ވިލިނގިލި ޓަރމިނަލްގައި ގަވައިދާއި ޚިލާފަށް އަޅާފައިވާ އުޅަނދުތައް ނެގުމަށް އެމްޓީސީސީއިން އަންގައިފިއެވެ.

އެގޮތުން އެ ކުންފުނިން މިއަދު ނެރުން އިއުލާނެއްގައި ބުނެފައިވަނީ މާފަންނު ފެރީ ޓަރމިނަލް ނުވަތަ މާލެ ހުޅަނގުފަރާތު ވިލިނގިލި ޓަރމިނަލް ހިމެނޭ ސަރަހައްދުގެ ފަޅުތެރެއަކީ ހަމައެކަނި އެމްޓީސީސީގެ ފެރީތައް ބޭނުން ކުރުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންއިން ހާއްސަ ހުއްދައެއް ދީފައިވާ ސަރަހައްދެއް ކަމަށެެވެ.

ނަމަވެސް މި ސަރަހައްދުގައި އެހެނިހެން އުޅަނދުތައް ޤަވާއިދާއި ޚިލާފަށް އަޅާފައި ހުރުމުގެ ސަބަބުން ފެރީތައް ގަޑިއަށް ފުރުމަށާއި ލެފުމަށް ދަތިތަކާއި އަންނަނީ ކުރިމަތިލަމުން ކަމަށެވެ.

Advertisement

މީގެ އިތުރުން ގަވާއިދާއި ޚިލާފަށް ގިނަ އުޅަނދުތައް އެ ސަރަހައްދުގައި އަޅާފައި ހުރުމުގެ ސަބަބުން އެކްސިޑެންޓްތައްވެސް ހިނގުމަށް ވަނީ މެދުވެރިވެފައި ކަމަށްވެސް އެމްޓީސީސީއިން ފާހަގަކޮށްފައިވެއެވެ.

އެހެންކަމުން ގަވައިދާއި ޚިލާފަށް މި ސަރަހައްދުގެ ފަޅުތެރޭގައި އަޅާފައި ހުރި އުޅަނދުތައް މިއަދުން ފެށިގެން 10 ދުވަހުގެ ތެރޭގައި އެސަރަހައްދުން ނެގުމަށާއި މުއްދަތު ތެރޭގައި ނުނަގައި ހުރި އުޅަނދުތައް މޯލްޑީވްސް ޕޮލިސް ސަރވިސް މެދުވެރިކޮށް މި ސަރަހައްދުން ނަގާނެކަމަށް އެކުންފުނިން ވަނީ އަންގާފައެވެ.