ވަނީ އިއްޔެ މުލިއާގޭގައި ބައްދަލު ކުރައްވައިފައެވެ. 

އެބައްދަލުވުމަށްފަހު އިމްރާން ކުރެއްވި ޓުވީޓުގައި ވިދާޅުވީ މިހާރުވެސް އެމްޑީޕީއާއިއެކު ކޯލިޝަން ހަދާފައިވާ ޕާޓީތަކުން އޮތީ މާކުރީގައިކަމަށެވެ. އަދި ރައީސް ޞާލިހަށް ދެވަނަ ދައުރެއް ދިނުމަށް މިހާރުވެސް 2 ޕާޓީއަކުން ކޯލިޝަން ހަދާފައިވާއިރު އެހެން ޕާޓީތަކުން އަދިވެސް އުޅެނީ ކެނޑިޑޭޓަކު ކަނޑައެޅުމުގެ މަޝްވަރާގައިކަމަށް އިމްރާން ވިދާޅުވިއެވެ.

Advertisement

އިމްރާން މިފަދައިން ވިދާޅުވެފައި މިވަނީ ނުސީދާގޮތުން އަދުގެ ސަރުކާރުގެ ކޯލިޝަންގައި ހިމެނޭ ޖުމްހޫރީ ޕާޓީ އާއި އެމްއާރްއެމް އަށް ފާޑުވިދާޅުވުމަށް ކަމަށް ބެލެވެއެވެ. އެހެނީ ޖުމްހޫރީ ޕާޓީން ރިޔާސީ ރޭހުގައި ވާދަކުރން ނިންމި ނަމަވެސް އަދި ވަކި ކެންޑިޑޭޓަކު ނުދައްކައެވެ. އަދި އެމްއާރުއެމްއިން ރިޔާސީ އިންތިޚާބާއިމެދު ވަކި ގޮތެއް ނުނިންމައެވެ.