މާލެ ސިޓީގެ ހުރިހާ މަސައްކަތެއް އެއް ޕްލެޓްފޯމަކުން ފަސޭހައިން ހޯދާލެވޭގޮތަށް މުޅި މާލެ ސިޓީގެ ހުރިހާ ޚިދުމަތެއް ޑިޖިޓަލައިޒްކޮށް ގޭގައި ތިބެގެން ޚިދުމަތްތައް ހޯދުމަށް މަގު ފަހިކޮށްދިނުމަށްޓަކައި މާލެ ސިޓީ ކައުންސިލުން ފަށާފައިވާ "ޑިޖިޓަލް މާލެ" މަޝްރޫޢުގެ ބޮޑުބައެއް ނިންމާލައިފިއެވެ.

މާލެ ސިޓީ ކައުންސިލުން ބުނީ މާލެ ސިޓީ ކައުންސިލް ޑިޖިޓަލައިޒް ކުރުމުގެ މަސައްކަތުގެ ތެރެއިން ޑޮކިއުމެންޓްތައް ސްކޭން ކުރުމުގެ މަސައްކަތުގެ ވަރަށް ބޮޑު ބައެއް މިހާރު ނިންމާލެވިފައިވާ ކަމަށެވެ.

އެގޮތުން "ޑިޖިޓަލް މާލެ" ޝިއާރުގެ ދަށުން ވައިޓަލް ރަޖިސްޓްރޭޝަން ޑިޕާޓްމެންޓް، ލޭންޑް ޑިޕާޓްމެންޓް، ޕްރޮކިއުމެންޓް ޑިޕާޓްމެންޓް އަދި ހިއުމަން ރިސޯސް ( އެޗްއާރް ) ޑިޕާޓްމެންޓު އަދި އާންމު ޚިދުމަތާއި ބެހޭ ޑިޕާޓްމެންޓުން ސްކޭން ކުރުމުގެ ބޮޑު ބައެއް ނިންމާލާފައިވާ ކަން އެ ކައުންސިލުން ފާހަގަކުރެއެވެ.

އޭގެ ތެރެއިން ވައިޓަލް ރެޖިސްޓްރޭޝަނުން ވަނީ 2 ވައްތަރެއްގެ ޑޮކިއުމެންޓެއް ސްކޭންކޮށްފައިވާ ކަމަށް އެ ކައުންސިލުން މައުލޫމާތު ދެއެވެ. އެއީ މާލޭގެ ރަށްވެއްސަކަށް ވުމުގެ ސެޓްފިކެޓާއި އަލަށް އުފަންވާ ކުދިންގެ ނަން ރަޖިސްޓްރީއެވެ. އެގޮތުން މާލޭގެ ރަށްވެއްސަކަށް ވުމުގެ ސެޓްފިކެޓް ވަނީ 2016 އިން ފެށިގެން 2022 ވަނަ އަހަރާއި ހަމައަށް އެއްކޮށް ނިންމާލާފައިވާއިރު 2022 ވަނަ އަހަރުގެ ޖެނުއަރީ މަހުން ފެށިގެން އަލަށް އުފަންވާ ކުދިންގެ ނަން ރަޖިސްޓްރީ ކުރި ހުރިހާ ލިޔެކިއުމެއްވެސް ސްކޭންކޮށް ނިމިފައިވާ ކަމަށް މާލެސިޓީ ކައުންސިލުން ބުނެއެވެ.

"މާވެހި" ޕޯޓަލް.

މީގެ އިތުރުން މާލެ ސިޓީ ކައުންސިލުން ބުނީ، ލޭންޑް ޑިޕާޓްމެންޓުން 3 ވައްތަރެއްގެ ލިޔެކިއުންތަކެއް ސްކޭންކޮށްފައިވާ ކަމަށެވެ. އެގޮތުން ވަކިކަމަކަށް އިމާރާތް ބޭނުން ކުރުމުގެ ހުއްދަ 2016 އިން ފެށިގެން 2022 ހަމައަށް ސްކޭންކޮށް ނިންމާފައިވާއިރު، 2019 ވަނަ އަހަރުގެ ވެހިކަލް ގަރާޖް ރަޖިސްޓްރޭޝަން އެއްކޮށް އަދި މާލެ ސިޓީގައި އިމާރާތް ކުރުމުގެ ހުއްދަވެސް ސްކޭންކޮށް ނިންމާފައިވާ ކަމަށް އެ ކައުންސިލުން މައުލޫމާތު ދެއެވެ.

އާންމު ޚިދުމަތާއި ބެހޭ ޑިޕާޓްމެންޓުން 4 ވައްތަރެއްގެ ލިޔެކިއުމެއް ސްކޭންކޮށް ނިންމާފައިވާއިރު އޭގެ ތެރެއިން 2016 ވަނަ އަހަރުން ފެށިގެން 2023 ވަނަ އަހަރާ ހަމައަށް މަގުމަތީގައި މަސައްކަތް ކުރުމުގެ ހުއްދައާއި ބޯޑު ދޫކުރި ކަމުގެ ލިޔުންތައް އެއްކޮށް ސްކޭންކޮށް ނިންމާފައިވާއިރު ހަމަ އެ މުއްދަތުގައި ބިލް ކުރާ ގޮތައް ދޫކުރާ ފޯމްތަކުގެ 95 އިންސައްތަ ސްކޭންކޮށް ނިންމާލެވިފައިވާ ކަން މާލެ ސިޓީ ކައުންސިލުން ވަނީ ފާހަގަކޮށްފަ އެވެ. މީގެ އިތުރުން، އެ ޑިޕާޓްމެންޓުން 2016 ވަނަ އަހަރުން 2023 ވަނަ އަހަރަށް މަގުމަތީގައި މަސައްކަތް ކުރުމުގެ ފައިސާގެ ރަސީދުގެ %70 އަދި ބިތްގަނޑު ފޯމުގެ 80 ސްކޭންކޮށްފައިވާ ކަމަށްވެސް ބުނެފައިވެއެވެ. 

މާލެސިޓީ ކައުންސިލް ޑިޖިޓަލް ކުރުމުގެ މަސައްކަތުގެ ތެރެއިން އުފެއްދި "މާވެހި" ޕޯޓަލް މޭޔަރ ޑރ. މުޙައްމަދު މުޢިއްޒު އިފްތިތާޙްކޮށްދެއްވުން.

މީގެ އިތުރުން، ޕްރޮކިއުމެންޓް ޑިޕާޓްމެންޓްގެ ލިޔެކިޔުންތަކުގެ %85 އަދި އެޗްއާރް ޑިޕާޓްމެންޓްގެ ހުރިހާ ލިޔެކިޔުންތައް ސްކޭންކޮށް ނިންމާފައިވާ ކަމަށް މާލެ ސިޓީ ކައުންސިލުން ބުނެއެވެ. 

"ޑިޖިޓަލް މާލެ" ޝިއާރުގެ ދަށުން މިހާތަނަށް 82900 ލިޔެކުން ސްކޭން ކުރެވިފައިވާ އިރު އެއީ 981000 ސަފްހާ ކަންވެސް އެ ކައުންސިލުން ފާހަގަކޮށްފައިވެއެވެ. 

"ޑިޖިޓަލް މާލެ" މަޝްރޫޢުއަކީ މާލެސިޓީ ކައުންސިލްގެ ހަތަރުވަނަ ދައުރަށް އެކުލަވާލި ސްޓްރެޓްޖިކް އެކްޝަން ޕްލޭންގައި ހިމެނިފައިވާ އެއް އަމާޒެވެ.