ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިޙުގެ ސިޔާސަތު ކަމުނުދާ ބޭފުޅުން މަގާމުތަކުގައި ތިއްބަވައިގެން އެ ސިޔާސަތުތައް ތަންފީޒު ނުކުރެއްވޭނެކަމަށް ރައްޔިތުންގެ މަޖިލީހުގެ އެމްޑީޕީގެ ޕާލަމެންޓްރީ ގުރޫޕުގައި ހިމެނިވަޑައިގަންނަވާ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެ އެވެ. 

ޝިފާޢު މިފަދައިން ވިދާޅުވެފައިވަނީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ މެނޭޖިންގ ޑިރެކްޓަރ ގެ މަގާމްގައި ހުންނެވި ހުސައިން އަމްރު ރަޝާދު މަގާމުން ވަކިކުރުމަށް ސަރުކާރުން ޕްރައިވެޓައިޒޭޝަން އެންޑް ކޯޕަރައިޒޭޝަން ބޯޑް (ޕީސީބީ) އަށް ފޮނުވުމާއި ގުޅިގެން ސަރުކާރަށް އަމާޒުވަމުންދާ ފާޑުކިޔުންތައް ދިފާއުކުރައްވާ ކުރެއްވި ޓްވީޓެއްގަ އެވެ. 

އަމްރު މަޤާމުން ވަކިކުރަން ނިންމީ ރައީސް މުހަައްމަދު ނަޝީދަށް ތާއީދުކުރައްވާތީކަމަށް އެމްޑީޕީގެ އިސް ބައެއް ބޭފުޅުން ދަނީ ވިދާޅުވަމުންނެވެ. އަދި އެއީ ވަޒީފާގެ ބިރު ދެއްކުމުގެ ގޮތުގައި އެ ފަރާތްތައް ސިފަކުރައްވައެވެ. 

އެހެން ނަމަވެސް ޝިފާއު ވިދާޅުވީ އަމްރު އެ މަޤާމުން ވަކިކުރަން ނިންމީ ރައީސުލްޖުމްޙޫރިއްޔާގެ ސިޔާސަތުތައް ޤަބޫލުފުޅު ނުކުރައްވާ ބޭފުޅަކަށް ވުމުން ކަމަށެވެ. އެމަނިކުފާނުގެ ސިޔާސަތުތައް ޤަބޫލުނުކުރައްވާ ބޭފުޅަކަށް އެ ސިޔާސަތުތައް ތަންފީޒު ނުކުރެވޭނެ ކަމަށާއި، އެކަމުގެ ސަބަބުން ގެއްލުން ލިބިގެންދާނީ ރައްޔިތުންނަށްކަމަށް ޝިފާޢު ވިދާޅުވި އެވެ. 

އަމްރުއަކީ އެމްޑީޕީގެ ރައީސް މުޙައްމަދު ނަޝީދުގެ "ފިކުރެއްގެ ދިރުން" ގޮފި އުފައްދާ ފުޅާކުރުމުގައި އިސް ރޯލެއް އަދާކުރައްވަމުން ގެންދަވާ ބޭފުޅެކެވެ. 

ނަޝީދުގެ ފިކުރެއްގެ ދިރުމުގެ މެމްބަރުން ގެންދަވަނީ ސަރުކާރަށް ބޮޑެތި ފާޑުކިޔުންތަކެއް އަމާޒުކޮށް، ވައްކަމާއި ކޮރަޕްޝަންގެ ބޮޑެތި ތުހުމަތުތަކެއްވެސް ކުރައްވަމުންނެވެ. 

އަމްރު މަޤާމުން ވަކިކުރުމަށް ނިންމާފައިވާއިރު، ޢަމްރު ބައިވެރިވެވަޑައިގަންނަވަން އޮތް ޕީއެސްއެމްގެ ޕްރޮގްރާމުވެސް ވަނީ ފަހު ވަގުތު ކެންސަލްކުރައްވާފަ އެވެ.

ނަޝީދުގެ ފިކުރެއްގެ ދިރުމުގެ އިސް ބޭފުޅެއްކަމަށްވާ އަލީ އާޒިމް ވަނީ އެ ޕްރޮގްރާމު ހުއްޓުވީ ރައީސް އޮފީހުގެ ތަރުޖަމާނު މިއުވާން ކަމަށް ތުހުމަތުކުރައްވާފަ އެވެ. އަދި ޕްރޮގްރާމު ހުއްޓުވުމަށްޓަކައި މިއުވާން ޕީއެސްއެމަށް ވަޑައިގެންނިކަމަށްވެސް އާޒިމް ވިދާޅުވެފައި ވެއެވެ.