މި ސަރުކާރަށް ނުކުރެވުނު ކަމެއް ކޮށްދޭންކަމަށް ބުނެ އިދިކޮޅު ފަރާތްތަކަށް ގުރައިދޫ ދާއިރާއަށް އަންނާނެކަމެއް ނެތްކަމަށް މަޖިލީހުގެ ފުނަދޫ ދާއިރާގެ މެންބަރު މުޙައްމަދު ޝާހިދު ވިދާޅުވެއްޖެ އެވެ.
މެމްބަރު ޝާހިދު މިފަދައިން ވިދާޅުވެފައިވަނީ ކުރިއަށް އޮތް މަޖިލީހުގެ ގުރައިދޫ ދާއިރާގެ ބައި-އިކެލްޝަންގެ އެމްޑީޕީގެ ކެމްޕޭނު ރަސްމީކޮށް ފެށުމަށް ބޭއްވި ޖަލްސާގައި ވާހަކަދައްކަވަމުން ނެވެ.
ޝާހިދު ވިދާޅުވީ ގުޅިއަކީ އެމްޑީޕީ މެޖޯރިޓީ ރަށެއްކަމަށެވެ. އަދި އެ ރަށަށް ބޭނުންވާ ކަންކަން މިހާރުވެސް ސަރުކާރުން ފުއްދާދިނުމުގެ މަސައްކަތް ކުރަމުންދާ ކަމަށެވެ.
އެގޮތުން އެރަށަށް ބޭނުންވާ ބޯހިޔާވަހިކަމާއި އުމްރާނީ ތަރައްގީ ގެނެވެން އޮތީ ބިން ހިއްކައިގެން ކަމަށްވާތީ އެކަން ކުރުމަށް ސަރުކާރުން ނިންމާފައިވާކަން ޝާހިދު ފާހަގަކުރެއްވި އެވެ. އަދި ވިދާޅުވީ ސަރުކާރަށް ކަމެއް ނުކޮށްދެވޭއޭ ކިޔައިގެން އެ ދާއިރާއަށް އިދިކޮޅު ފަރާތްތަކުން އައިސް ދައްކާނެ ވާހަކައެއްވެސް ނޯންނާނެ ކަމަށެވެ.
"އަޅުގަނޑަށް ޔަގީން ވަނީ މު ގުޅި ފުރި ބާރުވެފައި އޮތީ އެމްޑީޕީ ދެކެ ލޯބިން. އެމްޑީޕީގެ މި ސަރުކާރުން އިބްރާޙިމް މުޙައްމަދު ޞާލިހު ކޮށްދެއްވި ގިނަ ގުނަ މަސައްކަތްތަކުން. މި ރައްޔިތުން ބޭނުންވާ އެކިއެކި ޚިދުމަތްތަކުން. އަލަކުން މި ގުޅިއަށް އިދިކޮޅުން ގެނެސް އަޅާނެ އެއްވެސް އެއްޗެއް ނެތް. ދެންވެސް ގުޅި ބޮޑުކޮށް އިތުރަށް އެއްޗެއް އެޅެން އޮތީ މިރަށުން ޖާގަ އިތުރުކޮށްގެން. އެކަން ކުރާކަށް އަޅުގަނޑުމެންނަށް އެހެން ސަރުކާރެއް ބޭނުމެއް ނޫން. މި ސަރުކާރަށް ނުވާނެކަމެއް ކުރާކަށް އެހެން ބަޔަކުއައިސް މިތަނުގައި މިތަނާކުޅެން ދައްކާނެ އިތުރު ވާހަކައެއް އޮތްކަމަކަށް އަޅުގަނޑަކަށް ފެންނާކަށް ނެތް"
ފުނަދޫ ދާއިރާގެ މެންބަރު މުޙައްމަދު ޝާހިދު
ޝާހިދުގެ ވާހަކައިގައި ވަނީ ގުރައިދޫ ބައި-އިލެކްޝަނުގައި އެމްޑީޕީ ތަމްސީލުކުރައްވާ ކެންޑިޑޭޓު އިބްރާހީމް ޝާޒަށް ވަރަށް ބޮޑަށް ތަޢުރީފުކުރައްވާފަ އެވެ.
އެގޮތުން ޝާހިދު ވިދާޅުވީ ޝާޒަކީ އެމްޑީޕީ ފެށުނީއްސުރެ ޕާޓީގެ އެކި އެކި ހަރަކާތްތަކުގައި އިސްކޮށް އުޅުއްވާ ބޭފުޅެއްކަމަށެވެ. އެމްޑީޕީން ފެށި އިސްލާހީ މަސައްކަތްތަކުގައި، ރައްޔިތުންނަށް ގެއްލިފައިވާ ހައްގުތައް ހޯދާދިނުމަށް ކުރި މުޒާހަރާތަކުގައި ބައިވެރިވެ އެތައް އަނިޔާތަކެއްވެސް ލިބިވަޑައިގެން ހުންނެވި އިޚްލާސްތެރިކަމާއެކު ރައްޔިތުންގެ ހައްގުގައި މަސައްކަތްޕުޅު ކުރައްވާ ބޭފުޅެއް ކަމަށެވެ.
ޝާޒު ފަދަ ބޭފުޅަކު މަޖިލީހަށް އިތުރުވުން ވެގެންދާނީ ރައްޔިތުންނަށް އުފާ ފާގަތި ދިރިއުޅުމެއް ހޯދާދިނުމަށް ސަރުކާރުން ކުރާ މަސައްކަތަށް ލިބިގެންދާނެ ބާރެއްގެ ގޮތުގައި ސިފަކުރައްވާ ޝާހިދު ވަނީ ބައި-އިލެކްޝަން ޝާޒުއަށް ކާމިޔާބުކޮށްދިނުމަށް ރައްޔިތުން މަސައްކަތްކުރުމަށް އެދިވަޑައިގަންނަވާފަ އެވެ. އަދި ވޯޓު ފޮށިތައް އެމްޑީޕީއަށް ވޯޓު އަޅާ ފުރާލަ ދިނުމަށް ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
