އިނގުރައިދޫ ކައުންސިލުން އެ ރަށުގެ ޒުވާނުންނަށް އަމާޒުކޮށްގެން ކޮންމެ އަހަރަކުވެސް ބާއްވަމުން އަންނަ ކައުންސިލް ފުޓްސަލް ފިއެސްޓާ 2023 މިރޭ ފެށުމަށް ވަނީ ހަމަޖެހިފައެވެ.
މި މުބާރާތުގައި ބައިވެރިވި 8 ޓީމު ދެ ގްރޫޕަކަށް ބަހާލައިގެން ގުރޫޕް ސްޓޭޖުގެ މެޗުތައް ކުޅުމަށް ހަމަޖެހިފައިވަނީ މާރިޗު 26 ން 31 ގެ ނިޔަލަށެވެ. ކޮންމެ ރެއަކުވެސް މުބާރާތުގެ ދެ މެޗު ކުޅުމަށް ހަމަޖެހިފައި ވާއިރު މުބާރާތުގެ ސެމީ ފައިނަލަށް ހޮވޭނީ ދެ ގުރޫޕުން ވެސް އެއްވަނަ އަދި ދެވަނައަށް ދާ ދެ ޓީމެވެ.
މުބާރާތުގެ ސެމީ ފައިނަލް މެޗުތައް ކުޅުމަށް ހަމަޖެހިފައިވަނީ އެޕްރިލް މަހުގެ އެއްވަނަ ދުވަހު އެވެ. އަދި ފައިނަލް މެޗު އޮންނާނީ އެޕްރިލް މަހުގެ ތިންވަނަ ދުވަހުގެ ރޭ 21:30 ގައެވެ.
އިނގުރައިދޫ އަކީ މިވަގުތު ރާއްޖޭގައި ފުޓްސަލް އެންމެ ހަލުވިކަމާއެކު ކުރިއަރަމުން އަންނަ އެއް ރަށެވެ. މިގޮތުން ނިމިގެންދިޔަ ގޯލްޑަން ފުޓްސަލް ޗެލެންޖް 2023 ގައި އެޓީމުން ހޯދި ކާމިޔާބީ ފާހަގަކޮށްލަންޖެހެއެވެ. ރާއްޖޭގައި ބާއްވާ އެންމެ ބޮޑު ފުޓްސަލް ޗެލެންޖްގައި މި އަހަރު އިނގުރައިދޫ އިން ވަނީ ރ. އަތޮޅު ޗެމްޕިއަން ހޯދުމުގެ އިތުރުން ޒޯން ދޭއްގެ ޗެމްޕިއަންކަން ހޯދާފައެވެ. އަދި އެޓީމުން ވަނީ ފުރަތަމަ ފަހަރަށް މުބާރާތުގެ ސެމީ ފައިނަލުން ޖާގަހޯދާފައެވެ.
ގޯލްޑަން ފުޓްސަލް ޗެލެންޖްގައި އިނގުރައިދޫ ޓީމުގައި ކުޅުނު ހުރިހާ ކުޅުންތެރިން މިއަހަރުގެ ކައުންސިލް މުބާރާތުގައި ފެނިގެންދާނެކަމަށް މުބާރާތް އިންތިޒާމްކުރާ ފަރާތުން ވޮއިސް އެމްވީ އަށް ވަނީ މައުލޫމާތު ދީފައެވެ.
މީގެއިތުރުން މުބާރާތުގެ ހުރިހާ މެޗެއް އިނގުރައިދޫ ކައުންސިލްގެ ފޭސްބުކް ޕޭޖް މެދުވެރިކޮށް ވަގުތުން ދުރަށް ދެއްކުމަށް ވަނީ ހަމަޖެހިފައެވެ.
މުބާރާތުގައި ބައިވެރިވެފައިވާ ޓީމުތައް
ހަލަފް އެފްސީ
ޕްރޯ ފުޓްސަލް ކުލަބް
ސްޓްރީޓް ބްރަދާސް
ލަނޑާ
އެފްސީ ހެސަވާދަ
ޔޯ ބުރު އެފްސީ
ދަ ސްކޯޕިއަން
އެފްސީ ބްރަދާސް
Advertisement
This content is created and paid for by advertisers and does not involve Voice Journalists
